| e-texts navigator |
| Wylie |
257a1 བཞིན་ཏེ། རི་དང་། རྡོ་དང་། བོང་བ་དང་། གྱོ་མོ་དང་། གསེག་མ་ལ་སོགས་པ་མེད་པར་འགྱུར་ཞིང་མུ་སྟེགས་ཅན་གྱི་མིང་ཡང་མེད་པར་འགྱུར་རོ། །ཉན་ཐོས་དང་། རང་སངས་རྒྱས་ཐམས་ཅད་ཀྱི་མིང་ཡང
257a2 མི་གྲག་པར་འགྱུར་རོ། །སྐྱེས་པ་དང་བུད་མེད་དག་གི་བྱང་ཆུབ་སེམས་དཔའི་དགེ་འདུན་ཡང་འབྱུང་བར་འགྱུར་རོ། །དེ་ན་ཉན་ཐོས་དང་། རང་སངས་རྒྱས་ཤེས་པའི་གཏམ་གྱི་མིང་ཡང་མེད་དེ། ཐེག་པ་ཆེན་པོའི་མདོའི
257a3 གཏམ་རྒྱས་པར་སྟོན་པར་འགྱུར་རོ། །བདུད་དང་ཕྱིར་རྒོལ་བ་བཅོམ་པའི་སེམས་ཅན་རྣམས་འབྱུང་བར་འགྱུར་རོ། །དག་ཅིང་བཟོད་པ་ཆེན་པོའི་རྙེད་པ་ཐོབ་པ་དག་འབྱུང་བར་འགྱུར་རོ། །ས་གཞི་ཡང་ནོར་བུ་རིན་པོ་ཆེ་ཐམས་ཅད་ལས་གྲུབ
257a4 པར་འགྱུར་ཏེ། འཛམ་བུའི་ཆུ་བོའི་གསེར་གྱི་མེ་ཏོག་དང་། པད་མ་ཐམས་ཅད་ཀྱིས་སྤྲས་པར་འགྱུར་རོ། །དེ་བཞིན་གཤེགས་པ་དེ་ཡང་ཚེ་དཔག་ཏུ་མེད་པར་འགྱུར་རོ། །དེ་བཞིན་དུ་མི་རྣམས་ཀྱི་ཚེ་ཡང་ཚད་མེད་པར་འགྱུར་རོ། །
257a5 དེ་བཞིན་གཤེགས་པ་དེ་ནི་གྲོང་ཁྱེར་གཙང་མ་བསུང་ལྡན་དུ་བཞུགས་པར་འགྱུར་རོ། །བཅོམ་ལྡན་འདས་དེའི་སྨོན་ལམ་གྱི་ཁྱད་པར་གྱིས་ན་མ་འོངས་པའི་སེམས་ཅན་གྱི་ཚོགས་མང་པོ་དག་གིས་དེ་བཞིན་གཤེགས་པ་དེའི་མཚན
257a6 ཐོས་པ་ཙམ་གྱིས་རང་གི་ལུས་ལས་ཤི་འཕོས་མ་ཐག་ཏུ་འཇིག་རྟེན་གྱི་ཁམས་གཙང་མ་སྦྱོང་བ་དེར་གྲོང་ཁྱེར་གཙང་མ་བསུང་ལྡན་དུ་སྐྱེ་བར་འགྱུར་ཞེས་ང་སྨྲའོ། །ངན་སོང་བཞི་ཡང་དེ་དག་གི་སྤྱོད་ཡུལ་གྱི་སར་མི་འགྱུར་རོ། །སྤྲིན
257a7 ཆེན་སྙིང་པོ་དེ་བས་ན་ང་ནི་བཅོམ་ལྡན་འདས་འཇིག་རྟེན་གྱི་ཁམས་གཙང་མ་སྦྱོང་བ་དང་། བསྐལ་པ་གཙང་ཞིང་བདེན་པའི་མཚམས་ཤེས་བྱ་བ་དང་། དེ་བཞིན་གཤེགས་པ་གཙང་ཞིང་བདེན་པའི་མཚམས་འཕེལ་བར་མཛད་པ་ཞེས
257a8 བྱ་བ་ཡོན་ཏན་གཟུང་བ་སྨྲའོ། །དེ་ནས་འཁོར་ཆེན་པོའི་ནང་ནས་ལྷ་དང་མིའི་ཚོགས་ཚད་མེད་པས་བཅོམ་ལྡན་འདས་ལ་མཆོད་པ་ཆེན་པོའི་ལས་བྱས་ཏེ་གར་བྱས། གླུ་བླངས་ནས་བཅོམ་ལྡན་འདས་དེའི་བྱང་ཆུབ་སེམས
iiif viewer powered by OpenSeadragon
