| e-texts navigator |
| Wylie |
317b1 ལྷག་པའི་བསམ་པས་སྦྱིན་པ་ཕུལ་བ་རྣམས་རྒྱལ་རིགས་དགེ་བས་འཕྲོག་པར་མི་བགྱིད་ལ། རྒྱལ་རིགས་དགེ་བ་བློན་པོ་དང་། མདུན་ན་འདོན་དང་། སྐྱེ་བོ་དམག་མི་རྣམས་དང་བཅས་པས་ཚོགས་སྦྱོར
317b2 བ་ནི་དོན་ཆེད་ལ་བརྩོན་པ་ལགས་སོ། །སྙིང་པོ་བླངས་པ་ལགས་སོ། །ལག་བརྐྱང་ནས་ལྷུག་པར་གཏོང་བ་ལགས་ཏེ། རྒྱལ་རིགས་དགེ་བ་དེ་ཡུལ་འཁོར་དང་བཅས་པར་སྲུང་བར་བགྱི་ལགས་སོ། །ཡོངས་སུ
317b3 བསྐྱང་བར་བགྱི་ལགས་སོ། །དེའི་ཡུལ་ཕྱོགས་ན་རྩོད་པའི་རྙོག་པ་ཐམས་ཅད་དང་། སོ་སོའི་འཁོར་དག་སྔར་ཇི་སྐད་བསྟན་པ་བཞིན་བསྐྲད་པར་བགྱི་ལགས་སོ། །དེ་ཅིའི་སླད་དུ་ཞེ་ན། ཆོས་གོས་ངུར་སྨྲིག་ཁ་བསྒྱུར
317b4 བ་འདི་ནི་སྔོན་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བྱིན་གྱིས་བརླབས་པ་ལགས་སོ། །བྱང་ཆུབ་སེམས་དཔའ་རྣམས་ཀྱི་རྒྱལ་མཚན་ལགས་སོ། །མྱ་ངན་ལས་འདས་པར་མཆི་བ་རྣམས་ཀྱི
317b5 ལམ་ལགས་སོ། །ཉོན་མོངས་པ་རྣམས་ཀྱི་རལ་གྲི་ལགས་སོ། །མྱ་ངན་ལས་འདས་པའི་ས་བོན་ལགས་སོ། །ལམ་ལས་རབ་ཏུ་ཉམས་པ་རྣམས་ཀྱི་སྒྲོན་མ་ལགས་སོ། །ཕུང་པོ་རྣམས་ཀྱི་སྨན་ལགས་སོ། །
317b6 མ་རིག་པའི་མུན་པའི་རླུང་ལགས་སོ། །ངན་འགྲོ་རྣམས་ཀྱི་སྒྲོགས་ཤིང་ལགས་སོ། །ཉོན་མོངས་པའི་སྐྱོན་གྱིས་ཉམས་པར་གྱུར་པ་རྣམས་ཀྱི་སྐྱུག་སྨན་ལགས་སོ། །དགྲ་རྣམས་ཀྱི་རྡོ་རྗེ་ལགས་སོ། །
317b7 དགེ་བའི་རྩ་བ་ཐམས་ཅད་ཀྱི་གཏེར་ལགས་སོ། །སྡིག་པས་གོས་པ་རྣམས་ཀྱི་ཆབ་ལགས་སོ། །ནོངས་པ་བགྱིད་པ་རྣམས་ཀྱི་མེ་ལོང་ལགས་སོ། །སེམས་གཡེངས་པ་རྣམས་ཀྱི་ཏིང་ངེ་འཛིན་ལགས་སོ། །
317b8 ཏིང་ངེ་འཛིན་རྣམས་ཀྱི་ཟ་མ་ཏོག་ལགས་སོ། །ཕ་རོལ་ཏུ་ཕྱིན་པ་རྣམས་ཀྱི་ས་གཞི་ལགས་སོ། །གཟུངས་རྣམས་ཀྱི་ནོར་བུ་ལགས་སོ། །བཟོད་པ་རྣམས་ཀྱི་ཁྱིམ་ལགས་སོ། །ས་རྣམས་ཀྱི་སྣོད་ལགས་སོ། །
iiif viewer powered by OpenSeadragon
