| e-texts navigator |
| Wylie |
312b1 ཤིག་སྟེ། འཁྲུགས་ཤིང་སྐྱོ་བ་སྐྱེས་ནས་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་འཛེར་ཏོ། །དེ་ནས་བཅོམ་ལྡན་འདས་ཀྱིས་དཔལ་ལྷ་མོ་ཆེན་མོ་ལ་འདི་སྐད་ཅེས་བཀའ་སྩལ་ཏོ། །
312b2 དཔལ་ཆོ་ག་ཤེས་ཁྱོད་ཀྱིས་འབྱོར་བྱེད་ཆུ་ཁྱིམ་སྙིང་པོ་ཞེས་བྱ་བའི་གཟུངས་ནི་དེ་ལྟ་བུ་ཡིན་ཏེ། དེའི་མཐུས་རྩོད་པ་དང་། འཐབ་མོ་ཐམས་ཅད་རབ་ཏུ་ཞི་བར་བྱེད་དོ། །ཀླུ་ཁྲོ་བོ་དང་། མ་རུངས་པ་ཐམས་ཅད་ཞི་བར་བྱེད་དོ། །
312b3 གནོད་སྦྱིན་ནས་མི་དང་། མི་མ་ཡིན་པ་དང་། ཐ་ན་རི་དགས་དང་། བྱ་ཁྲོ་བོ་དང་། མ་རུངས་པ་ཐམས་ཅད་ཀྱང་ཞི་བར་བྱེད་དོ། །དུས་མ་ཡིན་པའི་རླུང་དང་། ཉི་མས་གདུངས་པ་དང་། གྲང་བ་དང་། ཚ་བ་དང་། ཐན་ཆེན་ཐམས་ཅད
312b4 རབ་ཏུ་ཞི་བར་བྱེད་དོ། །ལོ་ཏོག་ཐམས་ཅད་འཕེལ་ཞིང་འགྲུབ་པར་བྱེད་དོ། །སེམས་ཅན་རྣམས་ཚེ་རིང་བར་བྱེད་དོ། །ལོངས་སྤྱོད་འཕེལ་བར་བྱེད་དོ། །ལས་འཕེལ་བ་སྒྲོལ་བར་བྱེད་པའི་བར་དུ་བྱེད་དོ། །མྱ་ངན་ལས་འདས
312b5 པ་བླ་ན་མེད་པ་ལ་ཐུག་གི་བར་དུ་དགེ་བའི་ཆོས་ཐམས་ཅད་ཀྱིས་ཉམས་པར་མི་འགྱུར་རོ། །ཡོངས་སུ་ཉམས་པར་མི་འགྱུར་རོ། །ལ་ལ་ཞིག་གཟུངས་ཆེན་པོ་འདི་ཉན་ཏམ། ཀློག་གམ། སྒྲུབ་པར་བྱེད་ན་དེ་ཕྱིས་འགལ
312b6 བ་མེད་པའི་ཆོས་དང་། སྡོམ་པ་གསུམ་ལ་གནས་པར་འགྱུར་རོ། །དེ་ནས་བྱང་ཆུབ་སེམས་དཔའ་སའི་སྙིང་པོས་གསོལ་པ། བཙུན་པ་བཅོམ་ལྡན་འདས་འདིར་བདག་གིས་ཀྱང་མཚོན་ཆའི་སྟོབས་ཤེས་བགྱི་བའི
312b7 གཟུངས་ཆེན་པོ་བཤད་པར་བགྱིའོ། །མཚོན་ཆའི་སྟོབས་ཤེས་བགྱི་བའི་གཟུངས་དེས་སེམས་ཅན་རྣམས་ཀྱི་ལོངས་སྤྱོད་དང་། ཡོངས་སུ་སྤྱོད་པ་ཐམས་ཅད་ཀྱི་ཆེད་དུ་སའི་བཅུད་ཐམས་ཅད་ཉམས་པར་མི
312b8 འགྱུར་རོ། །ཡོངས་སུ་ཉམས་པར་མི་འགྱུར་རོ། །སའི་བཅུད་ཀྱི་མདངས་རྣམས་གང་གིས་ཀྱང་དབྲོག་པར་རྔོ་མི་ཐོག་ལགས་སོ། །དབུགས་གདུག་པ་གཏོང་བ་འམ། བསྐམ་པར་ཡང་རྔོ་མི་ཐོག་ལགས་སོ། །
iiif viewer powered by OpenSeadragon
