| e-texts navigator |
| Wylie |
299a1 དབུགས་འབྱུང་བ་སྐྱེ་བ་དང་། ནུབ་པའི་ཚུལ་གྱིས་འདུ་བྱེད་གསུམ་ལ་ཉེ་བར་རྟོག་པར་ཡང་བྱེད་དོ། །དེ་སྟོབས་ལྔ་བསྒོམ་པ་ཡོངས་སུ་རྫོགས་པར་ཡང་འགྱུར་ལ། ཡང་ན་དབུགས་རྔུབ་པ་དང་། དབུགས་འབྱུང་བའི་ཚོར་བའི་མཚན་མ
299a2 གསལ་བའི་ཚུལ་གྱིས་ཕུང་པོ་དག་ལ་ཞི་བ་དང་ཉེ་བར་ཞི་བར་རྟོག་པར་ཡང་བྱེད་དོ། །དེ་བཞིན་དུ་བྱང་ཆུབ་ཀྱི་ཡན་ལག་བདུན་བསྒོམ་པ་ཡོངས་སུ་རྫོགས་པར་ཡང་འགྱུར་ལ། ཡང་ན་དབུགས་རྔུབ་པ་དང་། དབུགས་འབྱུང་བའི་རླུང་གི་རྣལ་འབྱོར་ཡིད་ལ
299a3 བྱེད་པས་སའི་ཁམས་གཟུགས་སུ་སྣང་བ་ཐམས་ཅད་རྡུལ་དུ་རླགས་ཏེ་གཏོར་ནས་མཚན་མ་མེད་པ། ལུས་པ་མེད་པ། བརྗོད་དུ་མེད་པ། མཚན་ཉིད་མེད་པ། རྣམ་པར་རིག་པ་མེད་པ། འདུ་བྱེད་གསུམ་ཞི་བ། ཉེ་བར་ཞི་བ། འགགས་པ།
299a4 དམིགས་པ་མེད་པའི་ཏིང་ངེ་འཛིན་དག་རབ་ཏུ་ཐོབ་བོ། །བསམ་གཏན་ལ་རྣམ་པར་རྩེ་བའི་ཏིང་ངེ་འཛིན་དེ་ལྟ་བུ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསམ་གཏན་གྱི་ཕ་རོལ་དུ་ཕྱིན་པ་ཡོངས་སུ་སྦྱོང་བ་ཐུན་མོང་བ་ཡིན་ལ།
299a5 བསམ་གཏན་གྱི་ཕ་རོལ་དུ་ཕྱིན་པ་ཡོངས་སུ་སྦྱོང་བ་ན་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡང་ཐུན་མོང་ཡིན་ནོ། །གང་དག་ཁ་ཅིག་དེ་ལ་གནས་ན་རྒྱུན་དུ་ཞུགས་པའི་འབྲས་བུ་ལ་གནས་པ་ཡིན་ནོ། །བརྩོན་འགྲུས་ཞན་པ་ཁ་ཅིག
299a6 ནི་ཉན་ཐོས་ཀྱི་ཆོས་རྣམས་ལ་འཕེལ་ལོ། །ཁ་ཅིག་ནི་དགྲ་བཅོམ་པའི་འབྲས་བུ་ལ་གནས་པའི་བར་དུའོ། །གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ། འབད་པ་བརྟན་པ། སེམས་ཅན་ཐམས
299a7 ཅད་ལ་ལྟ་ལ། བསོད་ནམས་དང་། ཤེས་རབ་ཀྱི་ཚོགས་དཔག་ཏུ་མེད་པ་གོམས་པར་བྱས་ཏེ། བསམ་གཏན་ཡོངས་སུ་སྦྱོང་བས་རྣམ་པར་རྩེ་བའི་ཏིང་ངེ་འཛིན་གྱི་རྣལ་འབྱོར་དེ་ལྟ་བུ་དེ་ལ་གནས་ནས་རྣམ་པར་ལྡོག་པར་ཡང་མི་བྱེད་ལ།
299a8 ཉན་ཐོས་ཀྱི་ངེས་པ་ལ་འཇུག་པར་ཡང་མི་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གོ་ཆ་ཆེན་པོ་བགོས་ནས་བསམ་གཏན་གྱི་ཕ་རོལ་དུ་ཕྱིན་པ་དང་། སོ་སོ་ཡང་དག་པར་རིག་པ་ལ་སྦྱོར་བ་ཡོངས་སུ་སྦྱོང་བ་ལ་གནས་པ
iiif viewer powered by OpenSeadragon
