| e-texts navigator |
| Wylie |
118b1 སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་སུམ་ཁྲི་དྲུག་སྟོང་རྣམས་ཀྱིས་ཡེ་ཤེས་མངོན་པར་རྟོགས་པར་གྱུར་ཏོ། །དགེ་སློང་ལྷག་པའི་ང་རྒྱལ་ཅན་དྲུག་ཅུ་པོ་དེ་དག་རྣམས
118b2 ཀྱང་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་བདག་ཅག་ནི་དེང་སླན་ཆད་སྟོན་པ་དྲུག་རྣམས་ཀྱི
118b3 རྗེས་སུ་རབ་ཏུ་བྱུང་ངོ་། །དེང་སླན་ཅད་བདག་ཅག་གི་སྟོན་པ་སངས་རྒྱས་མ་ལགས། ཆོས་ལ་མི་རྟེན། དགེ་འདུན་ལ་མི་རྟེན་ཏོ། །དེང་ཕན་ཆད་བདག་ཅག་བྱ་བ་མ་མཆིས་པར་སྨྲ་བ། རྒྱུ་མ་མཆིས་པར་སྨྲ་བ།
118b4 ལས་མ་མཆིས་པར་སྨྲ་བ། རྣམ་པར་སྨིན་པ་མ་མཆིས་པར་སྨྲ་བ། འདུལ་བ་མ་ལགས་པར་སྨྲ་བའོ། །དེའི་ཚེ་འཁོར་དེ་ན་སྲོག་ཆགས་སྟོང་ཕྲག་མང་པོ་རྣམས་འདི་སྙམ་དུ་གྱུར་ཏེ། འདི་ལྟར་དགེ་སློང་འདི
118b5 དག་འདི་དག་འདི་ལྟ་བུ་ཡང་དག་པ་མ་ཡིན་པའི་ཚིག་སྨྲ་བ་ལས་ན། བཅོམ་ལྡན་འདས་ཀྱི་བསླབ་པ་ཕུལ་ནས་མུ་སྟེགས་ཅན་གྱི་མཚན་མ་འཛིན་པར་མི་འགྱུར་རམ་སྙམ་དུ་གྱུར་ཏོ། །དེ་ནས་ཚེ་དང་ལྡན་པ
118b6 ཤཱ་རིའི་བུའི་སེམས་ཀྱིས་འཁོར་དེ་དག་གི་སེམས་ཀྱི་རྟོག་པ་ཤེས་ནས་དགེ་སློང་དེ་དག་ལ་སྨྲས་པ། ཚེ་དང་ལྡན་པ་དག་ཅི་ལས་བསམས་ཏེ། དེང་ཕན་ཆད་བདག་ཅག་སྟོན་པ་དྲུག་གི་རྗེས་སུ་རབ་ཏུ་བྱུང་ངོ
118b7 ཞེས་དེ་སྐད་སྨྲ། དེ་དག་གིས་སྨྲས་པ། ཚེ་དང་ལྡན་པ་ཤཱ་རིའི་བུ་དེང་ཕན་ཆད་བདག་ཅག་གི་སྟོན་པ་ཐམས་ཅད་སྟོན་པ་དྲུག་དང་མཉམ་ཞིང་མཚན་ཉིད་གཅིག་ཅིང་བྱེ་བྲག་མེད་པར་རྣམ་པར་རིག་གོ། །བདག་ཅག་གིས
118b8 སྟོན་པ་ཐམས་ཅད་ཐ་དད་པ་མེད་པར་རིག་ནས་རྣམ་པར་མི་རྟོག་པར་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །སྨྲས་པ་ཅི་ལས་བསམས་ནས་དེང་ཕན་ཆད་བདག་ཅག་གི་སྟོན་པ་སངས་རྒྱས་མ་ཡིན་ནོ་ཞེས་དེ་སྐད་སྨྲ།
iiif viewer powered by OpenSeadragon
