| e-texts navigator |
| Wylie |
299b1 བར་གནས་པ་འམ། ཚེ་འདི་མ་ཡིན་པ་ལ་བདེ་བར་གནས་པའི་ཆོས་དེ་དག་ཡང་དག་པར་རྗེས་སུ་མི་མཐོང་ཞིང་མི་དམིགས་མོད་ཀྱི། འོན་ཀྱང་འཇམ་དཔལ་དེ་བཞིན་གཤེགས་པས་ཉན་ཐོས་རྣམས་ལ་རབ་ཏུ་དབེན་པའི་ཆོས་སུ
299b2 གསུངས་པ་གང་ཡིན་པ་དེ་ལ་བདག་རྟེན་ཅིང་གནས་སོ། །འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ་གང་དེ་བཞིན་གཤེགས་པས་ཉན་ཐོས་རྣམས་ལ་རབ་ཏུ་དབེན་པའི་ཆོས་སུ་གསུངས་པ་གང་ཡིན། བཙུན་པ་ཤཱ་རིའི
299b3 བུ་གང་ལ་རྟེན་ཅིང་གནས། ཤཱ་རིའི་བུས་སྨྲས་པ། འཇམ་དཔལ་འདི་ལ་དགེ་སློང་ནི་འདས་པ་ལ་རྟེན་ཅིང་གནས་སོ། །མ་འོངས་པ་ལ་རྟེན་ཅིང་གནས་སོ། །ད་ལྟར་བྱུང་བ་ལ་རྟེན་ཅིང་གནས་སོ། །དེ་བཞིན་དུ་སྦྱར་ཏེ། སེམས
299b4 ཀྱི་བར་ལ་རྟེན་ཅིང་གནས་པར་ཁོང་དུ་ཆུད་པར་བྱ་སྟེ། འཇམ་དཔལ་ཆོས་དེ་དག་ནི་དེ་བཞིན་གཤེགས་པས་ཉན་ཐོས་རྣམས་ལ་རབ་ཏུ་དབེན་པར་གསུངས་པ་ཡིན་ཏེ། བདག་ཆོས་དེ་དག་ལ་རྟེན་ཅིང་གནས་སོ། །འཇམ་དཔལ
299b5 གྱིས་སྨྲས་པ། བཙུན་པ་ཤཱ་རིའི་བུ་གང་གི་ཕྱིར་འདི་སྐད་ཅེས་འདས་པ་ལ་རྟེན་ཅིང་གནས། མ་འོངས་པ་ལ་རྟེན་ཅིང་གནས། ད་ལྟར་བྱུང་བ་ལ་རྟེན་ཅིང་རབ་ཏུ་དབེན་པ་ལ་གནས་པ་ནས་དེ་བཞིན་དུ་སྦྱར་ཏེ། སེམས་ཀྱི་བར་ལ་རྟེན
299b6 ཅིང་རབ་ཏུ་དབེན་པ་ལ་གནས་ཤེས་སྨྲ། བཙུན་པ་ཤཱ་རིའི་བུ་འདི་ལྟ་སྟེ། གང་འདས་པའི་དེ་བཞིན་ཉིད་དེ་ཡང་ཡོད་པ་མ་ཡིན། གང་མ་འོངས་པའི་དེ་བཞིན་ཉིད་དེ་ཡང་ཡོད་པ་མ་ཡིན། གང་ད་ལྟར་བྱུང་བའི་དེ་བཞིན
299b7 ཉིད་དེ་ཡང་ཡོད་པ་མ་ཡིན་ཏེ། དེ་ལྟར་ཆོས་དེ་དག་ནི་ཡོད་པ་མ་ཡིན་ན། ཇི་ལྟར་གནས་བརྟན་ཤཱ་རིའི་བུ་དེ་འདི་སྐད་ཅེས་འདས་པ་ལ་རྟེན་ཅིང་གནས། མ་འོངས་པ་ལ་རྟེན་ཅིང་གནས། ད་ལྟར་བྱུང་བ་ལ་རྟེན་ཅིང
299b8 གནས་ཤེས་སྨྲ། ཡོད་པ་མ་ཡིན་པའི་ཆོས་ལ་ནི་གནས་པ་མེད་དོ། །ཡང་བཙུན་པ་ཤཱ་རིའི་བུ་འདས་པའི་དེ་བཞིན་ཉིད་དང་། མ་འོངས་པ་དང་། ད་ལྟར་བྱུང་བའི་དེ་བཞིན་ཉིད་གང་ཡིན་པ་དེ་ནི་ཅི་ཡང་མ་ཡིན།
iiif viewer powered by OpenSeadragon
