| e-texts navigator |
| Wylie |
112b1 དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྦྱིན་པའི་ཕན་ཡོན་བསྟན་པ་རྫོགས་སོ།། །། རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ
112b2 ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། ། @#། །རྒྱ་གར་སྐད་དུ། ཨཱརྱ་བོ་དྷྀ་ས་ཏྭ་ཙརྱ་ནིར་དེ་ཤ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་དཔའི་སྤྱོད་པ་བསྟན་པ་ཞེས་བྱ་བ་ཐེག་པ
112b3 ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་གནས་ན་དགེ
112b4 སློང་སྟོང་ཐམ་པའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་དུ་རྣམ་པར་གྲོལ་བ། ཤེས་རབ་ཤིན་དུ་རྣམ་པར་གྲོལ་བ།
112b5 ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ།
112b6 སེམས་ཅན་ཐམས་ཅད་ཀྱི་དབང་གི་དམ་པའི་ཕ་རོལ་དུ་ཕྱིན་པ། སྤྱོད་ལམ་ཞི་བ་དང་། དུལ་བ་དང་། རྣམ་པར་གྲོལ་བ་དང་། མ་བརྟགས་པ་དང་ལྡན་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་གང་ཟག་གཅིག་ནི
112b7 མ་གཏོགས་ཏེ། དེ་ཡང་བཅོམ་ལྡན་འདས་ཀྱིས་ཉམས་སུ་ལེན་པར་བཀའ་སྩལ་ཏེ། ཚེ་འདི་ཉིད་ལ་ལུང་བསྟན་པ་དང་། བྱང་ཆུབ་སེམས་དཔའ་སྟོང་ཐམ་པ་ཐམས་ཅད་ཀྱང་ཕྱིར་མི་ལྡོག་པ། ཐམས་ཅད་ཀྱང་གཟུངས་ཐོབ་པ།
112b8 ཐམས་ཅད་ཀྱང་མཉམ་པ་ཉིད་ཀྱི་བཟོད་པ་དང་ལྡན་པ། ཐམས་ཅད་ཀྱང་ཇི་སྐད་སྨྲས་པ་དེ་བཞིན་དུ་བྱེད་པའི་ས་ཐོབ་པ། མཁས་པ། དྲང་པོ། དད་པ་དང་ལྡན་པ། རྟོག་པ་མང་བ། དང་བ་གཙོ་བོར་བྱེད་པ་བཞིན་འཛུམ་པ། ཁྲོ་གཉེར
iiif viewer powered by OpenSeadragon
