| e-texts navigator |
| Wylie |
93b1 ཡིད་ཀྱི་རྩོམ་པ་མེད་པ་འདི་ནི་བརྩོན་འགྲུས་རྩོམ་པའོ། །དེ་ནས་བཅོམ་ལྡན་འདས་ཀྱིས་ལྷའི་བུ་ཕྱིར་མི་ལྡོག་པ་ལ་ལེགས་སོ་ཞེས་བྱ་བ་བྱིན་ནས་ཚངས་པ་ཁྱད་པར་སེམས་ལ་བཀའ་སྩལ་པ། ཚངས་པ་ལྷའི་བུ་འདི་ཇི་སྐད་སྟོན་པ་དེ་བཞིན་ནོ། །
93b2 འདི་ནི་དེའི་བརྩོན་འགྲུས་རྩོམ་པའི་མཆོག་སྟེ། གང་ལུས་ཀྱི་རྩོམ་པ་ཡང་མེད། ངག་གི་རྩོམ་པ་མེད། ཡིད་ཀྱི་རྩོམ་པ་ཡང་མེད་པ་འདི་ནི་བརྩོན་འགྲུས་རྩོམ་པའི་མཆོག་གོ། །ཚངས་པ་ངས་མངོན་པར་ཤེས་པ་འདས་པའི་དུས་ན་སྦྱངས་པའི
93b3 ཡོན་ཏན་ཡོ་བྱད་བསྙུང་པ་ཐམས་ཅད་ཡང་དག་པར་བླང་བའི་བརྩོན་འགྲུས་བརྩམ་ཀྱང་དེ་བཞིན་གཤེགས་པ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་བཞིན་དུ་བླ་མ་རྣམས་ལ་ལྡང་བ་དང་། རིམ་གྲོ་བྱ་བ་དང་།
93b4 དགོན་པར་གནས་པ་དང་། མང་དུ་ཐོས་པ་དང་། སེམས་ཅན་རྣམས་གྱི་བྱ་བ་ལ་ཀུན་ཏུ་འགྲོ་བའི་བརྩོན་འགྲུས་བརྩམས་ཀྱང་ང་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ལུས་དང་། ངག་དང་། སེམས་ཀྱི་རྩོམ་པ་ལ་རབ་ཏུ་གནས་པའི་ཕྱིར
93b5 རོ། །ཚངས་པ་ནམ་ང་ལྷའི་བུ་འདིས་ཇི་སྐད་དུ་བསྟན་པའི་བརྩོན་འགྲུས་དེ་ལྟ་བུ་དང་ལྡན་པར་གྱུར་པ་དེའི་འོག་ཏུ་ང་དེ་གཤེགས་པ་མར་མེ་མཛད་ཀྱིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ
93b6 པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །ཚངས་པ་དེ་ལྟ་བས་ན་བྱང་ཆུབ་སེམས་དཔའ་ལུང་བསྟན་པའི་ས་མྱུར་དུ་ཐོབ་པར་འདོད་པས་བརྩོན་འགྲུས་རྩོམ་པ་འདི་ལྟ་བུ་འདི་ལྟ་སྟེ། ཆོས་ཐམས་ཅད་ལ་རྩོམ་པ
93b7 མེད་པའི་བརྩོན་འགྲུས་འདི་ལ་རྩོམ་པར་བྱའོ། །གསོལ་པ་བཅོམ་ལྡན་འདས་རྩོམ་པ་མ་མཆིས་པའི་བརྩོན་འགྲུས་དེ་གང་ལགས། བཀའ་སྩལ་པ། ཚངས་པ་གང་དུས་གསུམ་མཉམ་པ་ཉིད་དང་ལྡན་པའི་བརྩོན་འགྲུས་རྩོམ་པའོ། །
93b8 གསོལ་པ། བཅོམ་ལྡན་འདས་དུས་གསུམ་མཉམ་པ་ཉིད་དང་ལྡན་པའི་བརྩོན་འགྲུས་རྩོམ་པ་གང་ལགས། བཀའ་སྩལ་པ། འདི་ལྟ་སྟེ། འདས་པའི་སེམས་ནི་ཟད། མ་འོངས་པ་ནི་མ་ཕྱིན། ད་ལྟར་བྱུང་བ་ལ།
iiif viewer powered by OpenSeadragon
