| e-texts navigator |
| Wylie |
86b1 ཀུན་ཤེས་པ་མེད་པ་དེ་ནི་ཀུན་ཤེས་པ་སྟེ། དངོས་པོ་ཇི་ལྟ་བ་དེ་བཞིན་དུ་དེའི་ཀུན་ཤེས་པ་ཡང་མེད་དོ། །སྨྲས་པ། ཅིའི་ཕྱིར་དངོས་པོ་མེད། སྨྲས་པ། དངོས་པོ་ནི་མིང་གི་རང་བཞིན་གྱིས་དབེན་ཏེ། དེའི་མིང་དང་རང་བཞིན་དབེན་ལ་དངོས
86b2 པོ་ཡང་གཞན་མ་ཡིན། བྱང་ཆུབ་ཀྱང་གཞན་མ་ཡིན་ནོ། །གལ་ཏེ་དངོས་པོ་ཡང་གཞན་ལ་བྱང་ཆུབ་ཀྱང་གཞན་དུ་ཟིན་ན་འདི་ལྟར་འདི་ལ་བྱང་ཆུབ་ཇི་ལྟ་བར་དངོས་པོ་ཡང་དེ་བཞིན་ནོ། །དེ་བས་ན་འདི་ལ་སེམས་ཅན་ཡང་གུད་ན་མེད་ལ་དེ
86b3 རྣམ་པ་གཞན་དུ་ཡང་རྟོགས་པར་མི་འགྱུར་ཏེ། གཞན་དུ་ན་བདག་གི་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དང་། བྱང་ཆུབ་ཀྱི་མཉམ་པ་ཉིད་ཀྱིས་བདག་གི་མཉམ་པ་ཉིད་རིག་པར་བྱེད་དེ། དེ་ལྟར་ན་བྱང་ཆུབ་རྟོགས་པར་འགྱུར་ཏེ།
86b4 གཞན་དུ་མ་ཡིན་པས་ན་དེའི་ཕྱིར་དེ་ལ་གཞན་དུ་འགྱུར་བ་མེད་དོ། །བདག་ནི་རྟག་ཏུ་བདག་མེད་པ་ཡིན་ཏེ། དེའི་ཕྱིར་དེ་ལ་རྣམ་པ་གཞན་དུ་འགྱུར་བ་མེད་དོ། །ཇི་ལྟར་ནམ་མཁའ་ལ་རྣམ་པ་གཞན་དུ་འགྱུར་བ་མེད་པ་དེ་བཞིན་དུ་ཆོས་ཐམས་ཅད་ལ་ཡང་གཞན
86b5 དུ་འགྱུར་བ་མེད་དོ། །དེ་ནས་ཚངས་པ་ཁྱད་པར་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འདི་ལྟར་ཆོས་འདི་དག་རབ་ཏུ་ཕྱེ་བ་ལས་ན་དེ་བཞིན་གཤེགས་པ་ནི་བདེན་པར་གསུངས་དཔའོ། །སྨྲས་པ། ཚངས་པ་དེ་བཞིན་གཤེགས
86b6 པས་ནི་ཆོས་གང་ཡང་རབ་ཏུ་མ་ཕྱེའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ཆོས་ཉིད་ཀྱང་མ་དམིགས་ན་གང་རབ་ཏུ་དབྱེ་བ་ལྟ་ཅི་སྨོས། སྨྲས་པ། འཇམ་དཔལ་ཅི་དེ་བཞིན་གཤེགས་པས་ཆོས་འདི་དག་ནི་འདུས་བྱས་སོ། །ཆོས་འདི་དག་ནི
86b7 འདུས་མ་བྱས་སོ། །ཆོས་འདི་དག་ནི་འཇིག་རྟེན་པའོ། །ཆོས་འདི་དག་ནི་འཇིག་རྟེན་ལས་འདས་པའོ་ཞེས་ཆོས་རྣམས་རྣམ་པར་མི་མཁྱེན་ཏམ། སྨྲས་པ་ཚངས་པ་འདི་ཇི་སྙམ་དུ་སེམས། སུས་ཀྱང་ནམཁའ་འདི་རབ་ཏུ་ཕྱེ་བ་འམ་ཤེས་པར་གྱུར་པ
86b8 ཡོད་དམ། སྨྲས་པ། འཇམ་དཔལ་དེ་མ་ཡིན་ནོ། །འཇམ་དཔལ་གྱིས་སྨྲས་པ། གང་ནམཁའ་ཞེས་བྱ་བ་དེ་སྐྱེ་བའམ་འགག་པར་འགྱུར་རམ། སྨྲས་པ་དེ་མ་ཡིན་ནོ། །སྨྲས་པ། ཚངས་པ་དེ་བཞིན་དུ་ཆོས་གང་ཡང་རུང་བའི་རྣམ་པར
iiif viewer powered by OpenSeadragon
