| e-texts navigator |
| Wylie |
35a1 སོང་བ་དེ་དང་དེ་དག་ཏུ་ནམཁའ་མཐོང་ངོ་། །དེ་བཞིན་དུ་དགེ་སློང་འདི་དག་ཇི་སྲིད་དུ་རིང་དུ་སོང་ཡང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་མཚན་ཉིད་ལས་མ་འདས་སོ། །འདི་ལྟ་སྟེ
35a2 དཔེར་ན། སྐྱེས་བུ་གཞན་ཞིག་ནམཁའ་རྙེད་པར་བྱའོ། །ཞེས་ནམཁའ་ཚོལ་ཏེ། ཕྱོགས་དང་ཕྱོགས་འཚམསུ་རྒྱུག་ཅིང་ཇི་ཙམ་ནས་ནམཁའི་མིང་ནས་བརྗོད་ཀྱང་ནམཁའ་མི་རྙེད་དོ། །དེ་ནམཁའ་དེ་ཉིད་ཀྱི
35a3 ནོང་ནས་འགྲོ་ཡང་དེ་མི་མཐོང་ངོ་། །དེ་ཅིའི་ཕྱིར་ཞེ་ན། གང་ནམཁའ་ཞེས་བྱ་བ་འདི་ནི་མིང་ཙམ་མོ། །རིགས་ཀྱི་བུ་དེ་བཞིན་དུ་དགེ་སློང་འདི་དག་ཀྱང་མྱ་ངན་ལས་འདས་པ་དངོས་པོར་ཚོལ་ཏེ། མྱ་ངན་ལས་འདས
35a4 པ་དེ་ཉིད་ལ་རྣམ་པར་སྤྱོད་ཀྱང་དེ་མི་མཐོང་ཁོང་དུ་མི་ཆུད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་གང་མྱ་ངན་ལས་འདས་པ་ཞེས་བྱ་བ་དེ་ནི་མིང་ཙམ་མོ། །ཇི་ལྟར་ནམཁའ་ནམཁའ་ཞེས་བརྗོད་ཀྱང་གཟུང་དུ་མེད་པ
35a5 དེ་བཞིན་དུ་མྱ་ངན་ལས་འདས་པ་མྱ་ངན་ལས་འདས་པ་ཞེས་བརྗོད་པ་འང་གཟུང་དུ་མེད་པའོ། །དེ་ནས་དགེ་སློང་ལྔ་བརྒྱ་པོ་དེ་དག་བཤད་པ་འདི་ཐོས་ནས་ཟག་པ་ལེན་པ་མེད་པར་སེམས་རྣམ་པར་གྲོལ་ཏེ།
35a6 མངོན་པར་ཤེས་པ་ཐོབ་པ་དེ་དག་གིས་ཚིག་སྨྲས་པ། བཅོམ་ལྡན་འདས་གང་རྣམས་ཆོས་ཐམས་ཅད་ཤིན་ཏུ་ཡོངསུ་མྱ་ངན་ལས་འདས་པ་ལ་མྱ་ངན་ལས་འདས་པ་དངོས་པོར་ཚོལ་བ་དེ་དག་ལ་སངས་རྒྱས་འབྱུང
35a7 བ་མ་མཆིས་སོ། །བཅོམ་ལྡན་འདས་བདག་ཅག་ནི་སོ་སོ་སྐྱེ་བོ་ཡང་མ་ལགས། སློབ་པ་ཡང་མ་ལགས། དགྲ་བཅོམ་པ་ཡང་མ་ལགས། འཁོར་བའི་ཆོས་ཅན་ཡང་མ་ལགས། མྱ་ངན་ལས་འདས་པའི་ཆོས
35a8 ཅན་ཡང་མ་ལགས་སོ། །དེ་ཅིའི་ཕྱིར་ཞེ་ན། བཅོམ་ལྡན་འདས་སངས་རྒྱས་འབྱུང་བ་ནི་བྱེད་པ་དང་། སེམས་དང་གཡོ་བ་དང་། སྤྲོས་པ་ཐམས་ཅད་མ་མཆིས་པའོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ
iiif viewer powered by OpenSeadragon
