| e-texts navigator |
| Wylie |
20a1 བྱས་ནས། །སེམས་ཅན་ཀུན་ལ་བྱམས་པའི་སེམས་བསྐྱེད་ནས། །ཐོབ་དང་མ་ཐོབ་མི་དགར་ཡོང་མི་བྱ། །རྒྱལ་པོ་ཆེན་པོ་གཞན་ཡང་གང་ན་གུས་པ་མེད་པ་དང་། མ་དད་པ་དང་། གཞན་དག་ལ་སྡང་བ་དང་། གླགས་ལྟ་བ
20a2 དག་ཡོད་པ། དེར་ནི་དེ་བཞིན་གཤེགས་པ་རྣམས་དང་། དེ་བཞིན་གཤེགས་པའི་ཉན་ཐོས་རྣམས་ཡུན་རིང་དུ་མངོན་པར་དགའ་བར་མི་འགྱུར་ཏེ། མྱུར་བ་ཁོ་ནར་འདོང་བར་འགྱུར་རོ། །རྒྱལ་པོ་ཆེན་པོ་ཆོས་བཅུ་དྲུག་པོ་འདི་དག་ནི་མ
20a3 དད་པའི་གང་ཟག་སྟོན་པ་སྟེ། བཅུ་དྲུག་པོ་གང་ཞེ་ན། མི་འཐུན་པར་འཛིན་དུ་འཇུག་པ་དང་། སྡིག་པའི་བསྟན་པ་ལ་འཐད་པར་ལྟ་བ་དང་། ཆོས་ཀྱི་གཏམ་ལ་མི་འཐད་པར་ལྟ་བ་དང་། སྡིག་པའི་བསམ་པ་ཅན་དང་།
20a4 སེམས་ཁེངས་པ་དང་། གླགས་ལྟ་བ་དང་། ཁོང་གཡོ་ཅན་དང་། འཚོ་བ་ཡོངས་སུ་མ་དག་པ་དང་། བཀུར་སྟི་འདོད་པ་དང་། སེམས་ཀྱི་རྒྱུད་མི་དགེ་བ་དང་། སྦྱོར་བ་མེད་པ་དང་། གཞན་ལ་སྐུར་པ་འདེབས་པ་དང་།
20a5 ཅིག་ཏུ་ངེས་པར་སྐྱོན་འཛིན་པ་དང་། བསྟན་པ་ལ་མ་ངེས་པ་དང་། ལོག་པར་ལྟ་བ་དང་། ལས་ཀྱི་རྣམ་པར་སྨིན་པ་ལ་ཐེ་རྩོམ་ཟ་བ་སྟེ། རྒྱལ་པོ་ཆེན་པོ་ཆོས་བཅུ་དྲུག་པོ་དེ་དག་ནི་མ་དད་པའི་གང་ཟག་སྟོན་པའོ། །དེ་ནས
20a6 བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྗེས་སུ་བསྟན་པ་འཐུན་པར་མི་འཛིན་པ། །ཁྲོན་པ་རྙིང་པ་བཞིན་དུ་ཡོངས་སུ་སྤངས། །ཐར་དང་མི་མཐུན་རྒྱུན་གཞན་འགྲོ་བ་དེ། །སྡང
20a7 སེམས་མུ་བསྟེགས་ཅན་དང་ཁྱད་པར་མེད། །ལས་ཀྱི་རྣམ་པར་སྨིན་ལ་ཡིད་མི་ཆེས། །ཡིད་མི་ཆེས་པས་གཞན་ལ་འདོམས་མི་བྱེད། །བདག་ཉིད་རི་རབ་ཟོམ་ལྟར་མཐོར་འཛིན་ཏེ། །ང་རྒྱལ་མྱོས་པ་དེ་ནི་དེ་བཞིན་བྱེད། །
20a8 ལེགས་པར་གསུངས་པའི་ཆོས་ནི་སྟོན་པ་ན། །སྡིག་པའི་སྤྱོད་ཡུལ་ཅན་དེ་མི་འཐད་འཛིན། །དད་མེད་ཆོས་ལ་སོམ་ཉིས་བསྐྱེད་ནས་ནི། །བསྐལ་པ་བྱེ་བ་མང་པོར་སྨྱོན་པར་འགྱུར། །མ་དད་པའི་བསམ་པས་སྡིག་ཅན
iiif viewer powered by OpenSeadragon
