| e-texts navigator |
| Wylie |
178b1 ཐམས་ཅད་ལ། །ཤིན་ཏུ་བརྟན་པར་གནས་པ་ཡིན། །བརྟན་པོ་དེ་དག་འཇིག་རྟེན་ན། །མྱ་ངན་འདས་པའང་རེག་གྱུར་ནས། །མཆོད་པའི་གནས་སུ་འོས་པར་འགྱུར། །གང་དག་ཤེས་རབ་འཆལ་པ་དང་། །ལེ་ལོ་ཅན་དང་དམན་ལ་བརྩོན། །ཐོས་པ་ཉུང་དང་སྦིག་པ་འདོད།
178b2 ང་རྒྱལ་ཐ་བ་ཁྲ་འགྱུར་གནས། །མགོ་ལ་སྤུ་གྲི་སྟེན་བྱེད་ཅིང་། །ཤིང་གིས་ཁ་བསྒྱུར་ཆོས་གོས་གྱོན། །སྟོང་པ་ཉིད་ནི་དོན་མེད་པ། །དེ་ནི་མཁས་པ་སྒོམ་མི་བྱེད། །ཆོས་ལ་སུན་འབྱིན་ཐེག་ཆེན་གྱི། །བསྔགས་པ་མ་ཡིན་རྗོད་པར་བྱེད། །གང་ཞིག་ཆོས་འདི་བསྟན
178b3 པ་རྣམས། །ཇི་ལྟར་བསྟན་པ་དེ་བཞིན་དུ། །ནག་པོའི་ཕྱོགས་ལ་ཀུན་ཏུ་ཆགས། །དེས་ནི་ངན་འགྲོར་འགྲོ་བར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཡུལ་འཁོར་སྐྱོང་དང་། དགེ་སློང་དེ་དག་དང་། ལྷ་དང་མི་དང་།
178b4 ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སྷོ།། །།
178b5 @#། །རྒྱ་གར་སྐད་དུ། ཨཱརྱ་བི་ཀུ་རྦན་རཱ་ཇེ་པ་རི་པྲིཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རྣམ་པར་འཕྲུལ་པའི་རྒྱལ་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས
178b6 དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉེན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་ཉི་ཁྲིའི་དགེ་སློང་གི་དགེ་འདུན་མང་པོ་དང་། བྱང་ཆུབ
178b7 སེམས་དཔའ་བྱམས་པ་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། སེང་གེ་བློ་གྲོས་དང་། སེང་གེའི་ཏོག་དང་། སེང་གེའི་རྩལ་གྱིས་འགྲོ་བ་ལ་སོགས་པ་ཐམས་ཅད་ཀྱང་སྐྱེ་བ་གཅིག་གིས་ཐོགས་པ་ཁྲི་དང་ཡང་ཐབས་གཅིག་ཏུ
178b8 བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པའི་རྒྱལ་པོ་ཡང་དེ་ཉིད་དུ་འདུས་པར་གྱུར་ཏེ་འདུག་གོ། །ཡང་དེའི་ཚེ་བཅོམ་ལྡན་འདས་འཁོར་འབུམ་ཕྲག་དུ་མའི་ནང་ན་འདི་ལྟ་སྟེ། ཐེག་པ་ཆེན་པོ་ལ་ཡང་དག་པར་ཞུགས་པ་ཉིད
iiif viewer powered by OpenSeadragon
