| e-texts navigator |
| Wylie |
12b1 བཅུར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཆོས་བརྒྱད་ཀྱིས་མི་ཚུགས་པའི་ཏིང་ངེ་འཛིན་སྒྲུབ་པ་ལ་བརྩོན་པ་དང་། གཟུངས་ཡོངས་སུ་ཚོལ་བ་ལ་བརྩོན་པ་དང་། དམ་པའི་ཆོས་ཡོངས་སུ་གཟུང་བའི་ཕྱིར་རྣམ་པར་ཤེས
12b2 པ་ལ་མཁས་པ་དང་། གང་ཟག་གང་དག་མངོན་པར་བརྩོན་པ་དེ་དག་གོས་དང་ཟས་དང་། མལ་ཆ་དང་། སྟན་དང་། ནད་ཀྱི་གསོས་སྨན་དང་། ཡོ་བྱད་རྣམས་བསྟབས་པས་ཡོངས་སུ་མི་སྐྱོ་བ་དང་། བྱང་ཆུབ་ཡང་དག་པར་འཛིན་དུ་འཇུག་པ་ལ
12b3 བརྩོན་པ་དང་། ལེགས་པར་བསམ་པ་སེམས་པ་དང་། ལེགས་པར་སྨྲ་བས་སྨྲ་བ་དང་། ལེགས་པའི་ལས་བྱེད་པ་དང་། རབ་ཏུ་འབྱུང་བ་སེམས་པ་དང་། རྒྱལ་པོ་ལ་དགའ་བ་ལ་སྐྱོན་དུ་རྟོག་པ་དང་། གཟུགས་སྡུག་ཅིང་གཟུགས་བཟང
12b4 བ་ཐམས་ཅད་ལ་མི་ལྟ་བའི་ཡིད་དང་ལྡན་པ་དང་། ཐ་ན་རྒྱལ་པོ་གཅིག་པུར་སྲེད་པས་བསྒྲུབ་པ་ལ་ཡང་མི་ལྟ་བའི་ཡིད་དང་ལྡན་པ་སྟེ། བཅུ་པོ་འདི་དག་ཡིན་ནོ། །རྒྱལ་པོ་ཆེན་པོ་ཆོས་བཞི་པོ་འདི་དག་དང་ལྡན་པའི་རྒྱལ་རིགས་སྤྱི་བོར
12b5 ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་དེ་དག་ཐོབ་པར་འགྱུར་རོ། །རྒྱལ་པོ་ཆེན་པོ་གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་གང་ཟག་གང་དག་བླ་ན་མེད་པ་ཡང་དག་པར་རྫོགས
12b6 པའི་བྱང་ཆུབ་བསྐལ་པ་གྲངས་མེད་པ་བྱེ་བ་ཁྲག་ཁྲིག་ཕྲག་འབུམ་གྱིས་ཡང་དག་པར་བསྒྲུབ་པ་འདི་འཛིན་པ་དང་། ཀློག་པ་དང་། སྟོན་པ་དེ་དག་ལ་ཆོས་བཞིན་དུ་བསྲུང་བ་དང་། སྐྱོབ་པ་དང་། སྦེད་པར་བྱེད་ལ་སེམས་ཅན་གང
12b7 དག་གང་ཟག་ལ་དེ་ལྟ་བུ་དག་ལ་གནོད་པ་བྱེད་པའི་རང་བཞིན་ཅན་གྱི་གང་ཟག་དེ་ལྟ་བུ་དེ་དག་ལ་ནི་འདི་ལྟར་ཆོས་ཀྱི་ལོངས་སྤྱོད་འདི་ལ་སྤྱོད་པ་ཡོངས་སུ་བསྲུང་བའི་ཕྱིར་ཆད་པས་བཅད་པར་བྱེད་དོ། །དེའི་དམ་པའི་ཆོས་ཡོངས
12b8 སུ་འཛིན་པ་དེ་ཡང་རྣམ་པ་བཅུར་རིག་པར་བྱ་སྟེ། བཅུ་གང་ཞེ་ན་འདི་ལྟ་སྟེ། ཡང་དག་པར་བསྒྲུབ་པ་དང་། ངེས་པར་ཕངས་པར་བྱེད་པ་དང་། ཆོས་ལ་མོས་པ་དང་། འཁྲུལ་པ་མེད་པར་ཀུན་དུ་སྤྱོད་པ་དང་། ཡེ་ཤེས་འདོད་ཅིང
iiif viewer powered by OpenSeadragon
