| e-texts navigator |
| Wylie |
104a1 གཤེགས་པ་ལ་ཕུལ་ནས་ཚིགས་སུ་བཅོད་པ་འདི་དག་གསོལ་ཏོ། །ཐུབ་པ་བདག་འདིར་མངོན་གསུམ་སྟེ། །ཇི་ལྟར་ཁྱོད་ཀྱིས་སྔོན་སྤྱད་པ། །དེ་བཞིན་བདག་ཀྱང་སངས་རྒྱས་ཀྱི། །ཡེ་ཤེས་ཚོལ་བས་བསྒྲུབ་པར་བགྱི། །ཁྱོད་ཀྱིས
104a2 སྔོན་ཆད་མ་སྩལ་ཅིང་། །ཡོངསུ་མ་བཏང་ཅི་མ་མཆིས། །བདོག་པ་ཐམས་ཅད་གཏོང་བ་ཡི། །བདག་ཀྱང་རྗེསུ་བསླབ་པར་བགྱི། །ཁྱོད་ཀྱི་མདོ་སྡེ་འདི་ཡང་ནི། །འཇིག་རྟེན་མགོན་ལས་མངོན་དུ་བླངས། །ཡང་དང་ཡང་དུ་བཤད་པར་བགྱི། །
104a3 བདག་པོ་ཁྱོད་ལ་བགྱིས་པར་གཟོ། །མདོ་སྡེ་འདི་ལ་སུ་དགའ་བ། །དེ་དག་བདག་གི་སྟོན་པ་འདྲ། །བདག་ནི་སངས་རྒྱས་ཆོས་འཚལ་བས། །དེ་ལ་རྟག་ཏུ་རིམ་གྲོ་བགྱིད། །དམ་པའི་ཆོས་རྣམས་ཡོངསུ་བསྲུང་། །མགོན་པོ་ཉན་ཐོས་མི
104a4 ནུས་ཏེ། །ཕྱི་དུས་འཇིག་པ་ཆེན་པོའི་ཚེ། །བདག་གིས་ཡོངསུ་བསྲུང་བར་བགྱི། །མགོན་པོ་བདག་ཀྱང་དབུགས་དབྱུང་གསོལ། །ལྷ་རྣམས་ཐེ་རྩོམ་གཅད་དུ་གསོལ། །ཐུབ་པ་ཁྱུ་མཆོག་ཁྱོད་འདྲ་བར། །ཇི་སྲིད་ཡུན་གྱིས་འགྲུབ་པར་འགྱུར།
104a5 ཀུན་མཁྱེན་ཡེ་ཤེས་མཁས་པ་ཡི། །བདེ་བར་གཤེགས་པས་དེ་ལུང་བསྟན། །ང་ནི་ཅི་འདྲ་དེ་འདྲ་བར། །ཁྱོད་ཀྱང་རྫོགས་པའི་སངས་རྒྱས་འགྱུར། །བསྐལ་པ་བྱེ་བ་ཕྲག་སྟོང་དང་། །བསྐལ་པ་བྱེ་བ་བརྒྱ་ཡི་ཚེ། །འཇིག་རྟེན་དུ་ནི
104a6 སངས་རྒྱས་འགྱུར། །མིང་ནི་ཡེ་ཤེས་འབྱུང་ཞེས་བྱ། །བྱང་ཆུབ་ཞི་བ་ཐོབ་ནས་ཀྱང་། །བདུད་རྣམས་རབ་ཏུ་བཏུལ་ནས་ནི། །སེམས་ཅན་བྱེ་བ་བརྒྱ་སྟོང་རྣམས། །བྱང་ཆུབ་ལ་ཡང་འགོད་པར་འགྱུར། །དེ་ནས་མི་འཇེད་ཀྱི་བདག་པོ་ཚངས་པས
104a7 བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བསམ་གཏན་ལ་གནས་པ་ཡང་བཏང་སྟེ། རིགས་ཀྱི་བུ་འམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་ཡང་དག་པར་སྟོན་པ་དེ་ལ་ཆོས་ཉན་དུ་མཆིའོ། །དེ་ཅིའི་སླད་དུ་ཞེ་ན།
104a8 བརྒྱ་བྱིན་དང་ཚངས་པ་ནི་འདི་ལས་སྐྱེས་ཏེ། བཅོམ་ལྡན་འདས་བདག་རིགས་ཀྱི་བུའམ་རིགས་ཀྱི་བུ་མོ་དེ་དག་ལ་བསྙེན་བཀུར་དང་རིམ་གྲོ་བགྱི་བར་སྤྲོའོ། །དེ་དག་ནི་ལྷ་དང་བཅས་པའི་འཇིག་རྟེན་གྱིས་རིམ་གྲོ་བགྱི་བ་དང་མཆོད་པར་འོས་པ་ལགས་སོ། །
iiif viewer powered by OpenSeadragon
