| e-texts navigator |
| Wylie |
25a1 ལག་རབ་ཏུ་བསྟན། །མཉམ་སྟེ་མི་མཉམ་མེད་པའི་ཆོས། །ཡང་དག་ལྟ་བ་ཡིན་ཞེས་བརྗོད། །གཉིས་མེད་ཆོས་ལ་བསྒོམ་པ་ནི། །སྐྱེ་བ་མེད་པའི་ལམ་བསྒོམ་ཡིན། །སྐྱེ་བ་མེད་པ་མི
25a2 རྟག་དོན། །འབྱུང་བ་མེད་པ་སྡུག་བསྔལ་ཏེ། །རྒྱུ་བ་མེད་པ་བདག་མེད་དོན། །ཞི་དོན་ཉེ་བར་ཞི་བའི་གནས། །དུལ་བའི་སེམས་ནི་སྦྱིན་པ་ཡིན། །ཞི་བའི་སེམས་ནི་ཚུལ་ཁྲིམས་ལྡན། །ཟད་པའི་ཆོས
25a3 རྟོགས་བཟོད་པ་ཡིན། །བརྩོན་འགྲུས་རྣམ་པར་ཕྱེ་བས་རྟོགས། །ཤིན་དུ་ཞི་བའི་བསམ་གཏན་ཏེ། །ཤེས་རབ་ཡང་དག་རབ་ཤེས་པ། །སེམས་ཅན་གདོད་ནས་རྣམ་དག་དོན། །བྱམས་པ་ཞེས
25a4 ནི་བརྗོད་པ་ཡིན། །སྙིང་རྗེ་ནམ་མཁའ་འདྲ་བ་སྟེ། །དགའ་བ་སྤྱོད་པ་དགའ་བ་ཡིན། །རྩོམ་པ་ཐམས་ཅད་རྒྱུན་ཆད་པ། །བཏང་སྙོམས་ཤེས་ནི་རབ་ཏུ་བསྟན། །འཁོར་གསུམ་ཡོངས་སུ་ཆད་པར་ནི། །
25a5 ཆོས་རྣམས་ཐམས་ཅད་རབ་ཏུ་ཤེས། །ཆོས་རྣམས་ངེས་པར་འབིགས་འདི་ནི། །ལྟ་བའི་མདུད་པ་གཅོད་པ་ཡིན། །བསམ་གཏན་ཤེས་རབ་གང་ཡིན་པ། །དེར་ནི་ངེས་པར་འབིགས་པ་བསྟན། །
25a6 ཚད་མེད་པ་ལ་འཇུག་པ་ནི། །ཆོས་ཤེས་པ་ཞེས་བརྗོད་པ་ཡིན། །གནོད་པ་བཟོད་པ་དང་ངེས་པར་འབིགས་པ་ཞེས་བྱ་བའི་ལེའུ་སྟེ་གཉིས་སོ།། །། དེ་ནས་བཅོམ་ལྡན་འདས་ཀྱིས་བྱང་ཆུབ
25a7 སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་ལ་བཀའ་སྩལ་པ། བློ་གྲོས་རྒྱ་མཚོ་དེ་ལྟར་ན་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་པ་དང་ཡོངས་སུ་དག་པར་འགྱུར་ཏེ།
25a8 བསམ་པ་བཅོས་མ་མ་ཡིན་ཞིང་སེམས་ཅན་ཐམས་ཅད་ཀྱིས་གནོད་པར་བྱས་ཀྱང་ཞེ་འགྲས་པ་མེད་ལ། ཤིན་དུ་ངེས་པར་ཕིགས་པའི་ཡེ་ཤེས་སུ་གྱུར་ཅིང་། ཤེས་རབ་རྣམ་པར་གདོན་མི་ཟ་བ་ཐོབ་པ་དེའི་ཚེ།
iiif viewer powered by OpenSeadragon
