| e-texts navigator |
| Wylie |
195b1 ཡང་བསྟན། སེམས་ཅན་རྣམས་ཀྱི་དགེ་བའི་རྩ་བ་ཤིན་ཏུ་དཀའ་བ་དག་ཀྱང་ཡང་དག་པར་བསྐྱེད། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡང་དག་པར་བསྒྲུབས་ཟིན་གྱིས་དེ་བཞིན་དུ་ཐམས་ཅད་རྗེས་སུ་ཡོངས་སུ་ཟུང་ལ
195b2 ཅི་ནས་ཀྱང་ཉམས་པར་མི་འགྱུར་བ་དེ་ལྟར་གྱིས་ཤིག་། དེ་ནས་བཅོམ་ལྡན་འདས་ཀྱིས་དེའི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར
195b3 འདུ་མཛད་པས་སངས་རྒྱས་བཅོམ་ལྡན་འདས་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་དག་ཏུ་ཆོས་བསྟན་པ་དེ་དག་སངས་རྒྱས་ཀྱི་ཞིང་འདི་ན་གནས་པའི་སེམས་ཅན་རྣམས་ཀྱིས་ཐོས་པར་གྱུར་ཏེ། སངས་རྒྱས
195b4 བཅོམ་ལྡན་འདས་དེ་དག་གིས་ཆོས་གང་དག་བསྟན་པའི་ཆོས་དེ་དག་སྟོན་ཅིང་ཆོས་དེ་དག་ཀུན་དུ་ཤེས་པར་གྱུར་པའི་སེམས་ཅན་གང་གཱའི་ཀླུང་གི་བྱེ་མ་སྙེད་ནི་ཐེག་པ་གསུམ་ལ་རབ་ཏུ་བཀོད་པར་གྱུར་ཏོ། །བྱེ་བ་འབུམ
195b5 ཕྲག་བཅུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་པར་གྱུར་ཏོ། །སྲོག་ཆགས་བྱེ་བ་ཁྲག་ཁྲིག་འབུམ་ཕྲག་བཅུ་ནི་རང་བྱང་ཆུབ་ལ་རབ་ཏུ་བཀོད་པར་གྱུར་ཏོ། །སེམས་ཅན་དེ་བས་ལྷག་པ་རྣམས
195b6 ནི་ཟག་པ་ཟད་པ་ལ་གནས་པར་གྱུར་ཏོ། །དེ་ལྟར་ཆོས་བསྟན་པ་འདིས་སེམས་ཅན་ཁྲག་ཁྲིག་ཕྲག་ཚད་མེད། དཔག་ཏུ་མེད། བགྲང་དུ་མེད། གཞལ་དུ་མེད་ཅིང་བསམ་གྱིས་མི་ཁྱབ་པ་རྣམས་ཀྱི་དོན་བྱས་པར་གྱུར་ཏོ། །
195b7 དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ནི་ང་ཡོངས་སུ་མྱ་ངན་ལས་འདའ་ཡིས་ཁྱེད་ཀྱིས་ཅི་ནས་ཀྱང་སངས་རྒྱས་ཀྱི་བསྟན་པ་ཀུན་ཏུ་བསྲུང་བ་ལ་ནན་ཏན་གྱིས་ཤིག་།དགེ་སློང་དག་ཁྱེད
195b8 ཀྱིས་བདག་ལ་ཕན་པ་དང་། གཞན་ལ་ཕན་པའི་ཕྱིར་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན
iiif viewer powered by OpenSeadragon
