| e-texts navigator |
| Wylie |
78b1 ནས་རྒྱལ་པོ་ཆེན་པོ་ལ་འབུལ་བར་བྱེད་དེ། དེ་ན་སེམས་ཅན་གཞན་དག་རང་གི་ཡུལ་ན་འབྲས་སཱ་ལུ་ལ་སོགས་པ་སྔོན་མ་མཐོང་དུ་ཟིན་ཀྱང་རྒྱལ་པོའི་ལོངས་སྤྱོད་ཀྱི་མཐུས་ཟ་བར་བྱེད་དོ། །རིགས་ཀྱི་བུ་དེ་བཞིན་དུ་གང་ན་གང་ཟག་ཆོས་ཀྱི་སྡེ་དཔོན་བྱེད་པ་བཞི་པོ
78b2 དེ་དག་གནས་པ་དེ་ཉིད་དུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གཅིག་ཀྱང་འཇིག་རྟེན་དུ་བྱུང་ངམ་ཡང་ན་གང་ན་གནས་ཀྱང་རུང་སྟེ། དེར་དེའི་དོན་དུ་དེ་དག་གིས་ཐེག་པ་ཆེན་པོའི་མདོ་སྡེའི་མཚན་དག་གླ་རྔན་གྱིས་འདྲི་ཞིང་འདྲིར་འཇུག
78b3 སྟེ་བསྒྲུབས་ནས་གླེགས་བམ་ཕྱི་ཚས་སུ་བཅུག་སྟེ། རྙེད་པ་དང་བཀུར་སྟིའི་ཕྱིར་རམ། ཆོས་སྤྱོད་པའི་ཕྱིར་རམ། རྟེན་བཅའ་བའི་ཕྱིར་བཀུར་བར་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་བསྙེན་བཀུར་བྱེད་ཅིང་སྐྱེ་བོ་མང་པོ་ཐེག
78b4 པ་ཆེན་པོའི་བཅུད་ཀྱིས་ལོངས་སྤྱོད་པར་འགྱུར་ཏེ། རྒྱལ་པོའི་མཐུས་འབྲས་སཱ་ལུ་ཟ་བ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་གཟི་བརྗིད་ཀྱི་མཐུས་སེམས་ཅན་རྣམས་ཀྱིས་སྔོན་མ་ཐོས་པའི་ཚིག་གི་ཡི་གེ་འབྲུ་གཅིག་པའི་ཐིག
78b5 ལེ་ཐོས་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ས་ཕྱོགས་གང་ན་སྤྱོད་པའི་ས་ཕྱོགས་ནི་རྡོ་རྗེའི་རང་བཞིན་དུ་འགྱུར་རོ། །སེམས་ཅན་དེ་དག་ཀྱང་རྡོ་རྗེའི་རང་བཞིན་དུ་འགྱུར་རོ་ཞེས་ང་ཟེར་རོ། །སེམས་ཅན་ཕལ་པ
78b6 བསོད་ནམས་ཆུང་ངུ་རྣམས་ཐེག་པ་ཆེན་པོ་ཐོས་ན་ཐེག་པ་ཆེན་པོའི་མདོའི་སྡེ་ཚན་གྱི་དོན་འཛིན་པར་མི་བྱེད་དེ། ཐོས་ན་དོན་འཛིན་པར་མི་བྱེད་པའི་སེམས་ཅན་གང་ཡིན་པ་དེ་དག་ནི་ཁྲེ་རྒོད་ཟ་བ་བཞིན་དུ་མྱ་ངན་དུ་བྱ་བ་ཡིན་ནོ། །གསོལ་པ། དེ་བཞིན
78b7 གཤེགས་པ་འདས་ནས་ལོ་བཞི་སྟོང་གི་བར་དུ་འཛམ་བུའི་གླིང་དུ་གནས་པའི་རྗེས་ལ་སའི་འོག་ཏུ་ནུབ་པར་གྱུར་ནས་ཡུན་ཇི་སྲིད་ཅིག་ན་སླར་ཡང་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གི་ཚེ
78b8 ངའི་དམ་པའི་ཆོས་ཀྱི་འཇུག་ལོ་བརྒྱད་བཅུ་ལུས་པར་གྱུར་ཏེ། དམ་པའི་ཆོས་ནུབ་ཏུ་ཆ་བ་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་འཛམ་བུའི་གླིང་དུ་འབྱུང་བར་འགྱུར་ཏེ། ལོ་བཞི་བཅུའི་བར་དུ་དམ་པའི་ཆོས་ཀྱི་ཆར་ཕབ་ནས
iiif viewer powered by OpenSeadragon
