| e-texts navigator |
| Wylie |
74b1 ཁྱེར་ཏེ་མ་འོངས་སོ་ཞེས་ཟེར་ཏེ། དགྲ་སྟ་བདར་ནས་གསད་པར་བྱས་པ་དང་། དགྲ་སྟ་བདར་བའི་བར་དེའི་སྐབས་སུ་དེའི་མ་སྐྲག་ནས་སོག་མའི་ཕུང་པོའི་ནང་དུ་ཞུགས་སོ། །དེ་ནས་དེ་དགྲ་སྟ་ཐོགས་ཏེ་སོག་མའི་ཕུང་པོ་ལ་བསྣུན་ནས་ད་ནི་བདག་གི་མ་ཤིའོ་སྙམ་སྟེ།
74b2 མི་གཞན་གྱིས་འཇིགས་ནས་སོག་མ་ལེགས་པར་མ་བརྟགས་སོ། །དེ་ནས་མ་དེ་དེའི་ནང་ནས་བྱུང་སྟེ་སོང་ངོ་། །དེ་ནས་དེ་བདག་གི་མ་ཤི་ཟིན་ནོ་སྙམ་སྟེ་སེམས་དགའ་བར་གྱུར་ན། མཚམས་མེད་པ་བྱེད་པ་ཞེས་བྱ་འམ། འོན་ཏེ་མི་བྱ། གསོལ་པ། མ་སོད
74b3 པ་ཞེས་མི་བགྱི་ལགས་སོ། །ཡང་གསོལ་པ་ཅི་ལགས། མཚམས་མ་མཆིས་པའི་ལས་ཀྱི་རྒྱུའི་དངོས་པོ་ཞུ་བར་འཚལ་ལམ། བཀའ་སྩལ་པ། ཕ་མའི་ཕུང་པོ་བཤིག་པས་མཚམས་མེད་པ་བྱེད་པ་ཞེས་བྱ་བས་དེའི་ཕྱིར་དེ་མཚམས་མེད་པ་བྱེད་པ
74b4 ནི་མ་ཡིན་གྱི། མ་གསོད་པའི་སེམས་བསྐྱེད་པ་བརྩལ་བས་ན་མཚམས་མེད་པ་བྱེད་པ་དང་འདྲ་བ་ཡིན་ནོ། །ཕུང་པོ་དང་ཁམས་དང་སྐྱེ་མཆེད་ཀྱི་དངོས་པོ་མ་བཤིག་གི་བར་དུ་མཚམས་མེད་པ་བྱེད་པ་རྫོགས་པ་ཞེས་མི་བྱ་སྟེ། འདིར་རྒྱུའི་དབང་གིས་ཆོས་དེ
74b5 ཁོ་ན་ཉིད་རིག་པར་བྱའོ། །གསོལ་པ། བཅོམ་ལྡན་འདས་ལེགས་ལགས་སོ། །ལེགས་ལགས་སོ། །དེ་ལྟར་རྒྱུའི་དབང་གིས་རིག་པར་ཡང་བགྱི། རིག་པར་ཡང་མི་བགྱི་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་ངས་རྒྱུའི་དབང་གིས་ཐར་པ
74b6 བརྗོད་པ་ཡིན་ནོ། །རྒྱུའི་སྒོ་ནས་མྱ་ངན་ལས་འདས་པ་ཡོན་ཏན་དཔག་ཏུ་མེད་པ་དང་ལྡན་པ་དཔེ་མེད་པ་ཁོ་ན་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བ་ཡང་ཡོན་ཏན་དཔག་ཏུ་མེད་པ་དང་ལྡན་པ་ཡིན་ནོ། །དེ་བཞིན་གཤེགས
74b7 པ་ཡོངས་སུ་མྱ་ངན་ལས་འདའ་བར་མཛད་དེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་དོན་ནི་དེ་ཡིན་ནོ། །གསོལ་པ། དེ་བཞིན་གཤེགས་པ་ནི་ཟད་པར་འགྱུར་བ་མ་ལགས་སོ། །དེ་བཞིན་གཤེགས་པ་ནི་སྐུ་ཚེ་ཟད་མི་ཤེས་པ་ལགས་པར
74b8 བལྟ་བར་བགྱིའོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དམ་པའི་ཆོས་སྲུང་བས་ནི་དེ་སྐད་བྱ་བའི་རིགས་སོ། །བདག་གི་ཐེ་ཚོམ་ངེས་པར་བྱེད་འདོད་པས་ནི་དེ་ལྟར་བྱ་བའི་རིགས་སོ། །དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན
iiif viewer powered by OpenSeadragon
