| e-texts navigator |
| Wylie |
66b1 པ་ཆོས་ཀྱི་འཁོར་ལོ་བསྐོར་བ་ལ་ནི་སྒྲ་གཞན་མེད་དེ། དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་གཉེན་པོ་མེད་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །མྱ་ངན་མེད་པ་མྱ་ངན་མེད་པ་ཞེས་བྱ་བ
66b2 ནི་གང་ལ་མྱ་ངན་མེད་པ་སྟེ། ཇི་ལྟར་རྒྱལ་པོ་དཀྲུགས་མ་བྱེད་པའི་རྒྱལ་པོ་གཞན་གྱིས་རྒྱལ་སྲིད་ཕྲོགས་ཏེ་ཡུལ་འཁོར་བཅོམ་ཞིང་བཤིག་པ་ན་ཤིན་ཏུ་མྱ་ངན་གྱིས་ཐེབས་པ་བཞིན་དུ་མྱ་ངན་ལས་འདས་པ་ནི་དེ་ལྟ་མ་ཡིན་ཏེ། ཇི་ལྟར་རྒྱལ་པོ་གཞན
66b3 གྱིས་མ་ཚུགས་ཏེ་དགྲ་དང་བྲལ་བར་གྱུར་ནས་མྱ་ངན་མེད་པ་བཞིན་དུ་ཐར་པ་ཐོབ་པ་རྣམས་ཀྱང་མྱ་ངན་མེད་པའོ། །ཐར་པ་གང་ཡིན་པ་དེ་ནི་མྱ་ངན་ལས་འདས་པའོ། །མྱ་ངན་ལས་འདས་པ་གང་ཡིན་པ་དེ་ནི་དེ་བཞིན་གཤེགས་པའོ། །མྱ་ངན་དང་བྲལ་བ་མྱ
66b4 ངན་དང་བྲལ་བ་ཞེས་བྱ་བ་ནི་ཇི་ལྟར་བུད་མེད་རང་གི་བུ་དམག་ཏུ་སོང་ནས་ཤིའོ་ཞེས་ཐོས་པ་ལས་ཕྱིར་འོངས་པ་མཐོང་ནས་མྱ་ངན་དང་བྲལ་བར་འགྱུར་བ་བཞིན་དུ་མྱ་ངན་ལས་འདས་པ་ནི་དེ་ལྟ་མ་ཡིན་ཏེ། ཐར་པ་ནི་རྟག་ཏུ་མྱ་ངན་དང་བྲལ་བའོ། །ཐར་པ
66b5 གང་ཡིན་པ་དེ་ནི་དེ་བཞིན་གཤེགས་པའོ། །རྡུལ་མེད་པ་རྡུལ་མེད་པ་ཞེས་བྱ་བ་ལ་རྡུལ་ཞེས་བྱ་བ་ནི་ས་རྡུལ་དང་ཉལ་ཉིལ་ཡིན་ཏེ། ཇི་ལྟར་དཔྱིད་ཀྱི་དུས་ན་ཕྱི་དྲོ་རླུང་ལངས་པས་ས་རྡུལ་བསླང་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །རྡུལ་མེད་པ་ཞེས
66b6 བྱ་བ་ནི་ཇི་ལྟར་རྒྱལ་པོའི་གཙུག་གི་ནོར་བུ་དག་པ་དེ་བཞིན་དུ་རང་བཞིན་གྱི་རྡུལ་མེད་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །རྡུལ་དང་བྲལ་བ་རྡུལ་དང་བྲལ་བ་ཞེས་བྱ་བ་ནི་ཇི་ལྟར་གསེར་ཡོངས་སུ་དག་པ་སྟེ། གསེག་མ
66b7 དང་རྡོ་མེད་པར་གྱུར་པ་དབྱིག་ཏུ་རེད་པ་རང་བཞིན་དུ་གྱུར་པ་དེ་བཞིན་དུ་སྐྱོན་བྱང་བའི་རང་བཞིན་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སོབ་སོབ་པོ་མ་ཡིན་པ་སོབ་སོབ་པོ་མ་ཡིན་པ་ཞེས་བྱ་བ་ནི་ཁམ་པའི་ཞོའི་བུམ་པ་གས་པ་བཞིན
66b8 དུ་ཐར་པ་ནི་དེ་ལྟ་མ་ཡིན་ཏེ། ལྕགས་དང་རྡོ་རྗེའི་བུམ་པ་བཞིན་དུ་སོབ་སོབ་པོ་མ་ཡིན་པ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སོབ་སོབ་པོ་མ་ཡིན་པའི་ཆོས་ཅན་སོབ་སོབ་པོ་མ་ཡིན་པའི་ཆོས་ཅན་ཞེས་བྱ་བ་ནི་ཇི་ལྟར་ཨེ་རན་དའི
iiif viewer powered by OpenSeadragon
