| e-texts navigator |
| Wylie |
47b1 ཡི་གེ་གཅིག་ཀྱང་ཤེས་ཏེ། གང་ཡི་གེ་གཅིག་ཤེས་པ་དེ་ལྟ་བུ་ནི་འཇིག་རྟེན་ན་འདུལ་བ་འཛིན་པ་ཡིན་ཏེ། འདི་ནི་མདོ་སྡེ་ལ་འདུལ་བ་འཛིན་པ་ཞེས་བྱའོ། །དེ་ལྟར་ན་དེ་བཞིན་གཤེགས་པའི་བསྟན་པ་ནི་དཔག་ཏུ་མེད་དོ། །དེ་བཞིན་གཤེགས་པ་ནི་བསམ
47b2 གྱིས་མི་ཁྱབ་བོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ལྟ་ལགས་ཀྱང་བསམ་གྱིས་མི་ཁྱབ་ལགས། རྟག་པ་དང་བརྟན་པ་དང་། ཐེར་ཟུག་དང་ཞི་བ་ལགས་ཏེ་བསམ་གྱིས་མི་ཁྱབ་བོ་ཞེས་གཞན་དག་ལ་ཡང་བསྟན་པར་འཚལ་ལོ། །
47b3 བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་ལེགས་སོ་ལེགས་སོ། །དེ་བཞིན་གཤེགས་པ་ནི་རྡོ་རྗེ་ལྟར་མི་ཤིགས་པའི་སྐུ་འཛིན་པ་ལ་ཞུགས་པ་ཡིན་ཏེ། དེ་ལྟར་ཡང་དག་པའི་ལྟ་བ་དང་། བསླབ་པ་ལ་གུས་པར་བྱའོ། །
47b4 དེ་བཞིན་གཤེགས་པ་རྡོ་རྗེ་ལྟར་མི་ཤིགས་པའི་སྐུ་དང་ལྡན་པར་ཡང་དག་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཇི་ལྟར་མེ་ལོང་གི་ངོས་ལ་རང་བཞིན་གྱིས་གཟུགས་བརྙན་སྣང་བ་དེ་བཞིན་དུ་དོན་དམ་པའི་སྐུ་གསལ་བར་མཐོང་ངོ་། །
47b5 རྡོ་རྗེ་ལྟར་མི་ཤིགས་པའི་སྐུའི་ཕུང་པོ་ཞེས་བྱ་སྟེ་གཉིས་པའོ།། །། རིགས་ཀྱི་བུ་གཞན་ཡང་ད་ནི་མདོ་འདིའི་མིང་དང་ཡོན་ཏན་དང་། ཚུལ་ཁྲིམས་ཡང་དག་པར་གཟུང་བར་གྱིས་ཤིག་།མདོ་འདིའི་མིང་ཐོས་ན་སེམས་ཅན་རྣམས་འགྲོ་བ་བཞིར་འགྲོ
47b6 བར་འགྱུར་བ་དེ་ནི་མི་སྲིད་དེ་མདོ་ཆེན་པོ་འདིའི་ཡོན་ཏན་དང་ཚུལ་སངས་རྒྱས་མང་པོས་བསྟན་པ་དེ་ལྟ་བུ་ངས་བསྟན་པར་བྱའོ། །གསོལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟར་མདོ་འདིའི་མིང་ཡང་དག་པར་འཛིན་པ་ལགས།
47b7 ཇི་ལྟར་མདོ་འདིའི་མིང་འཛིན་པའི་གྲངས་སུ་གཏོགས་པ་ལགས། བཀའ་སྩལ་པ། མདོ་འདི་ནི་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ
47b8 བཟང་བ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། རྡོ་རྗེ་ལྟ་བུའི་གཏེར་དང་ཆེ་བར་གྲགས་པ་ཡིན་ནོ། །རིགས་ཀྱི་བུ་དཔེར་ན་གང་གཱ་དང་ཡ་མུ་ན་ལ་སོགས་པ་ཆུ་ཀླུང་བརྒྱད་ནི་རྒྱ་མཚོ་ཆེན་པོ་ཁོ་ནར་འབབ་པ
iiif viewer powered by OpenSeadragon
