| e-texts navigator |
| Wylie |
27b1 རྩིའི་བཅུད་ཀྱིས་ཚིམ་པར་མཛད་ཅིང་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། ཇི་ལྟར་རྒྱལ་པོའི་བཙོན་རར་གནོད་པའི་ལས་རྣམས་ཀྱིས་དང་པོ་སྙོན་སྨོངས་པ་ན། ལ་ལ་ཞིག་གིས་ཁྱོད་ཀྱིས་ན་ཚ་ཇི་ལྟ་བུ་ཞིག་མྱོང
27b2 ཞེས་སྨྲས་ན། དེས་དེ་ལ་སྨྲས་པ། དེ་ནི་དེ་བཞིན་ཏེ། གང་གི་ཚེ་བདག་སྡུག་བསྔལ་གྱི་ཚོར་བ་ལས་ཐར་བར་འགྱུར་བ་དེའི་ཚེ་མྱ་ངན་ལས་འདས་པ་ཡིན་ཏེ། བདེ་བ་ཉམས་སུ་མྱོང་བར་འགྱུར་རོ་ཞེས་མཆི་བ་དེ་བཞིན་དུ་བདག་ཅག
27b3 ཐམས་ཅད་ཀྱང་ཁྱོད་བཞུགས་ན་རྒྱལ་པོའི་བཙོན་ར་ནས་ཐར་བ་བཞིན་དུ་མྱ་ངན་ལས་འདས་པ་ལགས་ན། དེའི་སླད་དུ་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། བཅོམ་ལྡན་འདས་དཔེར་གསོལ་ན་སྨན་པ་ཚེའི་རིག་བྱེད་ཡན
27b4 ལག་བརྒྱད་ལ་མཁས་པས་བདག་གི་བུ་ལ་ནི་རྒྱུད་ཕྱི་མ་སློབ་པར་བགྱིད་ཀྱི། སློབ་མ་ལ་ནི་བདག་དང་མཉམ་པར་འགྱུར་དུ་དོགས་ནས་སློབ་པར་མི་བགྱིད་པ་དེ་བཞིན་དུ་ཆོས་ཀྱི་རྒྱལ་པོ་སྨན་པ་ཆེན་པོ་སེར་སྣ་མི་མངའ་བ་ཁྱོད་ཀྱིས་ཐེག་པ་ཆེན་པོའི
27b5 རྒྱུད་ཕྱི་མ་ལ་དེ་ལྟར་མི་མཛད་པར་བཅོམ་ལྡན་འདས་ཡུན་རིང་དུ་བཞུགས་སུ་གསོལ། དེ་བཞིན་དུ་ཤིང་རྟ་པ་ཤིང་རྟའི་རིག་བྱེད་ལ་མཁས་པས་བདག་གི་བུ་ལ་ནི་རྒྱུད་ཕྱི་མ་སྒྲ་གྲག་པར་ཕོག་པའི་དཔྱད་ཐམས་ཅད་སློབ་པར་བགྱིད་ཀྱི། སློབ
27b6 མ་ལ་ནི་སློབ་པར་མི་བགྱིད་པ་དང་། རིག་པའི་གནས་གཞན་དག་ལ་ཡང་དེ་བཞིན་དུ་སྦྱར་རོ། །བཅོམ་ལྡན་འདས་དཔེར་གསོལ་ན་བྱིས་པ་དང་རྒན་པོ་འམ་ནད་པ་ལ་ལ་ཞིག་ལམ་བཟང་པོ་ལས་གོལ་ཏེ་ལམ་ངན་པར་མཆིས་ན་ཤིན་ཏུ
27b7 སྡུག་བསྔལ་བར་འགྱུར་བ་དེ་བཞིན་དུ། བཅོམ་ལྡན་འདས་སེམས་ཅན་ལམ་ངན་པར་མཆིས་པ་རྣམས་ལུས་དང་བྲལ་བའི་འོག་ཏུ་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་ལགས་ན། བཅོམ་ལྡན་འདས་ལམ
27b8 སྟོན་པ་ཡུན་རིང་དུ་བཞུགས་སུ་གསོལ། ཡ་མཚན་ཅན་དགུ་བཅུ་རྩ་དྲུག་དང་། ཚིགས་སུ་བཅད་པ་བཞི་བཅུ་རྩ་ལྔ་ལ་ཡང་དེ་བཞིན་དུ་རྒྱས་པར་སྦྱར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།
iiif viewer powered by OpenSeadragon
