| e-texts navigator |
| Wylie |
164b1 སྐད་ཅིག་ལྷན་ཅིག་འདུག་ན་ནི་མི་ཕོད་དོ། །ཅིའི་ཕྱིར་ཞེ་ན། ཤཱ་རིའི་བུ་དེ་ནི་དགེ་སྦྱོང་གི་ནང་ན་ངན་པ་ཐ་མ་སྟེ། དགེ་སྦྱོང་གི་ནང་ན་རུལ་ཞིགས་ལ་ངན་པ་ཐ་མའོ། །དགེ་སྦྱོང་གི་ནང་ན་ཕུབ་མ་ཤིན་པའོ། །དགེ་སྦྱོང་གི་ནང་ན་དྲི་མའོ། །དགེ་སྦྱོང་གི་ནང་ན་རྙོག
164b2 པའོ། །དགེ་སྦྱོང་གི་ནང་ན་གོས་པའོ། །དགེ་སྦྱོང་གི་ནང་ན་འཁོར་བའོ། །དགེ་སྦྱོང་གི་ནང་ན་རྫིང་བའོ། །དགེ་སྦྱོང་གི་ནང་ན་འཕྲུལ་གྱི་ལམ་སྟོར་བ་སྟེ། དེ་ལྟ་བུ་ལ་སོགས་པའི་མིས་ངའི་ཆོས་ཀྱི་ནང་དུ་ཁྱིམ་ནས་བྱུང་སྟེ་ལམ་བཙལ་ན་སྡིག་ལྕི་བ་ཐོབ་བོ། །
164b3 ཤཱ་རིའི་བུ་དེ་ལྟ་བུའི་མི་ནི་ངའི་ཆོས་ཀྱི་ནང་ན་ལོག་པའི་དགྲ་ཞེས་བྱའོ། །ཆོས་ཀྱི་དགྲ་ཡིན་ཞེས་བྱའོ། །བརྙས་བསླུ་ཞིང་གཡོ་སྒྱུ་བྱེད་པའི་མི་ཡིན་ཞེས་བྱའོ། །སྲོག་གསོ་བའི་ཕྱིར་གོས་དང་། ཟས་ལ་རྐམ་ལྕི་སྟེ། དེའི་མིང་ཡང་འཇིག་རྟེན་གྱི་བྲན་གཡོག་ལ
164b4 སྲེད་པ་ཞེས་བྱའོ། །ཤཱ་རིའི་བུ་དཔེ་ཉུང་རུམ་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་པ་དང་འདྲ་སྟེ། ཚུལ་ཁྲིམས་ཞིག་པའི་དགེ་སློང་དེ་ཡང་དེ་དང་མཚུངས་པས་མིང་ཁྱིམ་ན་འདུག་པ་ཞེས་ཀྱང་མི་བྱ། མིང་ཁྱིམ་ནས་བྱུང་བ་ཞེས་མི་བྱ་སྟེ། ཚེ་ཟད་ཕྱིན
164b5 ཆད་ཐལ་བྱུང་སེམས་ཅན་དམྱལ་བར་འགྲོའོ། །ཤཱ་རིའི་བུ་དཔེར་ན་ཕ་ཝང་དང་མཚུངས་ཏེ་བྱས་གཟུང་ཞེས་བྱས་ན་ནི་བྱི་བ་བཞིན་དུ་ཁུང་བུར་སོང་། བྱི་བས་གཟུང་ཞེས་བྱས་ན་ནི་ནམ་མཁའ་ལ་འཕུར་ཏེ་བྱར་བྱེད་དོ། །བདེན་པར་བྱ་ན་བྱ་ཆེན་པོར་སྤྱོད་པ་མེད་པ
164b6 དེ་ནི་ལུས་རྣམས་མནམ་སྨེ་སྟེ། མུན་པ་མི་སྣང་བ་འབའ་ཤིག་ལ་སྲེད་དོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ཡང་དེ་དང་མཚུངས་ཏེ། གསོ་སྦྱིན་རང་བསང་བར་ཡང་མི་འཇུག་།རྒྱལ་པོས་བཀོལ་བའི་གྲལ་དུ་ཡང་མི་འདུག་སྟེ་མིང་གོས་སྐྱ
164b7 བོ་ཅན་ཞེས་ཀྱང་མི་བྱ་མིང་ཁྱིམ་ནས་བྱུང་ཞེས་ཀྱང་མི་བྱའོ། །དཔེར་རོ་བསྲེགས་པའི་ཤིང་གི་ལྷག་མ་དང་མཚུངས་ཏེ། ཕྱིས་ཅིར་ཡང་སྤྱད་དུ་མི་རུང་ངོ་། །དེ་ལྟ་བུའི་དགེ་སློང་ཚུལ་ཁྲིམས་ཀྱི་རིམ་པ་ཡང་མེད་ཐུབ་པའི་རིམ་པ་ཡང་མེད། ཤེས
164b8 རབ་ཀྱི་རིམ་པ་ཡང་མེད། གྲོལ་ཐར་གྱི་རིམ་པ་ཡང་མེད། གྲོལ་ཐར་ཤེས་མཐོང་བའི་རིམ་པ་ཡང་མེད་དེ། ཚུལ་ཁྲིམས་གཙང་མ་བཤིག་པ། ཆོ་ག་འཚང་བ་འབའ་ཤིག་གི་རིམ་པ་ཡོད་དོ། །ཤིན་ཏུ་ཟབ་མོ་དམ་པའི་སྒྲ་སྐད་དང་། ཚུལ་ཁྲིམས
iiif viewer powered by OpenSeadragon
