| e-texts navigator |
| Wylie |
153b1 པ་ཡོན་པོར་སྟོན་པ་ཡིན་ནོ། །ཤཱ་རིའི་བུ་དེ་ལྟ་བུར་སྟོན་པ་ནི་མིང་ངན་པའི་བཤེས་གཉེན་ཏེ། མི་དེ་ལྟ་བུའི་མིང་ལ་འཕྱ་སྐུར་པ་ཞེས་བྱ་སྟེ་མུར་འདུག་ལ་སྟོང་པའོ། །མི་གཞན་ལ་ཡོན་པོར་ལམ་གྱི་ཆོས་འཆད་པ་ཞེས་ཀྱང་བྱའོ། །ཤཱ་རིའི་བུ་དེ་ལྟ
153b2 བུའི་མིང་ངན་པ་ནི་ངས་ཆུ་རྔུབ་གཅིག་དང་ཡོན་ལེན་དུ་འང་མི་གནང་ངོ་། །ངས་སྟོན་པ་ནི་བཤད་ཀྱི་སློབ་མ་ནི་མ་བཤད་དོ། །ཤཱ་རིའི་བུ་ངའི་ཆོས་ལ་དེ་ལྟ་བུར་ལེ་ལོ་ཡང་སྐྱེ་བ་སྟོན་པ་མང་དུ་ཡོད་དོ། །ཤཱ་རིའི་བུ་བསྟན་པ་མནོད་པ་ནི་ཚུལ་ཁྲིམས་མནོས
153b3 ཏེ། ལོ་ལྔའི་བར་དུ་ཀུན་གཏོང་མི་ཕོད་ན་དེ་ལྟ་བུར་བསྟན་པ་ནི་དེ་ལ་སེམས་འགྲུས་པར་སྤྱད་དེ། རང་ལ་ཅི་ཡང་མེད་པ་ཐོབ་པ་ཡོད་དོ། །དགེ་སློང་སོང་སྟེ་མི་གསོལ་མི་འདྲི་བ་ངས་བཤད་པ་ལ་མི་དེ་ལོ་ལྔ་ལོན་མོད་ཀྱི། འོན་ཀྱང་མིང་ཡོན་པོ་མཐོང་བ་སྟེ
153b4 མུར་འདུག་གི་ཆོས་དང་འདྲེས་ཤིང་བདུད་ཀྱིས་བསྟན་པ་བཞིན་དུ་སྤྱོད་པའོ། །ཤཱ་རིའི་བུ་དགེ་སློང་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཆོས་ཅི་ཡང་ཐོབ་པ་མེད་ཅེས་ཐོས་ནས། མོད་བཞིན་རང་གིས་ཚོར་ཤེས་ཏེ། བདག་གིས་སྔར་མནོས་པ་ནི་ཀུན
153b5 ཡོན་པོ་མཐོང་བ་ཡིན་ཏེ། སྟོང་པ་ཅི་ཡང་ཐོབ་པ་མེད་པའི་ཆོས་ལ་ཐེ་ཙོམ་ཡང་མེད། འགྱོད་པ་ཡང་མེད་དེ་ཟབ་ཏུ་ཞུགས་ཤིང་ཐོས་པ་མེད་པས་བདག་ཏུ་ལྟ་བ་དང་། གང་ཟག་ཏུ་ལྟ་བ་ཐམས་ཅད་ལ་མི་རྟེན་ཏོ། །ཤཱ་རིའི་བུ་ངས་བཤད་པ་ལ་དེ་ལྟ་བུའི་མི་མིང་གཙང
153b6 དག་པའི་ཚངས་པ་སྤྱད་པ་ཞེས་བྱའོ། །ཤཱ་རིའི་བུ་དགེ་སློང་ལ་ལ་ཞིག་གིས་དེ་ལྟ་བུའི་ཐོབ་པ་མེད་པའི་བཟོད་པ་འབྱོར་གྲུབ་ན་འཕྲལ་དུ་ལྷག་མ་མེད་པའི་མྱ་ངན་ལས་འདས་པ་མཐོང་མོད་ཀྱི། ངས་ལུང་བསྟན་དེ་མི་དེ་སངས་རྒྱས་བྱམས་པའི་དུས་ཀྱི་ཚོགས་པ་དང་པོ་ལ
153b7 འཇུག་གོ། །དེའི་ཚེ་སངས་རྒྱས་བྱམས་པའང་ཤིན་ཏུ་དགའ་ནས་ལན་གསུམ་བོས་ཏེ་མི་དེ་སངས་རྒྱས་ཤཱཀྱ་ཐུབ་པའི་ཆོས་ལ་ཅི་འང་ཐོབ་པ་མེད་པའི་བཟོད་པའི་འབྱོར་གྲུབ་པས་ནུས་སོ་ཞེས་བོས་སོ། །ཤཱ་རིའི་བུ་ཁྱིམ་ན་འདུག་པའང་རུང་། ཁྱིམ་ནས་བྱུང་བ་ཡང་རུང་སྟེ། དེ
153b8 ལྟ་བུ་བཟོད་པ་འབྱོར་གྲུབ་ནས། ངས་མི་དེ་མྱ་ངན་ལས་འདས་པ་ཐོབ་པ་ཡང་དག་པར་ལུང་སྟོན་ཏོ། །ཤཱ་རིའི་བུ་མི་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཅི་ཡང་ཐོབ་པ་མེད་པའི་ཆོས་ཐོས་ན་རྨོད་བཞིན་དངངས་སྐྲག་ན་མི་དེ་སྙིང་རྗེར་རུང་སྟེ་ར་མདའ་མེད་དོ། །གཉེན
iiif viewer powered by OpenSeadragon
