| e-texts navigator |
| Wylie |
149b1 ཤིང་ཤེས་པར་བགྱིས་པ་ཡོད་པ་དཀོན་ནོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ཁྱོད་ཀྱིས་བསོད་ནམས་ཇི་ཞིག་མཐོང་ན། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན། མི་ཀུན་ཡིད
149b2 ཆེས་ཤིང་ཤེས་པར་བྱས་པ་དཀོན་ནོ་ཞེས་བསྟོད། ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས་བདེན་པ་མ་མཆིས་ན་ཁོར་མོར་སེམས་འདི་སྙམ་བགྱིད་དོ། །བཅོམ་ལྡན་འདས་ཀྱིས་མིང་དང་མཚན་མ་མེད་པའི་ཆོས་ལ་ནི་མིང་དང་མཚན་མས་བཤད།
149b3 ངག་དང་ཚིག་མེད་པའི་ཆོས་ལ་ནི་ངག་དང་ཚིག་གིས་བཤད་པ་དེའི་དོན་བསམས་ན་ཡོད་པ་དཀོན་པའི་སེམས་སྐྱེས་སོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། དེ་ཡིན་ནོ། །དེ་ཡིན་ནོ། །དོན་ཡོད་པ་དཀོན་ཏེ་རབ་ཏུ་ཡོད་པ་དཀོན་པས་ན་སངས་རྒྱས་རྣམས་ཀྱི་བླ་ན་མེད
149b4 པ་གཡུང་དྲུང་རྫོགས་པའི་བྱང་ཆུབ་ཅེས་བྱའོ། །ཤཱ་རིའི་བུ་དཔེར་ན་རི་མོ་མཁན་མཁས་པས་ནམ་མཁའ་ལ་བྲིས་ཏེ། ཁ་དོག་དང་གཟུགས་རྣམ་པ་ཅི་ཡང་སྣང་བར་བྱས་ན་ཁྱོད་ཀྱི་ཡིད་ལ་ཇི་སྙམ་དུ་སེམས། རི་མོ་མཁན་དེ་ཡོད་པ་དཀོན་ནམ་མི་དཀོན། བཅོམ་ལྡན་འདས
149b5 དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་འཐོབ་པའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཀྱིས་ཆོས་སོ་ཅོག་ལ་སྐྱེ་བ་ཡང་མེད། འགོག་པ་ཡང་མེད། མཚན་མ་ཡང་མེད་བྱ་བ་ཡང་མེད་པར་བཤད་ན། མི་ཀུན་ཡིད་ཆེས་ཤིང་ཤེས་པར
149b6 བྱས་པ་ནི་ཆེས་ཀྱིས་ཡོད་པ་དཀོན་ནོ། །ཅིའི་ཕྱིར་བྱས་ན་མིང་དང་མཚན་མ་མེད་པའི་ཆོས་ལ་བསམ་པ་ཡང་མེད། ཐོབ་པ་ཡང་མེད། སྤྱད་པ་ཡང་མེད་དེ། བསམ་གྱིས་མི་ཁྱབ་ཅིང་སེམས་ཀྱིས་གནས་ཤིང་རྟེན་པ་ཡང་མ་ཡིན། འདྲན་ཏོར་དུ་བརྗོད་པ་ཡང་མེད། འདྲན་ཏོར་དུ་བརྗོད
149b7 ཅིང་། རྟེན་གནས་སུ་རུང་བ་ཡང་མ་ཡིན། ཚོར་བ་ཡང་མེད། བརྟགས་པ་ཡང་མེད། ཇིས་བསྡུ་བ་ཡང་མེད། སེམས་ལ་ཡང་མི་འདུག་།ཐོབ་པས་ཐོབ་པ་ཡང་མེད། ཚུ་ལོག་ཀྱང་མེད། ཕ་ལོག་ཀྱང་མེད། རྣམ་པར་རྟོག་པ་ཡང་མེད། གཡོ་བ་ཡང་མེད། རང་བཞིན་ཡང
149b8 མེད། ཕྱི་མོ་ནས་རང་སྟོང་པས་བསམ་དུ་ཡང་མི་རུང་འབྱུང་དུ་ཡང་མི་རུང་སྟེ། འཇིག་རྟེན་ཐམས་ཅད་ཀྱིས་ཡིད་ཆེས་པར་མི་ནུས་པ་དེ་ལྟ་བུའི་མིང་མཚན་མ་མེད་པའི་ཆོས་མིང་དང་མཚན་མས་བཤད་དེ། དེ་ལྟ་བུའི་ནི་ཆོས་སོ་ཅོག་ཀུན་སྐྱེ་བ་ཡང་མེད། འགོག་པ་ཡང
iiif viewer powered by OpenSeadragon
