| e-texts navigator |
| Wylie |
148b1 ལྷག་མཐོང་དང་། རྣམ་པར་ཐར་པའི་སྒོ་གསུམ་སྟེ། ཀུན་དགའ་བོ་འདི་དག་ནི་ཆོས་འདུལ་བ་འདི་ལ་སྙིང་པོ་ཡིན་ནོ། །ཀུན་དགའ་བོ་དགེ་སློང་ཚུལ་ཁྲིམས་འཆལ་པ་རྣམས་ཀྱིས་དགེ་སློང་ཚུལ་ཁྲིམས་དང་ལྡན་པ་རྣམས་ལ་གཤེ་ཞིང་མཚང་འདྲུ་བར
148b2 འགྱུར་ཏེ། དེ་དག་ཐམས་ཅད་ནི་ལུས་དང་བྲལ་ཞིང་ཤི་བའི་འོག་ཏུ་ངན་འགྲོ་ངན་སོང་དུ་རྣམ་པར་ལྷུང་ནས་སྡུག་བསྔལ་བར་འགྱུར་རོ། །དེའི་ཚེ་གང་ཞིག་ཁྲོ་བ་མེད་པར་གྱུར་པ་དེ་དག་ཐམས་ཅད་ནི་བདེ་འགྲོ་རྣམས་སུ་སྐྱེ་བར་འགྱུར་རོ། །བཅོམ
148b3 ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟར་བཅས་པའི་འཇིག་རྟེན་ཡིད
148b4 རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་རྫོགས་སྟོ།། །། རྒྱ་གར་གྱི་མཁན་པོ་ཀ་མ་ལ་གུཔྟ་དང་། ཞུ་ཆེན་གྱི་ལོ་ཙྪ་བ་དགེ
148b5 སློང་རིན་ཆེན་བཟང་པོས་བསྒྱུར། ། །། @##། །རྒྱ་གར་སྐད་དུ། ཨཱརྱ་ཨཱཏ་ཛྙཱ་ན་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་འདའ་ཁ་ཡེ་ཤེས་ཞེས་བྱ་བ་ཐེག་པ་ཆེན་པོའི་མདོ། སངས
148b6 རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འོག་མིན་ལྷའི་རྒྱལ་པོའི་ཁང་བཟང་ན་བཞུགས་ཏེ་འཁོར་ཐམས་ཅད་ལ་ཆོས་སྟོན་པ་དང་། བྱང་ཆུབ་སེམས་དཔའ་སེམས
148b7 དཔའ་ཆེན་པོ་ནམ་མཁའི་སྙིང་པོས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ནམ་འཆི་ཁ་མའི་སེམས་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ནམ་མཁའི་སྙིང
148b8 པོ་བྱང་ཆུབ་སེམས་དཔའ་ནམ་འཆི་བའི་དུས་ཀྱི་ཚེ་འདའ་ཁ་ཡེ་ཤེས་བསྒོམ་པར་བྱའོ། །དེ་ལ་འདའ་ཁ་ཡེ་ཤེས་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པས་ན་དངོས་པོ་མེད་པའི་འདུ་ཤེས་རབ་ཏུ་བསྒོམ་པར་བྱའོ། །ཆོས་ཐམས་ཅད་བྱང་ཆུབ་ཀྱི་སེམས
iiif viewer powered by OpenSeadragon
