| e-texts navigator |
| Wylie |
146a1 ཅེས་བྱ་བའི་ཚིགས་སུ་བཅད་པ་འདི་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མ་ལུས་པ
146a2 ཇི་ལྟ་བུ་ལགས། ཐམས་ཅད་ཅེས་བགྱི་བ་ཡང་ཇི་ལྟ་བུ་ལགས། བཀའ་སྩལ་པ། མ་ལུས་པའི་དོན་ནི་དགེ་བའི་ཕྱོགས་ཐམས་ཅད་རྟག་པའོ་བདེ་བའོ་ཞེས་བྱ་བ་ལྟ་བུའོ། །དེ་ལྟར་ན་ཁ་ཅིག་ནི་ལྷག་མ་ཡོད་པའོ། །ཁ་ཅིག་ནི་ལྷག་མ
146a3 མེད་པ་ཡིན་པར་ཆོས་འདོད་པའི་རིགས་ཀྱི་བུས་རིགས་པར་བྱའོ། །གསོལ་པ། ཀྱེ་མ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་པ་ལགས་ཏེ་བདག་ཤིན་དུ་རངས་ལགས་སོ། །བཀའ་སྩལ་པ། རིགས
146a4 ཀྱི་བུ་ལེགས་སོ་ལེགས་སོ། །དེ་ལྟར་ཆ་ཕྲ་བར་རྟག་དགོས་སོ། །གསོལ་པ། བཅོམ་ལྡན་འདས་ད་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་བསོད་ནམས་ཇི་ལྟར་སྐྱེ་བ་བཀའ་སྩལ་དུ་གསོལ། བཀའ་སྩལ་པ། སངས་རྒྱས་ཀྱི་ཡུལ
146a5 འདི་ནི་བསམ་གྱིས་མི་ཁྱབ་པའི་ཕྱིར་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མདོ་སྡེ་འདིའི་མིང་ཡང་ཚིག་ཙམ་དུ་ཡང་ཉན་པ་རྣམས་ལ་བརྗོད་པར་མི་ནུས་སོ། །དེ་ནས་བཅོམ་ལྡན་འདས་ལ་ལྷ་དང་མི་དང་ལྷ་མ་ཡིན་རྣམས་ཀྱིས་ཚིག་འཐུན་པར
146a6 ཚིགས་སུ་བཅད་དེ་གསོལ་པ། སངས་རྒྱས་བསམ་ཡས་བསམ་ཡས་ཆོས་གསུང་བ། །ཆོས་དང་དགེ་འདུན་རྟག་ཏུ་ཁྱོད་ལ་རྟེན། །དེ་ཕྱིར་དགེ་སློང་འོད་སྲུང་ཀུན་དགའ་བོ། །མ་མཆིས་བར་དུ་མགོན་པོ་བཞུགས་པར་གསོལ། །བི་ཏེ་ཧ་ཡི་རྒྱལ་པོ་མ
146a7 སྐྱེས་དགྲ། །ཁྱོད་ཀྱི་མཛའ་མཆོག་ཐུགས་འདྲ་ཆེ་བ་ཡང་། །ད་དུང་མ་མཆིས་མཐར་ཐུག་ཁྱོད་མ་གཤེགས། །ཀུན་མཁྱེན་ཁྱོད་ཀྱིས་བདག་ཅག་ཐེ་ཚོམ་ཆོད། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ངའི་སྲས
146a8 མཆོག་ཐུ་བོ་འོད་སྲུང་དང་། །བློ་ལྡན་ཀུན་དགའ་ཁྱོད་ཀྱི་ཐེ་ཙོམ་གཅོད། །ཁྱོད་ཀྱིས་ངའི་ཞལ་ལྟོས་རྟག་པ་དང་། །མི་རྟག་ཤེས་བྱོས་མྱ་ངན་མ་བྱེད་ཅིག་།དེ་ནས་འཁོར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ་བླ་ན་མེད
iiif viewer powered by OpenSeadragon
