| e-texts navigator |
| Wylie |
12a1 ས་ལ་ཟུང་གི་དྲུང་དུ་སྣང་བར་བྱས་ནས། བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འབྲས་བུའི་ཤིང་གི་བདག་པོ་དྲི་སྲེལ་ལ་སོགས་པ་འབྲས་བུའི་ཤིང་གི་བདག་པོ་གང་གཱའི་ཀླུང་དགུ་བཅུའི
12a2 བྱེ་མ་སྙེད་ཀྱིས་སྔ་མའི་མཆོད་པ་ཐམས་ཅད་པས་ཉིས་གྱུར་ཉིས་གྱུར་ཀྱིས་ལྷག་པའི་མཆོད་པའི་ཚོགས་ཁྱེར་ནས་ཁུ་བྱུག་ཕོ་རྒྱགས་པ་རྣམས་དང་། བུང་བ་རྣམས་སྐད་འབྱིན་པ་དང་ལྡན་པའི་མེ་ཏོག་འཚེར་བའི་འཁྲི་ཤིང་མང་པོའི་དོག་པ་དང་། ལོ་མ
12a3 ཁ་འབུས་པ་རྣམས་ཀྱིས་ས་ཕྱོགས་བརྒྱན་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རིག་སྔགས་འཆང་གི་རྒྱལ་པོ་སྒྱུ་འཕྲུལ་ཆེན་པོ་ལ་སོགས་པ་རིག་སྔགས་འཆང་གི་རྒྱལ་པོ་གང་གཱའི་ཀླུང་སྟོང་གི་བྱེ་མ་སྙེད་ཀྱིས་མཆོད་པ་སྔ་མའི་ཉིས
12a4 གྱུར་བས་ལྷག་པའི་མཆོད་པ་དག་ཁྱེར་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མོ་འདོད་དགུར་སྒྱུར་བའི་གཟུགས་ཅན་ལེགས་མཐོང་མ་ལ་སོགས་པ་གང་གཱའི་ཀླུང་བྱེ་བའི་བྱེ་མ་སྙེད་ཀྱིས་ཡངས་པ་ཅན་གྱི་རྒྱལ་པོའི་བཙུན་མོའི་མཆོད་པ
12a5 ཉིས་གྱུར་བས་ལྷག་པ་དག་ཁྱེར་ཏེ། རང་རང་གི་རྒྱན་རྣམས་བཅོམ་ལྡན་འདས་ཀྱི་སྤྱན་སྔར་ས་ལ་སྤུངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་བུ་མོ་རམ་བྷ་དང་། ཨུརྦ་ཤི་ལ་སོགས་པ་ལྷའི་བུ་མོ་གང་གཱའི་ཀླུང་བྱེ་བ་ཕྲག
12a6 བརྒྱའི་བྱེ་མ་སྙེད་མཆོད་པ་སྔ་མའི་ཉིས་གྱུར་ཉིས་གྱུར་པས་ཆེས་ལྷག་པར་མང་ཞིང་སྤ་བ་དག་གིས་མདུན་དུ་དྲངས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འབྱུང་པོའི་ཚོགས་པ་བ་སངས་ལྟར་འཁོར་བ་ཞེས་བྱ་བ་ལ་སོགས
12a7 པ་གང་གཱའི་ཀླུང་བྱེ་བ་ཕྲག་སྟོང་གི་བྱེ་མ་སྙེད་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འཇིག་རྟེན་སྐྱོང་བ་བཞིའི་ལྷའི་བུ་གང་གཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་མཆོད་པ་སྔ་མའི་ཉིས་གྱུར་ཉིས་གྱུར་བས་ལྷག་པ་དག་ཁྱེར
12a8 ནས་བཅོམ་ལྡན་འདས་ལ་ཕྱག་འཚལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ནས་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རླུང་ལྷ་བཞི་རླུང་གཏོང་བའི་ལྷ་གང་གཱའི་ཀླུང་བྱེ་བ་ཕྲག
iiif viewer powered by OpenSeadragon
