| e-texts navigator |
| Wylie |
105b1 སེམས་ཤིང་རྟོག་པར་བྱེད་དོ། །མི་རྟག་པ་བསྟན་ན་ནི་བྱིས་པ་རྣམས་རྫ་མཁན་གྱི་སྣོད་བཞིན་དུ་མི་རྟག་གོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་ངའི་ལུས་ལ་ཆོས་ཀྱི་སྐུའི་ས་བོན་དེ་ལྟ་བུ་ཡོད་དོ་སྙམ་དུ་ཤེས་པས་ཐམས་ཅད་འཛིན་པར་མི
105b2 བྱེད་དོ། །བདག་མེད་པ་བསྟན་ན་ནི་བྱིས་པ་རྣམས་བསྟན་པ་བདག་མེད་དོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་ཐ་སྙད་དུ་ཡོད་དོ་སྙམ་དུ་ཤེས་ཏེ་ཐེ་ཚོམ་མེད་དོ། །དེ་བཞིན་གཤེགས་པའི་སྙིང་པོ་ནི་སྟོང་པ་ཡིན་ནོ་ཞེས་བསྟན་ན་ནི་བྱིས་པ་རྣམས་ཆད་པ
105b3 འཇིགས་སུ་རུང་བའི་ཡོན་པོ་སྒོམ་པར་བྱེད་དོ། །ཤེས་རབ་ཅན་རྣམས་ཀྱིས་ནི་རྟག་པ་དང་། བརྟན་པ་དང་། ཐེར་ཟུག་པ་དེ་སྒྱུ་མ་ཙམ་དུ་ཡོད་པར་ཤེས་སོ། །ཐར་པ་བསྟན་ན་ནི་བྱིས་པ་རྣམས་སངས་རྒྱས་རྣམས་ཀྱིས་ཐར་པ་རྙེད་ནས་མེད་པར་འགྱུར་རོ
105b4 སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི་སངས་རྒྱས་བྱོན་པ་དང་གཤེགས་པ་ཡོད་པར་ཤེས་ཏེ་མིའི་སེང་གེ་བྱོན་ཏོ་ཞེས་ཟེར་རོ། །བྱིས་པ་རྣམས་ནི་མ་རིག་པའི་རྐྱེན་ཀྱིས་འདུ་བྱེད་རྣམས་ཤེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན
105b5 རྣམས་ཀྱིས་ནི་མ་རིག་པ་དང་རིག་པ་ཐ་དད་པ་གཉིས་སུ་མེད་པར་ཤེས་སོ། །བྱིས་པ་རྣམས་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་འདུ་བྱེད་རྣམས་དང་། འདུ་བྱེད་པ་མེད་པ
105b6 ཐ་དད་པ་མེད་པ་གཉིས་སུ་མེད་པར་ཤེས་སོ། །དེ་བཞིན་དུ་བྱིས་པ་རྣམས་དགེ་བ་དང་མི་དགེ་བ་ཐམས་ཅད་ལ་ཐ་དད་པ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་སོ། །བྱིས་པ་རྣམས་ནི་ཁ་ན
105b7 མ་ཐོ་བ་དང་ཁ་ན་མ་ཐོ་བ་མེད་པ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་དེ་བཞིན་དུ་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་ལམ་དང་ལམ་མ་ཡིན་པ་ཞེས
105b8 བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི་གཉིས་སུ་མེད་པར་ཤེས་སོ་ཞེས་གསུངས་ཏེ་དེ་ནི་ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི་ཆོས་ཐམས་ཅད་ནག་པོ་དང་དཀར་པོའོ་ཞེས་བྱ་བ་ལ་གཉིས་སུ་འཛིན་ཏོ། །
iiif viewer powered by OpenSeadragon
