| e-texts navigator |
| Wylie |
205a1 སྐྱེས་པར་འགྱུར་ཡང་རུང་། །མ་སྐྱེས་པ་ནི་སྒྲུབ་པར་འགྱུར། །ཚིག་ཙམ་དུ་ནི་བརྗོད་པ་ཡིན། །སེམས་དེ་འབྱུང་བར་བྱེད་པ་ཡི། །རྒྱུ་ནི་མ་རིག་དེ་ཡིན་ཏེ། །ཇི་སྲིད་གཟུགས་དག་མི་ཤེས་པ། །དེ་སྲིད་བར་དུ་དེ་གནས་ཅི། །
205a2 ཞིག་པར་གྱུར་མ་ཐག་ཏུ་ནི། །སེམས་ནི་གཞན་རྣམས་རབ་འབྱུང་སྟེ། །གཟུགས་ནི་དུས་སུ་མི་གནས་ན། །ཅི་ལ་དམིགས་ཏེ་འབྱུང་བར་འགྱུར། །གང་ལས་གང་དུ་འཇུག་པ་ཡི། །སེམས་ནི་ལོག་པའི་རྒྱུ་ལས་བྱུང་།
205a3 དེ་ནི་རབ་ཏུ་མ་གྲུབ་ན། །ཇི་ལྟར་སྐད་ཅིག་འཇིག་པར་རིག་།རྣལ་འབྱོར་ཅན་གྱི་སྙོམས་འཇུག་དང་། །གསེར་དང་རྒྱལ་བའི་རིང་སྲེལ་དང་། །འོད་སྣང་གནས་ཀྱི་གཞལ་མེད་ཁང་། །འཇིག་རྟེན་རྒྱུ་ཡིས་འཇིག་པར་མེད།
205a4 གནས་པ་རྣམས་དང་ཐོབ་པའི་ཆོས། །སངས་རྒྱས་ཡེ་ཤེས་ཕུན་སུམ་ཚོགས། །དགེ་སློང་ཉིད་དང་ཤེས་ཐོབ་རྣམས། །སྐད་ཅིག་མར་ནི་ཇི་ལྟར་མཐོང་། །སྒྱུ་མ་དྲི་ཟའི་གྲོང་སོགས་ཀྱི། །གཟུགས་རྣམས་ཇི་ལྟར་སྐད་ཅིག
205a5 པ། །འབྱུང་བ་རྣམས་ནི་འབྱུང་འགྱུར་མིན། །འགྲོ་བར་འབྱུང་བ་ཆད་མི་བྱེད། །སེམས་ནི་མ་རིག་རྒྱུ་ལས་བྱུང་། །ཐོག་མ་མེད་ནས་བསགས་པ་ཡིན། །སྐྱེ་བར་འཇིག་དང་ཀུན་འབྲེལ་བར། །རྟོག་གེ་པ་དག་རབ་ཏུ་རྟོག་།
205a6 གྲངས་ཅན་སྨྲ་བ་རྣམ་གཉིས་ཏེ། །གཙོ་བོ་ལས་ནི་འགྱུར་བ་དག་།གཙོ་བོ་ཡོད་ན་འབྲས་བུ་ཡོད། །འབྲས་བུ་བདག་ཉིད་རབ་ཏུ་སྒྲུབ། །གཙོ་བོ་དང་ནི་དངོས་འཇུག་པར། །ཡོན་ཏན་བྱེ་བྲག་རབ་ཏུ་བསྒྲགས། །རྒྱུ་དང་འབྲས
205a7 བུ་སྣ་ཚོགས་པ། །འགྱུར་བ་ལ་ནི་མེད་པ་ཡིན། །ཇི་ལྟར་དངུལ་ཆུ་དག་པ་ལ། །དྲི་མ་རྣམས་ཀྱིས་མི་ཆགས་པ། །དེ་བཞིན་ལུས་ཅན་ཐམས་ཅད་ཀྱི། །ཀུན་གཞི་གནས་ཀྱང་དག་པའོ། །ཤིང་ཀུན་དྲི་དང་སྒོག་པ་དང་། །
205a8 སྦྲུམ་མའི་བུར་ནི་མཐོང་བ་དང་། །ལན་ཚྭ་ལ་སོགས་རོ་ཡོད་དང་། །ཅི་ཕྱིར་ས་བོན་བཞིན་མི་འགྱུར། །དེ་ཉིད་དང་ནི་ཐ་དད་དང་། །དེ་བཞིན་གཉིས་ཀ་གཉིས་མ་ཡིན། །ཡོད་པ་ཡི་ནི་རྒྱུ་མེད་དེ། །འདུས་བྱས་ལ་མེད་མེད་པ་མིན། །
iiif viewer powered by OpenSeadragon
