| e-texts navigator |
| Wylie |
201a1 དག་མཚན་ཉིད་སེམས་ཅན་ནི། །ཡེ་ཤེས་དང་ནི་ལྷན་ཅིག་གནས། །གཟུགས་དང་ལས་ནི་གང་ཡོད་དང་། །ཕུང་པོ་ཡུལ་གྱི་རྒྱུས་བྱུང་དང་། །སེམས་ཅན་རྣམས་ཀྱང་ཉེར་ལེན་མེད། །གཟུགས་མེད་པ་ན་མི
201a2 གནས་སོ། །སེམས་ཅན་མེད་པར་གྱུར་པའི་ཕྱིར། །སེམས་ཅན་སྨྲ་ལ་བདག་མེད་གྱུར། །རྣམ་པར་ཤེས་པའང་མི་འབྱུང་ཕྱིར། །བདག་མེད་སྨྲ་བ་ཆད་པར་གྱུར། །དེ་ཡི་གནས་པ་བཞི་པོ་རྣམས། །གཟུགས
201a3 མེད་པར་ནི་ཇི་ལྟར་ཡོད། །ཕྱི་ནང་དངོས་པོ་མེད་པའི་ཕྱིར། །རྣམ་པར་ཤེས་པ་མི་འཇུག་གོ། །སྲིད་པ་བར་མའི་ཕུང་པོ་རྣམས། །རྟོག་གེ་ཅན་རྣམས་འདོད་པ་ལྟར། །དེ་བཞིན་གཟུགས་མེད་པར་སྐྱེས་པའི། །སྲིད་པའི
201a4 གཟུགས་ནི་མེད་དམ་ཅི། །སེམས་ཅན་རྣམ་ཤེས་མེད་ན་ནི། །ནན་ཏན་མ་བྱས་ཐར་པར་འགྱུར། །མུ་སྟེགས་སྨྲ་བ་ཐེ་ཙོམ་མེད། །རྟོག་གེ་ཅན་གྱིས་མི་ཤེས་སོ། །དེ་ན་གཟུགས་ཀྱང་ཡོད་པ་སྟེ། །གཟུགས་མེད
201a5 པ་ལ་ལྟ་བ་མེད། །དེ་མེད་པས་ན་གྲུབ་མཐའ་མེད། །ཐེག་པ་མེད་ཅིང་འགྲོ་བ་མེད། །དབང་པོ་རྣམས་དང་ལྡན་པ་ཡི། །བག་ཆགས་ལས་བྱུང་རྣམ་ཤེས་པ། །རྣམ་པ་བརྒྱད་ལས་ཕྱོགས་གཅིག་ནི། །སྐད་ཅིག
201a6 དུས་སུ་མྀ་འཛིན་ཏོ། །ཇི་ལྟར་གཟུགས་ནི་མི་འཇུག་ལྟར། །དབང་པོ་རྣམས་དང་དབང་མི་འཇུག་།དེ་ཕྱིར་བཅོམ་ལྡན་འདས་ཀྱིས་ཀྱང་། །དབང་པོ་ལ་སོགས་སྐད་ཅིག་བཤད། །གཟུགས་ནི་རྟོག་པར་མ་གྱུར་པར། །
201a7 རྣམ་པར་ཤེས་པར་ཇི་ལྟར་འཇུག་།རྣམ་པར་ཤེས་པར་མ་ཞུགས་ན། །ཇི་ལྟར་འཁོར་བ་སྐྱེས་པར་འགྱུར། །སྐྱེས་མ་ཐག་ཏུ་འཇུག་པར་ནི། །རྣམ་པར་འདྲེན་པ་མི་འཆད་དོ། །དངོས་པོ་རྣམས་ཀྱི་རྣམ་རྟོག་པ། །
201a8 འགྲོ་བར་བར་ཆད་མེད་པར་གཡོ། །དབང་པོ་རྣམས་དང་དབང་པོའི་དོན། །མཁས་ལ་མ་ཡིན་བླུན་པོ་ལ། །བྱིས་པ་རྣམས་ནི་མིང་གིས་འཛིན། །འཕགས་པ་མིང་གིས་དོན་ལ་མཁས། །དྲུག་པོ་ལ་ནི་ཉེར་ལེན་མེད། །
iiif viewer powered by OpenSeadragon
