| e-texts navigator |
| Wylie |
187b1 ཇི་སྲིད་ཐུབ་ཆེན་བཤད་དུ་གསོལ། །སྔོན་པོ་དམར་པོའི་རྣམ་པ་རྣམས། །དབའ་རླབས་དག་ལ་མ་མཆིས་ལ། །མཚན་ཉིད་དོན་དུ་བྱིས་པ་ལ། །སེམས་ཀྱི་འཇུག་པ་དག་ཀྱང་བཤད། །དེ་ལ་འཇུག་པ་མེད་པ་སྟེ། །རང་གི་སེམས
187b2 ནི་གཟུང་བ་སྤངས། །གཟུང་བ་ཡོད་ན་འཛིན་པ་ཡང་། །དབའ་རླབས་འཐུན་པར་བསྒྲུབ་པར་འགྱུར། །ལུས་དང་ལོངས་སྤྱོད་གནས་ལྟ་བུར། །མི་ཡི་རྣམ་པར་ཤེས་པ་སྣང་། །དེ་ཕྱིར་དེ་ཡི་འཇུག་པ་ནི། །དབའ་རླབས་དག་དང
187b3 འདྲ་བར་སྣང་། །དབའ་རླབས་དངོས་པོར་རྒྱ་མཚོ་ནི། །གར་བྱེད་རྣམ་པར་རེག་འགྱུར་ན། །ཀུན་གཞི་འཇུག་པ་དེ་བཞིན་དུ། །ཅི་ཡི་ཕྱིར་ནི་བློས་མི་རིག་།བྱིས་པ་བློ་དང་མི་ལྡན་པས། །ཀུན་གཞི་རྒྱ་མཚོ་ཇི་བཞིན་དུ། །
187b4 དབའ་རླབས་འབྱུང་བའི་ཆོས་འཐུན་ཕྱིར། །དཔེ་ཡིས་ཉེ་བར་སྦྱར་བ་ཡིན། །བཟང་ངན་བར་མའི་སྐྱེ་བོ་ལ། །གདུགས་འཆར་འགྱུར་བ་ཇི་བཞིན་དུ། །དེ་བཞིན་འཇིག་རྟེན་སྒྲོན་མ་ཁྱོད། །བྱིས་པ་རྣམས་ལ་ཡང་དག་སྟོན། །
187b5 ཆོས་ལ་རབ་ཏུ་ཞུགས་མཛད་ཅིང་། །ཇི་སླད་དེ་བཞིན་ཉིད་མི་གསུང་། །དེ་སྟེ་དེ་བཞིན་ཉིད་གསུང་ན། །སེམས་ལ་དེ་བཞིན་ཉིད་མ་མཆིས། །ཇི་ལྟར་རྒྱ་མཚོའི་དབའ་རླབས་དང་། །མེ་ལོང་རྨི་ལམ་ཇི་བཞིན་དུ། །ཅིག་ཆའི
187b6 དུས་སུ་སྣང་བ་ལྟར། །དེ་བཞིན་སེམས་ཀྱང་རང་ཡུལ་ལ། །ཡུལ་རྣམས་དང་ནི་མི་ལྡན་པས། །རིམ་གྱིས་འཇུག་པས་རབ་ཏུ་འབྱུང་། །རྣམ་པར་ཤེས་པས་རྣམ་པར་རིག་།ཡིད་ཀྱིས་ཀྱང་ནི་རློམ་སེམས་བྱེད། །ལྔ་པོ
187b7 རྣམས་ལ་སྣང་བར་མངོན། །མཉམ་པར་བཞག་ལ་རིམ་པ་མེད། །རི་མོའི་མཁན་པོ་ལ་ལ་འམ། །རི་མོའི་སློབ་མ་ཇི་ལྟ་བུར། །རི་མོའི་དོན་དུ་ཚོན་འགྱིད་པ། །ང་ཡི་བཤད་པ་དེ་དང་འདྲ། །ཚོན་ལ་རི་མོ་ཡོད་པ་མིན།
187b8 པིར་ལ་མེད་ཅིང་སྣོད་ལ་མེད། །སེམས་ཅན་རྣམས་ནི་དྲང་བའི་ཕྱིར། །ཚོན་གྱི་རི་མོ་རྣམ་པར་བརྟག་།ཡང་དག་ཡི་གེ་སྤངས་པ་སྟེ། །བཤད་པ་དག་ནི་འཁྲུལ་པའོ། །ཆོས་རྣམས་ལ་ནི་གནས་བཅས་ཤིང་། །རྣལ་འབྱོར
iiif viewer powered by OpenSeadragon
