| e-texts navigator |
| Wylie |
185b1 རྣལ་འབྱོར་བསྒོམས། །གལ་ཏེ་སྐྱེ་བར་མི་རྟོག་ན། །ཏིང་ངེ་འཛིན་དང་སྟོབས་རྣམས་དང་། །མངོན་པར་ཤེས་དང་དབང་ལྡན་གྱིས། །རྣལ་འབྱོར་པར་ནི་མྱུར་དུ་འགྱུར། །རྡུལ་ཕྲན་དུས་དང་གཙོ་བོ་དང་། །བྱེད་པ་ལས་ཀྱང་མི་རྟོག་གོ། །
185b2 འཇིག་རྟེན་རྒྱུ་རྐྱེན་ལས་བྱུང་བར། །རྣལ་འབྱོར་པས་ནི་མི་བརྟག་གོ། །འཇིག་རྟེན་རང་གི་རྟོག་པས་བརྟགས། །སྣ་ཚོགས་བག་ཆགས་དག་ལས་བྱུང་། །སྲིད་པ་སྒྱུ་མ་རྨི་འདྲ་བར། །རྣལ་འབྱོར་ཅན་གྱིས་རྟག་ཏུ་ལྟོས། །
185b3 སྒྲོ་འདོགས་པ་དང་སྐུར་པ་ཡྀས། །སྤངས་པར་ལྟ་བ་རྟག་ཏུ་སྟེ། །ཞི་བའི་ལམ་ནི་དགེར་སོང་ནས། །རྣལ་འབྱོར་སྣ་ཚོགས་རྩོམ་པར་བྱེད། །ལུས་དང་ལོངས་སྤྱོད་གནས་འདྲ་བར། །སྲིད་པ་གསུམ་ལ་མ་རྟོགས་ཤིག་།
185b4 ཟས་ཀྱི་བྱ་བ་བྱས་པ་དང་། །བསམ་པ་མེད་པར་ལུས་བསྲང་ནས། །སངས་རྒྱས་དང་ནི་བྱང་ཆུབ་ལ། །ཡང་དང་ཡང་དུ་ཕྱག་འཚལ་ཏེ། །རྣལ་འབྱོར་ཤེས་པས་མདོ་འདུལ་དང་། །འཐད་པས་ཡང་དག་བསྡུས་ནས་ནི།
185b5 ཆོས་ལྔ་དང་ནི་རང་སེམས་དང་། །བདག་མེད་པ་ལ་རྣམ་པར་སྒོམས། །སོ་སོ་རང་རིག་ཆོས་ཉིད་གཙང་། །ས་རྣམས་དང་ནི་སངས་རྒྱས་ས། །རྣལ་འབྱོར་ཅན་གྱིས་དེ་བསྒོམས་ན། །པད་མོ་ཆེ་ལ་དབང་བསྐུར
185b6 འགྱུར། །འགྲོ་བ་ཀུན་ཏུ་རབ་འཁྱམས་པས། །སྲིད་པ་ལ་ནི་སྐྱོ་བའྀ་ཡིད། །རྣལ་འབྱོར་ཅན་གྱིས་བརྩོན་བྱས་ན། །ཉི་མ་ཟླ་བའི་དབྱིབས་འདྲ་དང་། །འོད་དང་པད་མོ་ལྟ་བུ་དང་། །རི་མོ་ནམ་མཁའི་མེ་འདྲ་མཐོང་།
185b7 མཚན་མ་སྣ་ཚོགས་དེ་དག་ནི། །མུ་སྟེགས་ཅན་ལམ་ཁྲིད་པར་བྱེད། །ཉན་ཐོས་དག་དང་རང་རྒྱལ་གྱི། །སྤྱོད་ཡུལ་དུ་ཡང་ལྟུང་བར་བྱེད། །འདི་དག་ཐམས་ཅད་རྣམ་སྤངས་ཤིང་། །སྣང་བ་མེད་པར་ནམ་གྱུར་པ།
185b8 དེ་ཚེ་སངས་རྒྱས་ལྷ་ཡི་ཕྱག་།ཐམས་ཅད་ཞིང་ནས་བྱུང་བ་ཡིས། །དེ་ཡི་མགོ་ལ་ཉུག་མཛད་དེ། །ཡང་དག་རྗེས་སུ་འགྲོ་བའི་ལྟས། །རྒྱུ་མེད་པ་ལས་དངོས་པོ་ནི། །རྟག་དང་ཆད་པ་སྤངས་པ་ཡི།
iiif viewer powered by OpenSeadragon
