| e-texts navigator |
| Wylie |
183a1 དང་ནི་འཇིག་པ་མེད། །ཡན་ལག་བཅུ་གཉིས་ཡོད་མ་ཡིན། །མཐའ་དང་མཐའ་མེད་པའང་མེད། །ལྟ་བ་ཐམས་ཅད་སྤང་བའི་ཕྱིར། །སེམས་ཙམ་དུ་ནི་ངས་བཤད་དོ། །ལུས་དང་ཉོན་མོངས་ལས་ལམ་དང་། །བྱེད་པ་པོ་དང་འབྲས
183a2 བུ་རྣམས། །རྨི་ལམ་དང་ནི་སྨིག་རྒྱུ་འདྲ། །དྲི་ཟ་ཡི་ནི་གྲོང་ཁྱེར་བཞིན། །སེམས་ཙམ་དུ་ནི་རྣམ་བཞག་པས། །དངོས་པོའི་མཚན་ལས་རྣམ་པར་ལོག་། །སེམས་ཙམ་ལ་ནི་གནས་པའི་ཕྱིར། །རྟག་དང་ཆད་པ་མཐོང་བར་འགྱུར། །
183a3 མྱ་ངན་འདས་ལ་ཕུང་པོ་མེད། །བདག་ཀྱང་མེད་ཅིང་མཚན་ཉིད་མེད། །སེམས་ཙམ་ལ་ནི་འཇུག་པ་ཡིས། །ཐར་པ་འཛིན་ལས་ལོག་པར་འགྱུར། །ས་སྣང་རྒྱུས་བྱུང་ངེས་པ་ནི། །མི་རྣམས་ལ་ནི་ཕྱི་རོལ་སྣང་། །སེམས་ནི་སྣང་བ་མེད་ལས་བྱུང་། །
183a4 དེ་ཡི་ཕྱིར་ན་སེམས་མི་སྣང་། །མི་རྣམས་ཀྱིས་ནི་བག་ཆགས་རྣམས། །ལུས་དང་ལོངས་སྤྱོད་གནས་ལྟར་སྣང་། །སེམས་ནི་དངོས་མིན་དངོས་མེད་མིན། །བག་ཆགས་དག་གིས་མི་མཛེས་སོ། །དཀར་པོ་ལ་ནི་དྲི་མ་སྣང་། །དྲི་མ་ལ་ནི་དཀར
183a5 མི་སྣང་། །ནམ་མཁའ་ལ་ནི་སྤྲིན་བཞིན་དུ། །དེ་བཞིན་སེམས་ཀྱང་མི་སྣང་ངོ་། །སེམས་ནི་ལས་ཀྱང་སོགས་པར་བྱེད། །ཡེ་ཤེས་ཀྱིས་ནི་རྣམ་པར་སེལ། །ཤེས་རབ་ཀྱིས་ནི་སྣང་མེད་དང་། །མཐུ་ཡང་རབ་ཏུ་ཐོབ་པར་བྱེད། །སེམས་ནི
183a6 ཡུལ་དང་འབྲེལ་པ་སྟེ། །ཤེས་པ་རྟོག་གེ་དག་ལ་འཇུག་།སྣང་བ་མེད་དང་ཁྱད་པར་ལ། །ཤེས་རབ་དག་ལ་ཤིན་ཏུ་འཇུག་།སེམས་དང་ཡིད་དང་རྣམ་ཤེས་དང་། །འདུ་ཤེས་རྟོག་པ་སྤངས་པ་སྟེ། །རྣམ་པར་མི་རྟོག་ཆོས་ཐོབ་པས། །
183a7 ཉན་ཐོས་དག་ནི་རྒྱལ་སྲས་མིན། །ཞི་བ་བཟོད་པའི་ཁྱད་པར་ལ། །དེ་བཞིན་གཤེགས་ཀྱི་ཡེ་ཤེས་དགེ། །ཀུན་ཏུ་སྤྱོད་པ་སྤངས་པ་ནི། །ཁྱད་པར་ཕྱིར་ནི་སྐྱེ་བར་འགྱུར། །ཀུན་ཏུ་བརྟགས་པའི་རང་བཞིན་ཡོད། །གཞན་གྱི་དབང་ནི་མེད་པ་སྟེ།
183a8 ནོར་པ་དག་གིས་བརྟགས་པ་འཛིན། །གཞན་གྱི་དབང་ནི་མི་རྟག་གོ། །ཐམས་ཅད་འབྱུང་འགྱུར་གཟུགས་མེད་དེ། །འབྱུང་ལས་མ་གྱུར་གཟུགས་ཡོད་དོ། །དྲི་ཟའི་གྲོང་ཁྱེར་རྨི་ལམ་དང་། །སྒྱུ་མ་སྨིག་རྒྱུ་འབྱུང་འགྱུར་མིན།
iiif viewer powered by OpenSeadragon
