| e-texts navigator |
| Wylie |
300a1 ལོངས་སྤྱོད་དང་། ཡོངས་སུ་སྤྱོད་པ་ལྟ་བུར་འགྱུར་རོ། །དེ་བཞིན་གཤེགས་པ་དེ་ནི་བར་གྱི་བསྐལ་པ་ཉི་ཤུར་གནས་པར་འགྱུར་རོ། །དེ་ལ་ཉན་ཐོས་བརྒྱད་ཁྲིའི་དགེ་འདུན་ཡོད་པར་འགྱུར་རོ། །བྱང་ཆུབ
300a2 སེམས་དཔའ་སུམ་ཁྲི་ཉིས་སྟོང་གི་དགེ་འདུན་ཡོད་པར་འགྱུར་རོ། །ཀུན་དགའ་བོ་ཅིའི་ཕྱིར་འཇིག་རྟེན་གྱི་ཁམས་དེ་རྣམ་པར་སྤྱོད་པ་ཞེས་བྱ་ཞིང་། བསྐལ་པ་ཀུན་དུ་སྣང་བྱེད་ཅེས་བྱ་བར་འགྱུར་ཞེ་ན། ཀུན་དགའ་བོ་བར་གྱི
300a3 བསྐལ་པ་བརྒྱ་སྟོང་མང་པོར་སངས་རྒྱས་ཀྱི་ཞིང་དེར་སྔོན་ནམ་ཡང་དེ་བཞིན་གཤེགས་པ་མ་བྱུང་སྟེ། དེར་དེ་བཞིན་གཤེགས་པ་སྣང་བ་བསམ་གྱིས་མི་ཁྱབ་པ་དེ་འབྱུང་བར་འགྱུར་བ་དེ་ན། གནས་གཙང་མའི་རིས་ཀྱི་ལྷ་རྣམས
300a4 འདི་སྐད་དུ་བསྐལ་པ་འདི་ནི་ཀུན་དུ་སྣང་བ་མེད་པ་ཀུན་དུ་སྣང་བ་མེད་པ་སྟེ། དེ་ལ་དེ་བཞིན་གཤེགས་པ་བྱུང་ངོ་ཞེས་ཆེད་དུ་བརྗོད་པ་ཆེད་དུ་བརྗོད་པར་འགྱུར་བའི་ཕྱིར་རོ། །བྱང་ཆུབ་སེམས་དཔའ་སྣང་བ་བསམ་གྱིས་མི་ཁྱབ་པ་ལུང
300a5 བསྟན་པ་བརྗོད་པ་འདི་བཤད་པ་དང་། ཆོས་ཀྱི་རྣམ་གྲངས་འདི་བཤད་པ་ན། ལྷ་དང་མིའི་སྲོག་ཆགས་སུམ་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་དྲུག་བཅུ་ནི་མི
300a6 སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཉན་ཐོས་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱི
300a7 ངའི་དམ་པའི་ཆོས་ཡོངས་སུ་གཟུང་བ་དང་། ད་ལྟར་དང་། མ་འོངས་པའི་བྱང་ཆུབ་སེམས་དཔའ་རྣམས་ལ་ཕན་གདགས་པའི་ཕྱིར་ཆོས་ཀྱི་རྣམ་གྲངས་འདི་ཟུང་ཤིག་།ཀུན་དགའ་བོས་གསོལ་པ། བཅོམ་ལྡན་འདས་བདག་གིས་ཆོས་ཀྱི་རྣམ
300a8 གྲངས་འདི་གཟུང་ལགས་ན། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འདི་ལས་ཀྱི་སྒྲིབ་པ་རྣམ་པར་སྤོང་བ་ཞེས་བྱ་བ་དང་། སངས་རྒྱས་རྣམ་པར་རོལ་པ་ཞེས་བྱ་བ་དང་།
iiif viewer powered by OpenSeadragon
