| e-texts navigator |
| Wylie |
296b1 ཡོངས་སུ་རྟོགས་པ་སེམས་ཀྱིས་ཤེས་ནས་ཚིགས་སུ་བཅད་དེ་སྨྲས་པ། གང་དག་རྟག་ཏུ་བྱམས་སེམས་དག་སེམས་ལྡན། །གང་དག་མི་བརླང་མཉེན་ཞིང་དྲན་ལྡན་ལ། །ལེགས་པར་བསྡམས་ཤིང་དྲང་ལ་ཚངས་སྤྱོད་པ། །དེ་དག་ལུས་ནི་རྣམ་པར་དག་པར
296b2 འགྱུར། །གང་དག་སྡིག་པ་སྤོང་ཞིང་མི་སྤྱོད་ལ། །རྟག་ཏུ་དགེ་བ་མི་ཆུང་རྣམ་སྤེལ་ཞིང་། །གནོད་པར་སེམས་དང་ཁྲོ་བ་རྣམ་སྤོང་བ། །དེ་དག་ལུས་ནི་རྣམ་པར་དག་པར་འགྱུར། །གང་དག་སངས་རྒྱས་ཆོས་དང་ཚོགས་མཆོག་ལ། །གུས་དང་བཅས་པར་རྟག་ཏུ་མཆོད
296b3 བྱེད་ཅིང་། །གཞན་ལ་རྡེག་འཚོག་སྡིགས་མོ་མི་བྱེད་པ། །དེ་དག་ལུས་ནི་རྣམ་པར་དག་པར་འགྱུར། །གང་དག་གཞན་ལ་ཕྲག་དོག་སེར་སྣ་དང་། །དེ་བཞིན་ང་རྒྱལ་དག་ཀྱང་མི་བྱེད་ལ། །གཞན་གྱི་ཉེས་པ་བྱུང་བ་མི་བརྗོད་པ། །དེ་དག་ལུས་ནི་རྣམ་པར
296b4 དག་པར་འགྱུར། །གཞན་ལ་ཅོ་དྲི་བ་དང་སྨད་པ་དང་། །བཤུང་བ་དག་ནི་ནམ་ཡང་མི་བྱེད་ཅིང་། །གཞན་ལ་འཁྲུལ་པའི་གླགས་ལྟ་མི་བྱེད་པ། །དེ་དག་ལུས་ནི་རྣམ་པར་དག་པར་འགྱུར། །དེ་ནས་བཅོམ་ལྡན་འདས་ལ་རྒྱལ་པོ་གསལ་རྒྱལ་གྱིས
296b5 འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱེའུ་སྣང་བ་བསམ་གྱིས་མི་ཁྱབ་པ་འདི་ཆོས་ཆེན་པོ་དང་ལྡན་པ་ལགས་ན། བཅོམ་ལྡན་འདས་ལས་ཀྱི་སྒྲིབ་པ་གང་ཞིག་གིས། ཁྱེའུ་འདི་བུད་མེད་ཁྱིམ་ཐབ་མ་མཆིས་པའི་མངལ་དུ
296b6 སྐྱེས་ལ། དེར་ཡང་ཁང་སྟོང་དུ་བོར་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན། འདི་ནས་བསྐལ་པ་དགུ་བཅུ་རྩ་གཅིག་ན། དེའི་ཚེ་དེའི་དུས་ན། དེ་བཞིན་གཤེགས་པ་དགྲ
296b7 བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ
296b8 ལྡན་འདས་རྣམ་པར་གཟིགས་ཤེས་བྱ་བ་འཇིག་རྟེན་དུ་བྱུང་ངོ་། །རྒྱལ་པོ་ཆེན་པོ་དེའི་ཚེ་དེའི་དུས་ན། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་དེའི་གསུང་རབ་ལ་བྱང་ཆུབ་སེམས
iiif viewer powered by OpenSeadragon
