| e-texts navigator |
| Wylie |
270a1 བསམ་པ་བརྟན་པར་བྱ་བའི་ཕྱིར་རོ། །མང་དུ་བྱེད་པ་དང་། ཞི་བར་བྱེད་པ་དང་། གཞིར་བྱེད་པ་དང་། རྗེས་སུ་གནས་པར་བྱེད་པ་དང་། འདྲིས་པར་བྱ་བ་དང་། ཤིན་དུ་བརྩོན་པར་བྱའོ། །ཕན་ཡོན་བཅུ་གཅིག་པོ
270a2 སོ་སོར་བཤད་པར་བྱའོ། །བཅུ་གཅིག་གང་ཞེ་ན། བདེ་བར་ཉལ་བ་དང་། བདེ་བར་སད་པ་དང་། སྡིག་པའི་རྨི་ལམ་མི་མཐོང་བ་དང་། དེ་ལ་མི་རྣམས་དགའ་བ་དང་། མི་མ་ཡིན་རྣམས་དགའ་བ་དང་། ལྷ་རྣམས་ཀྱིས་བསྲུང་བ་དང་།
270a3 མེ་དང་དུག་དང་། མཚོན་རྣམས་ཀྱིས་གནོད་པར་མི་འགྱུར་རོ། །དུས་རྟག་ཏུ་སེམས་ཤིན་དུ་དགའ་བར་གནས་པ་དང་། བཞིན་གྱི་མདངས་རབ་ཏུ་གསལ་བ་དང་། སེམས་གསལ་བར་འཆི་བ་དང་། ཆེས་ཆེར་བག་ཡོད་པར་བྱས
270a4 པས་ཚངས་པའི་འཇིག་རྟེན་དུ་སྐྱེ་བའོ། །དགེ་སློང་དག་བྱམས་པའི་སེམས་དང་མི་འབྲལ་བར་རིག་པར་བྱའོ། །བསམ་པས་བརྟེན་པར་བྱའོ། །བསྒོམ་པར་བྱ་བ་དང་། མང་དུ་བྱེད་པ་དང་། ཞི་བར་བྱེད་པ་དང་། གཞིར་བྱེད་པ
270a5 དང་། རྗེས་སུ་གནས་པར་བྱེད་པ་དང་། འདྲིས་པར་བྱ་བ་དང་། ཤིན་དུ་བརྩོན་པར་བྱའོ། །བཅུ་གཅིག་པོ་རྣམས་ཀྱི་ཕན་ཡོན་རྣམས་སོ་སོར་བཤད་ཟིན་ཏོ། །དགེ་སློང་དག་གཞན་ཡང་བྱམས་པའི་ཕན་ཡོན་རྣམས་བཤད
270a6 པར་བྱའོ། །ཁ་ཟས་དུ་མ་ཐོབ་པ་དང་། །རང་གི་ཡུལ་དུ་ཉེ་བར་གནས། །མང་པོ་རྣམས་ནི་འཚོ་བ་ནི། །གང་གིས་བྱམས་པ་མ་སྤངས་ནའོ། །གྲོང་རྡལ་གང་གང་འགྲོ་བ་དང་། །གྲོང་ཁྱེར་རྒྱལ་པོའི་ཕོ་བྲང་དང་། །ཐམས
270a7 ཅད་དུ་ནི་མཆོད་པར་འགྱུར། །གང་གིས་བྱམས་པ་མ་སྤངས་ནའོ། །དེ་ལ་ཆོམ་རྐུན་མི་འབྱུང་ཞིང་། །དེ་ལ་རྒྱལ་པོ་གནོད་མི་བྱེད། །སེམས་ཅན་ཐམས་ཅད་བཤེས་སུ་འགྱུར། །གང་གིས་བྱམས་པ་མ་སྤངས་ནའོ། །ཁྲོ
270a8 མེད་རང་ཡུལ་བདེ་བར་གནས། །སྐྱེ་བའི་འདུན་སར་སྨོད་མེད་དགའ། །མཆོག་གི་གཉེན་དང་ལྡན་པར་འགྱུར། །གང་གིས་བྱམས་པ་མ་སྤངས་ནའོ། །མཆོད་ན་མཆོད་པ་ཐོབ་པར་འགྱུར། །འདུད་ན་སོ་སོར་འདུད་པར་བྱེད། །
iiif viewer powered by OpenSeadragon
