| e-texts navigator |
| Wylie |
66b1 ཤིག་། མེ་ཏོག་སློང་གིས་སྩལ་བར་མཛོད། །ལྔ་པས་སྨྲས་པ། མི་གང་པད་མ་སློང་བྱེད་པ། །དེ་ཀུན་ཁྱོད་ལ་ཀྱལ་པ་ཟེར། །པད་མ་བྱིན་རུང་མ་བྱིན་རུང་། །ཁྱོད་ཀྱི་སྣ་ནི་སྐྱེ་མི་འགྱུར། །མི་དེས་འདི་སྙམ་དུ་མི་བཞི་པོས་ནི་བདག་ལ་བྱིན་ཞིག་སྨྲས
66b2 ཀྱི། མི་ལྔ་པས་ནི་ཇི་ལྟ་བ་བཞིན་དུ་སྙིང་ནས་སྨྲས་ཀྱི། བདག་གིས་དེ་ལ་པད་མ་སྦྱིན་པར་བྱའོ་སྙམ་དུ་བསམས་ནས། དེས་དེ་ལ་པད་མ་ཇི་སྙེད་དགོས་པ་བྱིན་པ་དང་། དེ་དགའ་བ་དང་། མགུ་བ་དང་། རངས་པའི་བསམ་པས་པད་མ་བླངས
66b3 ཏེ། དེ་བུད་མེད་གང་ན་བར་སོང་ནས། དགའ་བ་ཉམས་སུ་མྱོང་བར་བྱས་སོ། །དེ་ནས་དེ་གཉིས་ཀྱིས་འདི་སྙམ་དུ་བདག་ཅག་འདོད་པའི་རྒྱུས་ཀུན་ནས་ཉོན་མོངས་པར་གྱུར་པ་གང་ཡིན་པ་ལ་ལྟོས། འདོད་ཆགས་ཀྱི་སྡུག་བསྔལ་མི་འབྱུང་བར་ཇི་ལྟར་བྱ་སྙམ
66b4 དུ་བསམས་སོ། །སངས་རྒྱས་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་རང་སངས་རྒྱས་འཇིག་རྟེན་དུ་འབྱུང་བས་དེ་དང་ཧ་ཅང་མི་རིང་བ་ཞིག་ན་རང་སངས་རྒྱས་ཀྱི་མཆོད་རྟེན་ཞིག་ཡོད་པ་དེ་ལ་པད་མ་དེ་དག་ཕུལ་ནས་སྨོན་ལམ
66b5 བཏབ་པ། སྦྱིན་པར་བྱ་བའི་ཆོས་ཡོངས་སུ་བཏང་བའི་དགེ་བའི་རྩ་བ་འདིས་བདག་གང་དང་གང་དུ་སྐྱེས་པའི་ཚེ་རབས་དེ་དང་དེར་ཉོན་མོངས་པ་ཆུང་བར་གྱུར་ཅིག་ཅེས་བྱས་སོ། །དེའི་ཚེ་པད་མ་ལེན་པའི་མི་གང་ཡིན་པ་དེ་ནི་འོད་སྲུང་ཆེན་པོ་འདི
66b6 ཡིན་ནོ། །དེའི་ཚེ་དེའི་དུས་ན་བུད་མེད་གང་ཡིན་པ་དེ་ནི་སེར་སྐྱའི་བུ་མོ་བཟང་མོ་འདི་ཡིན་ནོ། །དེ་ལ་པད་མ་ཕུལ་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་འདོད་ཆགས་ཆུང་བར་གྱུར་ཏོ། །ཡང་བཅོམ་ལྡན་འདས་ལ་དགེ
66b7 སློང་རྣམས་ཀྱིས་གསོལ་པ། བཅོམ་ལྡན་འདས་སེར་སྐྱའི་བུ་མོ་བཟང་མོས་ལས་ཅི་ཞིག་བགྱིས་ཤིང་བསགས་ན། གང་གི་སླད་དུ་དེས་འཛམ་བུ་ཆུ་བོའི་གསེར་ལས་བགྱིས་པའི་གཟུགས་བརྙན་རང་གི་འོད་ཀྱིས་མོག་མོག
66b8 པོར་བགྱིས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ཉིད་ཀྱིས་ལས་གང་དག་བྱས་ཤིང་བསགས་པ་ཞེས་བྱ་བ་རྒྱས་པར་བྱའོ། །དགེ་སློང་དག་སྔོན་བྱུང་བ་འདས་པའི་དུས་བསྐལ་པ
iiif viewer powered by OpenSeadragon
