| e-texts navigator |
| Wylie |
60b1 འདི་ལྟ་བུ་དག་བྱོན་ནས་བདག་གིས་དཔོང་སའི་ཁང་པ་གང་ཡིན་པར་གནས་པར་གྱུར་པ་དེ་ནི་བདག་དབང་ཐང་ཆེ་བ་དང་ཕན་འདོགས་པ་དང་ལྡན་པ་ཡིན་ནོ་སྙམ་མོ། །ཡང་སྨྲས་པ། ཀྱེ་མའོ་ཡོན་གནས་བྱོན་པ་དག་།རིང་མོ་ཞིག་ནས་མཐོང་གྱུར་པས།
60b2 འཇིག་རྟེན་འདི་དང་ཕ་རོལ་དུ། །བདག་ནི་བདེ་བ་ཉིད་དུ་གྱུར། །རང་སངས་རྒྱས་དེ་དག་ཀྱང་ཡོན་བདག་གི་དགེ་བའི་རྩ་བ་བསྐྱེད་པའི་ཕྱིར་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དག་གིས་མཚན་མོ་འདས་པར
60b3 མཛད་ནས་གཅིག་ལ་གཅིག་ཀུན་དགའ་བར་འགྱུར་བ་རྩམ་མོ། །དེ་ནས་རང་སངས་རྒྱས་དེ་རྣམས་ཀྱིས་གཅིག་ལ་སྨྲས་པ། ཁྱོད་སུ་ཞིག་།གང་དུ། ཅིའི་ཕྱིར། ཇི་ལྟར་རབ་ཏུ་བྱུང་། དེ་རྣམས་ཀྱིས་དེ་སྐད་ཅེས་སྨྲས་པ་དང་། དེས་དེ་རྣམས་ལ་འདི་སྐད་ཅེས
60b4 སྨྲས་སོ། །ཚེ་དང་ལྡན་པ་རྣམས་ཀྱིས་ཡུལ་ཀ་ལིང་ཀ་ན་རྒྱལ་པོ་རྣ་ལག་ཅན་ཞེས་བྱ་བ་བྱུང་བ་ཐོས་སམ། དེ་དག་གིས་སྨྲས་པ། ཐོས་ཏེ་གཞན་ཡང་བདག་ཅག་གིས་རྒྱལ་པོ་རྣ་ལག་ཅན་དེ་ནི་འབྱོར་པ་དང་། ཡོངས་སུ་གཟུང་བ་རྒྱ་ཆེ་བ་བཞོན་པ་གླང་པོ
60b5 ཆེ་དུ་མ་ཡོད་དོ་ཞེས་ཀྱང་ཐོས་སོ། །དེས་འདི་སྐད་ཅེས་སྨྲས་སོ། །ཁྱེད་ཅག་གིས་ཇི་ལྟར་ཐོས་པ་དེ་བཞིན་མོད་ཀྱི། འོན་ཀྱང་བདག་གིས་ནི་རྒྱལ་སྲིད་ཀྱི་ཉེས་དམིགས་མཐོང་ནས་རབ་ཏུ་བྱུང་ངོ་། །དེ་དག་གིས་སྨྲས་པ། ཁྱོད
60b6 ཀྱིས་རྒྱལ་སྲིད་ཀྱི་ཉེས་དམིགས་ཅི་ཞིག་མཐོང་ནས་རབ་ཏུ་བྱུང་། དེས་སྨྲས་པ། ཉེས་དམིགས་ཡོད་ན་དེ་ཡང་མི་ཆེ་བ་ཞིག་གོ། །ཇི་ལྟ་བུ་ཞིག་བཙུན་པ་དག་ཉོན་ཅིག་།བདག་འདི་ན་སྟེང་གི་ཁང་བཟངས་གི་ཐོག་ན་འདུག་པའི་ཚེ་དེ་ན་བྱ་ཞིག་ཤའི་དུམ་བུ
60b7 ཞིག་ཁྱེར་ནས་ནམ་མཁའ་ལ་ཕུར་བ་ན་དོན་དེའི་ཕྱིར་དེ་གཞན་མང་པོ་ཞིག་གིས་གཙེས་སོ། །དེས་དེ་བོར་པ་དང་གཞན་གྱིས་བླངས་ཏེ། གང་གིས་དབོར་བ་དེ་ནི་བཏང་ལ་གང་གིས་བླངས་པ་དེ་ནི་ཀུན་ནས་བསྐོར་ཏེ། དེ་ལྟར་ཕན་ཚུན་དུ་འཕྲོག་པར་བྱེད
60b8 པ་ན་བདག་ཚུལ་བཞིན་ཡིད་ལ་བྱེད་པར་སྐྱེས་པར་གྱུར་ཏེ། ལེན་པ་གང་ཡིན་པ་དེ་ནི་བཅིངས་ལ་འདོར་བ་གང་ཡིན་པ་དེ་ནི་གཏོང་བར་བྱེད་ན། བདག་རྒྱལ་སྲིད་རྒྱས་པ་ཡོངས་སུ་ལོངས་སྤྱོད་པ་འདིའི་རྒྱུས་བདག་དང་ཉི་འོག་གི་རྒྱལ་པོ་དང་ལྷན་ཅིག་ཏུ་འཐབ་པ་དང་།
iiif viewer powered by OpenSeadragon
