| e-texts navigator |
| Wylie |
302a1 བྱེད་པ་ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ།
302a2 ཡང་དགེ་སློང་མ་གང་ལག་པ་སྦྲེལ་ནས་ཁྲུས་བྱེད་ན་ལྟུང་བྱེད་དོ། །ཡང་གང་ཞེས་བྱ་བ་ནི་བཅུ་གཉིས་སྡེ་དག་གོ། །ལག་པ་སྦྲེལ་ནས་ཞེས་བྱ་བ་ནི་ལག་པ་སྦྲེལ་ཏེ་འོ། །ཁྲུས་བྱེད་ན་ཞེས་བྱ་བ་ལ་ཁྲུས་ནི་གཉིས་ཏེ། དབང་བསྐུར་བའི
302a3 ཁྲུས་དང་། འཇུག་པའི་ཁྲུས་ལས་དོན་འདི་ལ་ནི་འཇུག་པའི་ཁྲུས་ལ་བྱ་བར་དགོངས་སོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་འཇུག་པའི་ཁྲུས
302a4 ལ་ལག་པ་སྦྲེལ་ནས་ཁྲུས་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་ཉི་ཤུ་བདུན་པའི་གསུམ་པ་རྫོགས་སྷོ།། །། གླེང་གཞི་ནི་མཉན་ཡོད་ནའོ། །དེའི་ཚེ་མཉན་ཡོད་ན་དགའ་སྡེའི་ཚོགས་གཉིས
302a5 པོ་གཅིག་ནི་རྒྱལ་རིགས་ཀྱི་དགའ་སྡེའོ། །གཅིག་ཤོས་ནི་བྲམ་ཟེའི་དགའ་སྡེ་འོ། །དེ་ལ་རྒྱལ་རིགས་ཀྱི་དགའ་སྡེ་ནི་གཡུལ་ལ་བྱང་བ་ཡིན་ནོ། །བྲམ་ཟེའི་དགའ་སྡེ་ནི་གར་ལ་བྱང་བ་ཡིན་ནོ། །གང་གི་ཚེ་དགའ་སྡེའི་ཚོགས
302a6 གཉིས་ལས་གཡུལ་འགྱེད་པས་འགྲན་པ་དེའི་ཚེ་རྒྱལ་རིགས་ཀྱི་དགའ་སྡེ་རྒྱལ་བར་འགྱུར་ལ། གང་གི་ཚེ་གར་གྱི་ཚེ་ནི་བྲམ་ཟེའི་དགའ་སྡེ་རྒྱལ་བར་འགྱུར་རོ། །དེ་ནས་རྒྱལ་རིགས་ཀྱི་དགའ་སྡེ་རྣམས་འདི་སྙམ་དུ་སེམས་ཏེ།
302a7 བདག་ཅག་གིས་སུ་ཞིག་ལ་གར་བསླབ་སྙམ་པ་ལས་དེ་དག་འདི་སྙམ་དུ་སེམས་ཏེ། འཕགས་མ་སྦོམ་དགའ་མོ་འདི་ནི་ཤཱཀྱའི་རིགས་ལས་རབ་ཏུ་བྱུང་བ་བཟོའི་གནས་ཐམས་ཅད་དང་། ལས་ཀྱི་གནས་ཐམས་ཅད་ལ་བྱང་བ་ཡིན་ནོ
302a8 སྙམ་དུ་བསམས་ནས། སྦོམ་དགའ་མོ་གང་ན་བ་དེར་དོང་སྟེ་ཕྱིན་པ་དང་། སྦོམ་དགའ་མོ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་གར་ལ་བྱང་བ་ཅུང་ཟད་མངའ་འམ། དེས་འདི་སྐད་ཅེས་སྨྲས་སོ། །
iiif viewer powered by OpenSeadragon
