| e-texts navigator |
| Wylie |
258b1 ཕྱོགས་སུ་ཐལ་མོས་བརྒྱབ་པས་ཇི་ཙམ་ན་སྐྲངས་པར་གྱུར་ཏོ། །གང་གི་ཚེ་འདོད་ཆགས་ཞི་བར་གྱུར་པ་དེའི་ཚེ་ན་ཆོ་ངེས་འདེབས་སོ། །དེ་ནས་ལྷན་ཅིག་གནས་པ་དང་ཉེ་གནས་རྣམས་ཀྱིས་དྲིས་པ་ལས་དེས་སྐབས་དེ་རྒྱས་པར་སྨྲས་པ
258b2 ན་དོན་ཉུང་བའི་དགེ་སློང་མ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་བུད་མེད་ཀྱི་ཡུལ
258b3 ལ་ཐལ་མོས་རྡེག་ན་ལྟུང་བྱེད་དོ། །ཡང་གང་ཞེས་བྱ་བ་ནི་སྦོམ་དགའ་མོ་འོ། །བུད་མེད་ཀྱི་ཡུལ་ལ་ཐལ་མོས་རྡེག་ན་ཞེས་བྱ་བ་ནི་མོ་མཚན་ལ་ཐལ་ལྕག་གིས་བརྡེགས་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི
258b4 ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་བུད་མེད་ཀྱི་ཡུལ་ལ་ཐལ་མོས་རྡེག་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་བརྒྱད་པའི་ཚིགས་སུ་བཅད་པའི་སྡོམ་རྫོགས་སྷོ།། །། སྡོམ་ནི། རྗེན་པ་བཙོ་བར་མི་བྱ་དང་། །ཆུས་ནི
258b5 གཏོར་བར་མི་བྱ་དང་། །སྔོན་པོར་བཤང་བ་མི་དོར་དང་། །རྩིག་པའི་རྒྱབ་ཏུ་མི་དོར་བའོ། །གླེང་གཞི་ནི་མཉན་ཡོད་ནའོ། །གྲོང་ཁྱེར་བ་དག་ལྡུམ་ར་དང་། སྐྱེད་མོས་ཚལ་ལ་དགའ་བས་དེ་དག་གི་ཀུན་ཏུ་སྤྱོད་པ་ནི་གང་གི་ཚེ་སྐྱེད་མོས་ཚལ་དག་ཏུ
258b6 འདོང་བ་ན་གཡོས་མཁན་གྱིས་བཅའ་བ་འཚེད་པར་བྱེད་པ་ཡིན་པས་དེ་དག་གིས་ཡང་གཡོས་མཁན་ལ་སང་ནང་པར་སྔར་ཤོག་ཤིག་ཅེས་བསྒོ་བ་ལས། དེ་མ་འོངས་པར་སྦོམ་དགའ་མོ་སྔ་དྲོ་ཤམ་ཐབས་བགོས། ཆོས་གོས་དང་ལྷུང་བཟེད་བླངས་ཏེ
258b7 བསོད་སྙོམས་ཀྱི་ཕྱིར་སྤྱོད་ཡུལ་དུ་ཞུགས་ནས་ཁྱིམ་བདག་གཅིག་གི་ཁྱིམ་དུ་ཞུགས་ཏེ་འདི་སྐད་ཅེས་སྨྲས་སོ། །མཚན་བཟང་མ་བསོད་སྙོམས་བྱིན་ཅིག་།དེས་འདི་སྐད་ཅེས་སྨྲས་སོ། །འཕགས་མ་བདག་གློ་བ་མི་དགའ་ལགས་སོ། །སྦོམ
258b8 དགའ་མོས་འདི་སྐད་ཅེས་སྨྲས་སོ། །ཁྱོད་ཅི་སྟེ་མི་དགའ། དེས་སྐབས་དེ་རྒྱས་པར་སྨྲས་པ་དང་། དེས་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་རང་ཉིད་མི་འཚེད། དེས་འདི་སྐད་ཅེས་སྨྲས་སོ། །བདག་གིས་རྔོ་མི་ཐོག་ལགས་སོ། །དེ་ནས
iiif viewer powered by OpenSeadragon
