| e-texts navigator |
| Wylie |
250a1 བཅོམ་ལྡན་འདས་དགེ་སློང་མ་རྣམས་ཀྱིས་འབྲུའི་སྐྱེམས་དང་། བཅོས་པའི་སྐྱེམས་ཀྱི་བསླབ་པའི་གཞི་ལ་ཇི་ལྟར་གཟུང་བར་བགྱི། དེ་ནས་བཅོམ་ལྡན་འདས་ཀྱིས་དགེ་སློང་མ་རྣམས་ལ་བསླབ་པར་འདོད་པ་དང་། བསླབ
250a2 པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་གསུངས་ནས་འདི་སྐད་ཅེས་བཀའ་སྩལ་ཏོ། །འབྲུའི་ཆང་དང་། བཅོས་པའི་ཆང་འཐུང་ན་ལྟུང་བྱེད་དོ། །འབྲུའི་ཆང་ཞེས་བྱ་བ་ནི་ཕབས་དང་སྦྱར་བ་དང་། ཟས་དང་སྦྱར་བའོ། །
250a3 བཅོས་པའི་ཆང་ཞེས་བྱ་བ་ནི་དགུན་ཆང་དང་། བུ་རམ་ཆང་དང་། རྫས་གཞན་དག་སྦྱར་བའི་འོ། །འཐུང་ན་ཞེས་བྱ་བ་ནི་ལྐོག་མར་མིད་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཆང
250a4 གི་ཁ་དོག་དང་། ཆང་གི་དྲི་དང་། ཆང་གི་རོ་འཐུང་ངམ། འཐུང་དུ་འཇུག་ན་ལྟུང་བྱེད་དོ། །བཅོས་པའི་ཆང་འཐུང་ན་ལྟུང་བྱེད་དོ། །བསྲེས་པའི་ཆང་འཐུང་ན་ལྟུང་བྱེད་དོ། །ཆང་གི་ཁ་དོག་ན་ཉེས་བྱས་སོ། ཆང་གི་དྲི་ན་ཉེས་བྱས་སོ། །ཆང་གི་རོ་ན
250a5 ཉེས་བྱས་སོ། །གླུམ་ཟ་ན་ཉེས་བྱས་སོ། །གལ་ཏེ་མཛེ་བྱུང་ནས་ཡན་ལག་བསྐུད་པ་དང་། ཁ་ནད་ཀྱི་ཕྱིར་ཁར་བླུགས་ཏེ་འཛིན་པ་དང་། བསྐོལ་བ་ལ་ནི་ལྟུང་བ་མེད་དོ། །ལྟུང་བྱེད་དྲུག་པའི་དགུ་པ་རྫོགས་སྷོ།། །།
250a6 གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་བརྟེན་ནས་དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མཛད་པ་དེའི་ཚེ་བཅུ་གཉིས་སྡེ་རྣམས་གྲོང་དུ་དུས་སུ་ཡང་རྒྱུ་བར་བྱེད། དུས
250a7 མ་ཡིན་པར་ཡང་རྒྱུ་བར་བྱེད་པ་དང་། དེ་དག་ལ་དགེ་སློང་མ་རྣམས་ཀྱིས་སྨྲས་པ། ཕུ་ནུ་མོ་དག་བཅོམ་ལྡན་འདས་ཀྱིས་དུས་མ་ཡིན་པར་རྒྱུ་བའི་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་རྣམས་ལ
250a8 མཛད་ཀྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པའི་སྐབས་དེ་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་གོ་བར་བྱ་སྟེ་འགྲོ་བར་བྱའོ། །
iiif viewer powered by OpenSeadragon
