| e-texts navigator |
| Wylie |
240a1 དང་། ཁྱོད་གནས་དེར་མ་སོང་ངམ། ཁྱོད་ཚངས་པ་མཚུངས་པར་སྤྱོད་པ་རྣམས་དང་མི་མཐུན་པར་མ་གྱུར་གྲང་ཞེས་བྱ་བ་སྟེ་དེ་ལྟ་བུ་ནི་འདུལ་བའི་ཡོ་བྱད་ཡིན་ནོ། །བར་སྡོམ་ནི། རིགས་དང་བསྙེན
240a2 པར་རྫོགས་པ་དང་། །མཁན་མོ་ཉིད་དང་དེ་འཕྲོགས་དང་། །འགྲོ་བ་དང་ནི་སྨྲ་བ་དང་། །དོན་ཉིད་དང་ནི་འདུལ་བའོ། །ལྟུང་བྱེད་ལྔ་བའི་ལྔ་པ་རྫོགས་སྷོ།། །། གླེང་གཞི་ནི་མཉན་ཡོད་ནའོ། །དེའི་ཚེ་བཅུ
240a3 གཉིས་སྡེ་རྣམས་དགོད་པའི་བསམ་པས་སོར་མོས་དགེ་སློང་མ་རྣམས་ཀྱི་མཆན་ཁུང་དག་ཏུ་འཛུགས་ཤིང་ག་ག་ཚིལ་བྱེད་པ་དང་དོན་ཉུང་བའི་དགེ་སློང་མ་དག་། སྨོད་པར་བྱེད་པའི་སྐབས་དེ་བཅོམ་ལྡན་འདས
240a4 ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། སོར་མོས་ག་ག་ཚིལ་བྱེད་ན་ལྟུང་བྱེད་དོ། །སོར་མོས་ཞེས་བྱ་བ་ནི་ག་ག་ཚིལ་བྱ་བའི་བསམ་པ་ཅན
240a5 གྱི་གང་ཡིན་པའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་སོར་མོ་གཅིག་གིས་ག་ག་ཚིལ་བྱེད་ན་ལྟུང་བྱེད་དོ། །དེ་བཞིན་དུ་གཉིས་དང་། ལྔའི་བར་གྱིས་བྱེད
240a6 ན་ལྟུང་བྱེད་ལྔའོ། །གལ་ཏེ་སྨེ་བ་འམ་ནག་ནོག་སྟོན་ན་ལྟུང་བ་མེད་དོ། །ལྟུང་བྱེད་ལྔ་པའི་དྲུག་པ་རྫོགས་སྷོ།། །། གླེང་གཞི་ནི་མཉན་ཡོད་ནའོ། །གང་གི་ཚེ་བཅོམ་ལྡན་འདས་ཀྱིས་བཅུ་བདུན་སྡེ་རྣམས་ལས
240a7 བརྟེན་ཏེ་ཆུ་ལ་རྩེ་བའི་བསླབ་པའི་གཞི་བཅའ་བ་མཛད་པ་དང་། དེ་ནས་བཅུ་གཉིས་སྡེ་དེ་དག་ཆུར་ཞུགས་ནས་རྩེ་བར་བྱེད། རྩེར་འཇུག་པར་བྱེད་པ་དང་། དེ་དག་ལ་དགེ་སློང་མ་རྣམས་ཀྱིས་འདི་སྐད་ཅེས
240a8 སྨྲས་སོ། །ཕུ་ནུ་མོ་དག་བཅོམ་ལྡན་འདས་ཀྱིས་བསླབ་པའི་གཞི་བཅའ་བ་མ་མཛད་དམ། དེ་དག་གིས་འདི་སྐད་ཅེས་དགེ་སློང་དག་ལ་ཡིན་གྱི། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང་། དོན་ཉུང་བའི་དགེ་སློང་མ་དག་སྨོད་པར
iiif viewer powered by OpenSeadragon
