| e-texts navigator |
| Wylie |
221b1 ནུབ་གཉིས་དང་། །བར་ཆད་དང་ནི་ཤེས་བཞིན་དང་། །དགེ་ཚུལ་མ་གཉིས་ཁ་དོག་བསྒྱུར། །གླེང་གཞི་ནི་མཉན་ཡོད་ནའོ། །དེའི་ཚེ་སྦོམ་དགའ་མོ་དགེ་སློང་མ་རྣམས་དང་ལྷན་ཅིག་ཐབ་མོ་དང་མཚང་འདྲུ་བར་བྱེད་དོ། །བུད་མེད་ནི་རང་བཞིན་གྱིས་ཁྲོ
221b2 བ་ཡིན་པས་དེ་རང་བཞིན་གྱིས་ཁྲོས་པས་ཁྲོས་འཁྲུགས་རྔམ་པར་གྱུར་ནས་དགེ་སློང་མ་རྣམས་ལ་ལྟག་དབྱུག་དང་། ཐལ་ལྕག་གིས་བརྡེགས་པ་དང་། དོན་ཉུང་བའི་དགེ་སློང་མ་རྣམས་སྨོད་པར་བྱེད་པའི་སྐབས་དེ་བཅོམ
221b3 ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས་བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མ་གང་ཁྲོས་འཁྲུགས་རྔམ་པར་གྱུར་ཏེ་ཡིད་མ་རངས་ནས་དགེ་སློང་མ་ལ
221b4 རྡེག་ན་ལྟུང་བྱེད་དོ། །ཡང་དགེ་སློང་མ་གང་ཞེས་བྱ་བ་ནི་སྦོམ་དགའ་མོའོ། །ཁྲོས་ཞེས་བྱ་བ་ནི་ཀུན་ནས་དཀྲིས་པའོ། །འཁྲུགས་རྔམ་པར་གྱུར་ཏེ་ཞེས་བྱ་བ་ནི་ལྷག་པར་ཞེན་ནས་སོ། །ཡིད་མ་རངས་ནས་ཞེས་བྱ་བ་ནི་ཡིད་མི་བདེ
221b5 བ་སྐྱེས་པའོ། །དགེ་སློང་མ་ལ་ཞེས་བྱ་བ་ནི་ཆོས་འདི་པ་ལའོ། །རྡེག་ན་ཞེས་བྱ་བ་ནི་སོར་མོ་ལྔས་རྡེག་ནའོ། །ལྟུང་བྱེད་དོ་ཞེས་བྱ་བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། ཡང་དགེ་སློང་མ་གང་ཁྲོས་ནས་དགེ་སློང་མ་རྣམས་ལ
221b6 སོར་མོ་གཅིག་གིས་བརྡེགས་ན་ལྟུང་བྱེད་དུ་འགྱུར་རོ། །དེ་བཞིན་སོར་མོ་ལྔས་བརྡེགས་ན་ལྟུང་བྱེད་ལྔའོ། །དེ་བཞིན་དུ་ལག་པ་དང་། མཛུབ་མོ་དང་། མགོ་བོ་དང་། ལྟག་པ་དང་། ལུས་དང་། གྲུ་མོ་དང་། བརླ་དང་། བྱིན་པ་དང་། རྐང་པ་དང་།
221b7 རྐང་པའི་མཐེ་བོས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེ་བཞིན་དུ་དབྱུག་པ་དང་། གསེག་མ་དང་། བོད་པ་ལ་སོགས་པས་བརྡེགས་ན་ཐམས་ཅད་དུ་ལྟུང་བྱེད་དུ་འགྱུར་རོ། །གལ་ཏེ་ཕྱགས་མས་བརྡེགས་ན་ཕྱགས་མའི་ཉག་མ་ཇི
221b8 སྙེད་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ནི་ཉེས་བྱས་སོ། །དེ་བཞིན་དུ་མོན་སྲན་སྡེའུའི་སྤར་བས་བརྡེགས་ན་མོན་སྲན་སྡེའུའི་འབྲུ་ཇི་སྙེད་ལུས་ལ་ཕོག་པ་དེ་སྙེད་ཀྱི་ལྟུང་བྱེད་དོ། །ཇི་སྙེད་མ་ཕོག་པ་དེ་སྙེད་ཀྱི་ཉེས་བྱས་སོ། །
iiif viewer powered by OpenSeadragon
