| e-texts navigator |
| Wylie |
220b1 པོས་སྤྲིང་ནས་དེར་དོང་ངོ་། །དེའི་འོག་ཏུ་དགེ་འདུན་ལ་གསོལ་བ་བཏབ་ནས་དྲུག་སྡེ་རྣམས་དོང་ངོ་། །དེའི་ཚེ་དྲུག་སྡེ་དེ་རྣམས་ལ་ཞག་གཉིས་ཀྱི་མཐའི་བསླབ་པའི་གཞི་བཅའ་བ་མཛད་དོ། །དེ་ནས་དུས་གཞན་ཞིག་ན་བཅུ་གཉིས་སྡེ་རྣམས་དམག
220b2 ཤོམ་པར་ཞག་གཉིས་ཀྱི་མཐར་གནས་པར་བྱེད་དོ། །གང་གི་ཚེ་དེ་དག་མངོན་དུ་ལྷགས་པ་དེའི་ཚེ་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །དགའ་མོ་ཉེ་དགའ་མོ། སྦོམ་དགའ་མོ་དག་འོངས་པ་ལེགས་སོ་འོངས་པ་ལེགས་སོ། །
220b3 ཁྱེད་ཅག་གང་ནས་འདིར་འོངས། གང་དུ་གནས། དེ་དག་གིས་འདི་སྐད་ཅེས་སྨྲས་སོ། །ཁོ་མོ་ཅག་དམག་ཤོམ་པ་ལ་ཆོས་འཆད་དུ་དོང་སྟེ་དེ་ཉིད་དུ་གནས་སོ། །དེ་ནས་དགེ་སློང་མ་དེ་རྣམས་ཀྱིས་འདི་སྐད་ཅེས་སྨྲས་སོ། །བཅོམ་ལྡན་འདས
220b4 ཀྱིས་ཞག་གཉིས་ཀྱི་མཐའི་བསླབ་པའི་གཞི་བཅའ་བ་མ་མཛད་དམ། དེ་རྣམས་ཀྱིས་འདི་སྐད་ཅེས་དགེ་སློང་རྣམས་ལ་བཅའ་བ་མཛད་ཀྱིས། དགེ་སློང་མ་རྣམས་ལ་ནི་མ་ཡིན་ནོ་ཞེས་སྨྲས་པ་དང་། དོན་ཉུང་བའི་དགེ་སློང་མ་དག་སྨོད་པར་བྱེད
220b5 པའི་སྐབས་དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བའི་བར་དུ་མཛད་དེ། ཡང་དགེ་སློང་མས་དམག་ཤོམ་པ་ལ་བལྟ་དགོས་པའི་རྐྱེན་དེ་ལྟ་བུ་བྱུང་ན་ཞག་གཉིས་ཀྱི
220b6 མཐར་དམག་དེའི་ནང་དུ་དགེ་སློང་མ་དེས་གནས་པར་བྱའོ། །དེ་ལས་ལྷག་པར་གནས་ན་ལྟུང་བྱེད་དོ། །དགེ་སློང་མས་ཞེས་བྱ་བ་ནི་བཅུ་གཉིས་སྡེ་དག་གོ། །དེ་ལྟ་བུའི་རྐྱེན་བྱུང་ན་ཞེས་བྱ་བ་ནི་དེ་ལྟ་བུའི་རྐྱེན་བྱུང་བ་མ་གཏོགས་པའོ། །ཤོམ་པ་ཞེས་བྱ་བ
220b7 ནི་དམགས་ལ་མངོན་པར་དགའ་བའོ། །དམག་ཅེས་བྱ་བ་ནི་ཞེས་བྱ་བ་ནས་རྣམ་པ་བཞིའོ་ཞེས་བྱ་བའི་བར་རོ། །ཞག་གཉིས་ཀྱི་མཐར་ཞེས་བྱ་བ་ནི་ཉིན་ཞག་གཉིས་སུའོ། །དེ་ལས་ལྷག་པར་ཞེས་བྱ་བ་ནི་དེ་ལས་འདས་པར་རོ། །ལྟུང་བྱེད་དོ་ཞེས་བྱ
220b8 བ་ནི་གོང་མ་བཞིན་ནོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་མས་ཇི་ཙམ་ཅུང་ཟད་ཞག་གཉིས་ལས་ལྷག་པར་དམག་གི་ནང་དུ་གནས་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལྟུང་བྱེད་གསུམ་པའི་བཅུ་གཅིག་པ་རྫོགས་སྷོ།། །། གླེང་གཞི་ནི
iiif viewer powered by OpenSeadragon
