| e-texts navigator |
| Wylie |
158b1 ཚེ་དང་ལྡན་པ་ཞལ་ཏ་བྱེད་པ་ཁོ་མོ་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ་དྲན་པར་བྱའོ། །ལན་གཉིས་ལན་གསུམ་དུ་སོང་སྟེ་བསྐུལ་ཅིང་དྲན་པར་བྱས་པ་ལས་གལ་ཏེ་གོས་གྲུབ་ན་དེ་ལྟ་ན་ལེགས། ཇི་སྟེ་མ་གྲུབ་ན་ལན
158b2 བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ལན་བཞི་ལན་ལྔ་ལན་དྲུག་གི་མཐར་ཐུག་གི་བར་དུ་ཕྱོགས་སུ་བསྡད་པར་བྱས་པ་ལས་གལ་ཏེ་གོས་གྲུབ་ན་དེ་ལྟ་ན་ལེགས། ཇི་སྟེ་མ་གྲུབ་ན
158b3 དེ་ལས་ལྷག་པར་གོས་བསྒྲུབ་པའི་ཕྱིར་བརྩལ་བ་བྱས་ཏེ་གོས་བསྒྲུབ་ན་སྤང་བའི་ལྟུང་བྱེད་དོ། །གལ་ཏེ་མ་གྲུབ་ན་དགེ་སློང་མ་དེས་ཕྱོགས་གང་ནས་གོས་ཀྱི་རིན་དེ་དག་འོངས་པ་དེར་བདག་ཉིད་འགྲོ་བར་བྱའོ། །ཡང་ན་ཡིད་གཅུགས
158b4 པའི་ཕོ་ཉ་ལས་ཁྱེད་ཀྱིས་དགེ་སློང་མ་མིང་འདི་ཞེས་བྱ་བའི་ཆེད་དུ་གོས་ཀྱི་རིན་གང་ཡིན་པ་དེ་དག་བསྐུར་བ་ལས་གོས་ཀྱི་རིན་དེ་དག་གིས་ནི་དགེ་སློང་མ་དེའི་དོན་ཅི་ཡང་མ་གྲུབ་ཀྱིས་ཤེས་པར་གྱིས་ཤིག་། ཚེ་དང་ལྡན་པ་དག་རང་གི་ནོར་ཆུད་མ
158b5 གཟེན་ཅིག་ཅེས་སྤྲིང་བར་བྱ་སྟེ། དེ་ལ་དེ་ནི་ཆོ་ག་ཡིན་ནོ། །དགེ་སློང་མའི་ཆེད་དུ་ཞེས་བྱ་བ་ནི་ཤཱཀྱའི་བུ་མོ་ཉེ་དགའ་མོའི་འོ། །རྒྱལ་པོ་ནི་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་སྟེ། བུད་མེད་དམ། སྐྱེས་པ་འམ།
158b6 མ་ནིང་རྒྱལ་པོའི་དབང་བསྐུར་བས་དབང་བསྐུར་བ་གང་ཡང་ཡིན་པ་དེ་ནི་རྒྱལ་པོ་ཡང་ཡིན། དེ་ནི་རྒྱལ་རིགས་ཀྱང་ཡིན། དེ་ནི་སྤྱི་བོ་ནས་དབང་བསྐུར་བ་ཡང་ཡིན་ནོ། །བློན་པོ་ཆེན་པོ་འམ་ཞེས་བྱ་བ་ནི་རྒྱལ་པོའི་བྱ་བ་བྱེད་པ་སྟེ།
158b7 གསང་ཚིག་འཐུན་པས་འཚོ་བའོ། །བྲམ་ཟེ་འམ་ཞེས་བྱ་བ་ནི་བྲམ་ཟེ་གཙང་སྒྲ་ཅན་ནོ། །ཁྱིམ་བདག་གམ་ཞེས་བྱ་བ་ནི་ཕྱུག་པོའོ། །གྲོང་རྡལ་གྱི་མི་ཞེས་བྱ་བ་ནི་གྲོང་གླིངས་པའོ། །ཡུལ་གྱི་མི་འམ
158b8 ཞེས་བྱ་བ་ནི་ཡུལ་ན་གནས་པའོ། །ནོར་ཅན་ནམ་ཞེས་བྱ་བ་ནི་ནོར་བྱེ་བས་ཕྱུག་པའོ། །ཚོང་དཔོན་ནམ་ཞེས་བྱ་བ་ནི་ཅོད་པན་བཅིངས་པའོ། །དེད་དཔོན་གྱིས་ཞེས་བྱ་བ་ནི་གང་གིས་ཡུལ་གཞན་དུ
iiif viewer powered by OpenSeadragon
