| e-texts navigator |
| Wylie |
152a1 ལ་འབུལ་བར་བྱེད་པ་སྟེ། འདི་ནི་བོར་བ་བླངས་པའི་གོས་ཤེས་བྱའོ། །དུར་ཁྲོད་པ་ཞེས་བྱ་བ་ནི་ཡོངས་སུ་འཛིན་པ་མེད་པའི་དུར་ཁྲོད་ནས་བླངས་པ་གང་ཡིན་པའོ། །ལྔ་པ་ཉིད་ནི་ཕྱག་དར་ཁྲོད་པའོ། །གཞན་ཡང
152a2 ཕྱག་དར་ཁྲོད་པ་ནི་ལྔ་སྟེ། ལྔ་གང་ཞེ་ན། ཕྱག་དར་ཁྲོད་པ་ལམ་པོ་ཆེ་པ་དང་། ཆུ་འགྲམ་པ་དང་། དགོན་པར་བོར་བ་དང་། རལ་རུལ་དང་། ལྔ་པ་ཉིད་ནི་ཕྱག་དར་ཁྲོད་པའོ། །གཞན་ཡང་ཕྱག་དར་ཁྲོད་པ་ནི་ལྔ་སྟེ། བེའུ་ཡིས་ཟོས
152a3 པ་དང་། སྲིན་གྱིས་ཟོས་པ་དང་། བྱི་བས་ཟོས་པ་དང་། མེས་ཚིག་པ་དང་། ལྔ་པ་ཉིད་ནི་ས་ལ་ལྷུང་བའི་གོས་སོ། །དགེ་སློང་མས་གོས་སར་པ་རྙེད་ལ་གལ་ཏེ་ནུས་ན་དེས་གོས་དེ་ལས་སྣམ་སྦྱར་ནི་ཉི་རིམ་དུ་བྱ། གདིང་བ་ཡང་ཉི་རིམ་དུ
152a4 བྱ། བླ་གོས་ནི་ཆིག་རྐྱང་དུ་བྱ། མཐང་གོས་ཀྱང་ཆིག་རྐྱང་དུ་བྱའོ། །དེ་བཞིན་དུ་རྔུལ་ཟན་དང་། ཤིང་ང་དཔུང་ཆད་ཀྱང་ཆིག་རྐྱང་དུ་བྱའོ། །དགེ་སློང་མས་སར་པ་ལ་སྣམ་སྦྱར་ཉི་རིམ་ལ་རིམ་པ་གསུམ་པ་སློན་པར་བྱེད་ན་དེ
152a5 ཀློན་པར་བྱེད་པ་ན་ཉེས་བྱས་སོ། །ཞག་བཅུ་འདས་ན་སྤང་བའི་ལྟུང་བྱེད་དོ། །དགེ་སློང་མས་སར་པ་ལ་སྣམ་སྦྱར་ཉི་རིམ་བྱས་པ་ལས་གཞན་དུ་སླན་ནོ་སྙམ་ནས་རིམ་པ་གཅིག་འབོགས་པར་བྱེད་ན་དེ་འབོགས་པར་བྱེད་པ་ན་ཉེས
152a6 བྱས་སོ། །ཞག་བཅུ་འདས་ན་སྤང་བའི་ལྟུང་བྱེད་དོ། །གལ་ཏེ་འདི་སྙམ་དུ་སེམས་བསྐྱེད་དེ། བཀོགས་ལ་བཀྲུས་ཤིང་ཁ་བསྒྱུར་ཏེ། འདི་ཉིད་ལ་ཀླན་ནོ་སྙམ་པས་དེ་འབོགས་པར་བྱེད་ན་ལྟུང་བ་མེད་དོ། །ཞག་བཅུ་འདས་ན་སྤང
152a7 བའི་ལྟུང་བྱེད་དོ། །དེ་བཞིན་དུ་གདིང་བ་ལ་ཡང་བརྗོད་པར་བྱའོ། །བླ་གོས་ཆིག་རྐྱང་ལ་རིམ་པ་ཀློན་པར་བྱེད་ན་དེ་ཀློན་པ་ལ་ཉེས་བྱས་ལ། ཞག་བཅུ་འདས་ན་སྤང་བའི་ལྟུང་བྱེད་དོ། །བླ་གོས་ལ་ཇི་ལྟ་བ་བཞིན་དུ་མཐང་གོས
152a8 ལ་ཡང་དེ་བཞིན་དུ་བརྗོད་པར་བྱའོ། །ཆོས་གོས་ལྔའི་བར་དུ་ཡང་བརྗོད་པར་བྱ་སྟེ། ཐམས་ཅད་ལ་ཡང་སྤང་བའི་ལྟུང་བྱེད་དོ་ཞེས་བརྗོད་པར་བྱའོ། །དགེ་སློང་མས་དུས་ཚིགས་སུ་སྤྱད་པའི་གོས་ཤིག་རྙེད་ལ། གལ་ཏེ་ནུས་ན
iiif viewer powered by OpenSeadragon
