| e-texts navigator |
| Wylie |
126a1 ཀྱིས་ལན་གསུམ་གྱི་བར་དུ་བསྒོ་ན་ནན་གྱིས་མཆོག་ཏུ་ཞེས་བྱ་བ་ནས་གཞན་ནི་རྨོངས་པའོ་ཞེས་བྱ་བའི་བར་དུའོ། །སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་སོ། །དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་པ་དང་།
126a2 དེ་ནས་བཅོམ་ལྡན་འདས་ཀྱིས་བྱུང་བ་འདི་དང་ཞེས་བྱ་བ་ནས། བསླབ་པ་བཅའ་བ་མཛད་པའི་བར་དུ་སྟེ། ཡང་དགེ་སློང་མ་གང་ཞིག་དགེ་སློང་མ་གང་དག་འདྲེས་པར་གནས་ཤིང་། རྒོད་པ་དང་། རྩེ་བ་དང་། ལུས་ཀྱི་ཙབ་ཧྲལ་བྱེད་པར་ཤེས་བཞིན་དུ་དེ་དག
126a3 ཐ་དད་དུ་གནས་པ་ལ་འདི་སྐད་ཅེས་ཕུ་ནུ་མོ་ཁྱོད་ཐ་དད་དུ་མ་གནས་པར་ཁྱེད་འདྲེས་པར་གནོས་ཤིག་། ཁྱེད་འདྲེས་པར་གནས་ན་དགེ་བའི་ཆོས་རྣམས་འཕེལ་བ་ཁོ་ནར་འགྱུར་གྱི་འགྲིབ་པ་ནི་མ་ཡིན་པར་རིག་པར་བྱའོ་ཞེས་ཟེར་ན། དགེ་སློང་མ་དེ་ལ་དགེ་སློང་མ
126a4 རྣམས་ཀྱིས་འདི་སྐད་ཅེས་བརྗོད་པར་བྱ་སྟེ། དགེ་སློང་མ་འདྲེས་པར་གནས་ཤིང་རྒོད་པ་དང་། རྩེ་བ་དང་། ལུས་ཀྱིས་ཙབ་ཧྲལ་བྱེད་པ་ལས་ཐ་དད་དུ་གནས་པ་རྣམས་ལ་འདི་སྐད་ཅེས་ཁྱེད་འདྲེས་པར་གནོས་ལ་ཐ་དད་དུ་མ་གནས་ཤིག་ཅེས
126a5 མ་ཟེར་ཅིག་། དེ་ལ་དགེ་སློང་མ་རྣམས་ཀྱིས་འདི་སྐད་ཅེས་བརྗོད་པ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར
126a6 བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་ཏེ། གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལན་གསུམ་ཞེས་བྱ་བ་ནས། ཆོས་འདི་ཡང་ངེས་པར་འབྱུང་བ་དང་བཅས་པ་དགེ་འདུན་ལྷག་མའོ། །
126a7 ཡང་དགེ་སློང་མ་གང་ཞིག་ཅེས་བྱ་བ་ནི་སྦོམ་དགའ་མོའོ། །དགེ་སློང་མ་གང་དག་ཅེས་བྱ་བ་ནི་འཆི་ལྟས་དང་། ཉེ་བའི་འཆི་ལྟས་སོ། །རྒོད་པ་ནི་འཕྱར་བའོ། །རྩེ་བ་ནི་རྩེད་མོའོ། །ལུས་ཀྱི་ཙབ་ཧྲལ་ནི་རྒོད་བྲོར་རུང་བའོ། །ཤེས་བཞིན་དུ་ཞེས་བྱ་བ་ནི་བདག་ཉིད
126a8 ཀྱིས་སམ། གཞན་གྱིས་དེ་ལ་བརྗོད་ནས་སོ། །ཐ་དད་དུ་གནས་པ་དེ་དག་ལ་ཞེས་བྱ་བ་ནི་སོ་སོར་གནས་པ་ལའོ། །འདི་སྐད་ཅེས་ཟེར་ན་ཞེས་བྱ་བ་ནི་སྨྲ་ནའོ། །ཕུ་ནུ་མོ་ཁྱེད་ཅེས་བྱ་བ་ནི་འཆི་ལྟས་དང་ཉེ་བའི་འཆི་ལྟས་སོ། །ཐ་དད་དུ་མ་གནས་པར་ཞེས་བྱ་བ་ནི
iiif viewer powered by OpenSeadragon
