| e-texts navigator |
| Wylie |
102a1 མའི་ཚལ་དུའོ། །ཅིའི་ཕྱིར་བསོད་སྙོམས་ལ་རྒྱུ། དེས་སྨྲས་པ། ཅི་ཟན་གཅོད་ཕོད་དམ། བཙུན་པ་ཅི་འོད་མའི་ཚལ་ན་ད་ལྟར་དགེ་འདུན་ལ་སྦྱིན་བདག་རྣམས་བཟའ་བ་དང་། བཅའ་བ་དང་། བལྡག་པའི་རྣམ་པ་བསོད་པ་བསོད་པ་དག་འབུལ་བར་མི
102a2 བགྱིད་ལགས་སམ། ཁྱིམ་བདག་གལ་ཏེ་དེ་ལྟར་གྱུར་དུ་ཟིན་ན། ཁོ་བོ་ཁྱོད་ཀྱི་ཡུལ་དུ་བསོད་སྙོམས་ལ་འོང་རེ་སྐན། ཁྱིམ་བདག་གིས་དགེ་སློང་གི་ཚིག་ཐོས་ནས་དྲུག་སྡེ་རྣམས་ལ་དོགས་པ་སྐྱེས་ཏེ། དེ་དག་ནི་བདག་ལ་གཞན་དུ་སྨྲ་ལ། དགེ་སློང
102a3 འདི་ཡང་གཞན་དུ་སྨྲའོ། །སྙམ་མོ་དེས་དགེ་སློང་དེ་ལ་ཐུགས་ཁྲལ་སྐྱུངས་ཤིག་དང་། དེང་ཁྱོད་ཀྱིས་གདུགས་ཚོད་བདག་སྦྱོར་ན་བདག་རྗེས་སུ་གཟུང་དུ་གསོལ་ཞེས་བྱ་བའི་བར་ནས་དེས་དགེ་སློང་དེ་ཁྲིད་དེ་སོང་ངོ་།། །།དགེ་སློང་མའི
102a4 འདུལ་བ་རྣམ་པར་འབྱེད་པ། བམ་པོ་བརྒྱད་པ། དྲུག་སྡེས་བསྐོས་པའི་དགེ་སློང་གཉིས་ཀྱང་འོངས་པ་དང་། ཁྱིམ་བདག་དེས་དེ་དག་བདེ་བར་འདུག་ཏུ་བཅུག་སྟེ། བཟའ་བ་དང་། བཅའ་བ་གཙང་ཞིང་བསོད་པ་རབ་ཏུ་མང་པོ་དག་ལེགས་པར
102a5 བྲིམས་ཤིང་བསྟབས་ཏེ་ཟན་ཟོས་ཟིན་པ་དང་། ཁྱིམ་བདག་གིས་དྲུག་སྡེ་གཉིས་ལ་འཕགས་པ་དག་གིས་ནི་བདག་ལ་གདུགས་གཅིག་བཞིན་དུ་ཆོས་བཤད་པས་དེ་རིང་ནི་བདག་སྔོན་ཆད་མ་བྱོན་པའི་དགེ་སློང་འདི་ལ་ཆོས་ཉན་ཏོ་ཞེས་སྨྲས་པ
102a6 དང་། དེ་གཉིས་ཀྱིས་ཡོན་བསྔོ་བ་བྱས་ནས་དོང་ངོ་། །དེ་ནས་ཁྱིམ་བདག་དགེ་བཟང་དགེ་སློང་དེའི་མདུན་དུ་འདུག་ནས་དེས་དགེ་སློང་དེ་ལ་སྨྲས་པ། འཕགས་པ་ཁྱོད་ལ་བདག་གིས་དེ་རིང་བཤོས་གསོལ་བ་འདི་ཅི་བསོད་པ་དག་ལགས་སམ།
102a7 འོན་ཏེ་ངན་པ་དག་ལགས། དེས་སྨྲས་པ། སྦྱིན་བདག་བདག་ལྷོ་ལམ་ནས་འོང་བར་བརྩམས་པ་གང་ཡིན་པ་ཚུན་ཆད་ནས་དེའི་བར་དུ་བདག་གིས་འདི་ལྟ་བུའི་བསོད་པ་དག་ཟ་མ་མྱོང་ངོ་། །དེས་ཡང་སྨྲས་པ། འཕགས་པ་བདག་ལ
102a8 དགེ་སློང་འདི་དག་ཁ་ཟས་འདི་ངན་ནོ་ཞེས་རྟག་ཏུ་སྨྲ་ན་དེ་ཇི་ལྟ་བུ་ཞིག་ལགས། དེས་སྨྲས་པ། དེ་དག་གིས་གདོན་མི་ཟ་བར་ཁྱིམ་འདིར་གཞན་འགའ་ཡང་མི་འོང་བར་བྱ་བའི་ཕྱིར་བྱས་སོ། །བཙུན་པ་ཅིའི་སླད་དུ་དགེ་སློང་གཞན་ཁྱིམ་འདིར
iiif viewer powered by OpenSeadragon
