| e-texts navigator |
| Wylie |
101b1 རེ་ཤིག་ན་རྒྱལ་པོའི་ཁབ་དེ་ན་སྦྱིན་པ་པོ་དང་། སྦྱིན་བདག་དེ་དག་དགེ་འདུན་ལ་ཟས་རྣམ་པ་གསུམ་དུ་ཤོམ་པར་བྱེད་དེ། ཁ་ཅིག་ནི་བསོད་པ་སྦྱིན་པར་བྱེད་པའོ། །ཁ་ཅིག་ནི་འབྲིང་དག་སྦྱིན་པར་བྱེད་པའོ། །ཁ་ཅིག་ནི་ངན་པ་དག་སྦྱིན་པར་བྱེད་པའོ། །ཁྱིམ་གང་ན་བསོད
101b2 པ་དག་སྦྱོར་བ་དེ་དག་ནི་དྲུག་སྡེ་རྣམས་ཀྱིས་སྔོན་ངོ་ཤེས་པ་ཡིན་པས་དེར་ནི་རང་འབའ་ཤིག་འགྲོ་བར་བྱེད་དོ། །གང་ན་འབྲིང་སྦྱིན་པར་བྱེད་པ་དེར་ནི་གྲོགས་པོ་དང་། ཉེ་གནས་དག་གོ། །གང་ན་ངན་པ་དག་སྦྱིན་པ་དེར་ནི་དགེ་སློང་ཕལ་རྣམས་འགྲོ་བར་བཤམས་སོ། །དེའི
101b3 ཚེ་ཁྱིམ་བདག་དགེ་བཟང་ཞེས་བྱ་བ་བསོད་པ་སྦྱིན་པར་བྱེད་པའི་མཆོག་ཅེས་བྱ་བའི་བར་ནས། དྲུག་སྡེ་རྣམས་རེ་མོས་འགྲོ་བར་བྱེད་དེ། ཉི་མ་དང་པོ་ལ་ནི་དགའ་བོ་དང་། ཉེ་དགའ་ཟན་ཟ་བར་བྱེད་དོ། །ཉི་མ་གཉིས་པ་ལ་ནི་འདུན་པ་དང་། འཆར་ཀའོ། །ཉི་མ་གསུམ
101b4 པ་ལ་ནི་འགྲོ་མགྱོགས་དང་། ནབ་སོའོ། །ཁྱིམ་བདག་དེས་དེ་རྣམས་ལ་དྲིས་པ། འཕགས་པ་དག་འོད་མའི་ཚལ་ན་དགེ་སློང་གཞན་མི་བཞུགས་སམ་ཅི་ན། འགའ་ཙམ་ཡང་འདིར་བཤོས་གསོལ་བར་མི་མཛད་པར་ཡང་དང་ཡང་དུ་ཁྱེད་ཅག་ཁོ་ན་རེ་མོས་བྱོན། དེ
101b5 དག་གིས་སྨྲས་པ། ཁྱིམ་བདག་ཁྱོད་ཀྱིས་མི་ཤེས་སོ། །འོད་མའི་ཚལ་དེ་ན་དགེ་སློང་དག་ཡོད་ཀྱང་ཉིན་གཅིག་བཞིན་དུ་བཟའ་བ་དང་། བཅའ་བ་ལ་སོགས་པ་རྣམ་པ་སྣ་ཚོགས་སྤྱོད་པ་བྱེད་པ་དེ་དང་དེ་དག་ཁྱོད་འདྲ་བའི་ཁ་ཟས་ཕུལ་བ་དེ་ཇི་ལྟར་ཟ་བར་བྱེད། ངེད
101b6 ཅག་ནི་ཁྱོད་ཁོ་ན་ལ་ཕན་གདགས་པའི་ཕྱིར་འོང་བར་ཟད་དོ། །དེ་ནས་ཁྱིམ་བདག་གིས་སྨྲས་པ། འཕགས་པ་གལ་ཏེ་འཕགས་པ་ཁྱེད་ཅག་གིས་བདག་ལ་ཕན་གདགས་པར་མི་མཛད་ན་གཞན་སུ་ཞིག་གིས་བགྱིད་པར་འགྱུར་ཞེས་སྨྲས་སོ། །དེ་ནས་དུས་གཞན
101b7 ཞིག་ན་ལྷོ་ལམ་ནས་དགེ་སློང་ཞིག་བཅོམ་ལྡན་འདས་ཡང་དག་བར་བལྟ་བའི་ཕྱིར་ལྗོངས་རྒྱུ་ཞིང་རིམ་གྱིས་འོད་མའི་ཚལ་དུ་འོངས་སོ། །དེ་སྔ་དྲོ་ཆོས་གོས་བགོས་ལྷུང་བཟེད་ཐོགས་ཏེ་སྔ་དྲོ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས། དེ་སྲང་ན
101b8 རྒྱུ་བ་ཁྱིམ་བདག་དགེ་བཟང་གིས་མཐོང་ནས་སྔོན་མ་བྱུང་བ་ཞིག་གོ་སྙམ་དུ་བསམས་ཏེ་དེས་དེ་ལ་སྨྲས་པ། བཙུན་པ་ག་ལས་བྱོན། དེས་སྨྲས་པ། ལྷོ་ལམ་ནས་སོ། །ཅིའི་ཕྱིར་བཅོམ་ལྡན་འདས་བལྟ་བའི་ཕྱིར་རོ། །བསྟི་གནས་གང་དུ་བྱས་དེས་སྨྲས་པ། འོད
iiif viewer powered by OpenSeadragon
