| e-texts navigator |
| Wylie |
404b1 སྐྱེད་དང་། །མཁའ་ལས་མེ་ཏོག་ཆར་འབབ་པའོ། །དམ་པ་མཐོང་བ་སྔོན་བྱུང་བ། །སྔོན་མ་མཐོང་བ་ཡུལ་མཐོང་དང་། །སྟོང་གསུམ་མཐོང་ཞིང་གླིང་རྣམས་བགྲོད། །རི་རབ་རྩེར་ཕྱིན
404b2 ཐམས་ཅད་མཐོང་། །ནམ་མཁའ་མཐའ་ཡས་མཐོང་བ་དང་། །རྒྱ་མཚོ་གཏིང་དུ་ཕྱིན་པ་དང་། །སྒྲོན་མེ་ཐོགས་དང་སྣང་སྲིད་དཔྱོད། །ཉི་མའི་སྙིང་པོ་ལྟ་བུ་འོ། །ལུང་ཆེན་ཐོབ་པ
404b3 སྔོན་བྱུང་བ། །རོལ་མོ་འབྲུག་སྒྲ་སེང་གེ་དང་། །ཆོས་ཀྱི་བགྲོ་བ་ཐོས་པ་དང་། །གཟུགས་བརྙན་ཞལ་འཛུམ་འོད་འབྱུང་དང་། །དམ་པའི་གསུང་ཐོས་སྐུ་མི་མཐོང་། །ལྷ་མོ་གླུ་དབྱངས
404b4 སྒྲོགས་པ་དང་། །གཞལ་ཡས་དག་ལ་སྒྲ་འབྱུང་དང་། །གྲོགས་པོ་དམ་པ་ཞེས་འབྱུང་ཞིང་། །དེ་ཉིད་འགྲོ་བར་བྱེད་པ་འོ། །རིག་འཛིན་དམ་པའི་ལྟས་ཤར་ན། །བྱིན་རླབས་མཐུ
404b5 ཡི་ཆོ་འཕྲུལ་ཡང་། །ཉི་ཟླ་ཞོན་ནས་འགྲོ་བ་དང་། །རི་རབ་རྐོད་ནས་གསོར་བ་དང་། །འཇིག་རྟེན་རྒྱང་མར་འཕང་བ་དང་། །སྲེག་པའི་བསྐལ་པ་གཞིལ་བ་ལ། །སོགས་པའི་ཆོ་འཕྲུལ
404b6 ཐམས་ཅད་ཀྱང་། །ཁྱད་པར་རྩལ་གྱིས་སྟོན་པར་ནུས། །འདུལ་བའི་འགྲོ་བ་ཐམས་ཅད་ལ། །སོ་སོ་སྐད་དུ་ཆོས་མཐུན་པ། །འདུལ་བའི་སྒོ་ནི་སྣ་ཚོགས་སུ། །གང་ལ་དེ་ལྟར
404b7 སྟོན་པར་ནུས། །རྣལ་འབྱོར་རྩལ་གྱི་ཁྱད་པར་གྱིས། །འཇིག་རྟེན་ཁམས་ཀུན་གཡོས་ནས་ཀྱང་། །ཐམས་ཅད་ངོ་མཚར་ཆེར་འགྱུར་ཏེ། །དགའ་མགུ་རངས་པའི་རོ་མྱོང་འགྱུར། །
iiif viewer powered by OpenSeadragon
